Read pokoot KINONO KIRURUT 11 Bible Online

KINONO KIRURUT 11 - pokoot bible

KINONO KIRURUT 11

¹“Achama nyu ECHOTYON Tororötïngwo arip osis lapay kirurutkachi löwïr.

²Onkïtunö ye nyu lö, melö ongölonan nko monekwa cho melö kinkït anta kisïwa. Wölo anana chilata ECHOTYON nko owesyenyi nyo wow nyo kyasïwekwa nko wowïntanyi

³nko töngönchintinechi cho kighchï Parao pöytoghinto Misri nko pikachi löwïr

⁴nko lïkenyi nko angoletinekwa nko nkarinekwa otini kichut chane pögho Nanam nyo Pïrir otini kimi chane kïrïpokwa. Kiwany ECHOTYON chane lömïs.

⁵Onkïtökwa kïgh nyo kighwakwa nyinte surkwen atunakwa wölete

⁶nko kïgh nyo kighchï Datan nko Apiram werpö Elyap cho pö Rupen. Otini kiyata ngwïnya akïnyïkwïgh chane nko monekwa nko emenikwa nko mötworikwa nko kyakikwa kïsïwïyi pipö Israel.

⁷Wölo kisïwekwa tïkuchoni löwïr echön kigh ECHOTYON.

⁸“Kïlenyona, orip nyu kirurutkachi löwïrcho omwowokwa asisete. Atonyorunö owesyö nyo olïto koronini atape achenga,

⁹atökïchangit osiswekwo ompö koronini kiyomisyï ECHOTYON papotïnekwa lö otöni chane nko monekwa kor nyo chang chö akï wow kumata.

¹⁰Melö karkegh koronini opetekwa ochengöy nko koro Misri nyay kyomöngekwa akatkat pagh opïsoy pögh le pareni onkïyon.

¹¹Wölo koronini opetekwa ochengöy kï koro kutïngkot nko mpöghoghöy akï kor nyo wow.

¹²Akï ECHOTYON Tororötïnkwa nyo ripöy koronini köny kïtangogh.

¹³“Kïlenyona, ato arïpakwa kirurutchï omwowokwa asisete acham ECHOTYON Tororötïngwo apöghisyechï nyinte ompö mïkuliskökwo kïmïkul nko ompö söpontöngwo löwïr,

¹⁴kïkonu nyu rop ompö korenkwa nyo pö sarngatat nko nyo pö kitokot, atemuka ilö paghekwo nko dipay* nko mwaghpa arol.

¹⁵Kokonokwa sus cho pö kyak ompö korenkwa, atonyorunö omisyö nyo wow.

¹⁶Orip kegh nyu tömökïlïsak amastena apöghisyechï tororötin walaka asagh.

¹⁷Atömöngwanit nyu ECHOTYON lö kat nko akwa, akïrat ilat kïyam ngwïnya kupot kïgh nyo pito ori, awongekwa nyu lömïs ompö koronini karam konokwa ECHOTYON.

¹⁸“Kïlenyona mowutyeghö ngalechan ompö mïkuliskökwo nko söponwekwo. Arötyï ewunekwo nko tökochwekwo atökïlïkwï kiporunöt atökunonwok.

¹⁹Aneta monekwo, angalana otini ompuröy korikwo nko otini opestoy nko ato omungöy nko ato opöghisïyi.

²⁰Akirchï pölöwo kukoti korikwo nko parakuto ortïnekwo.

²¹Atökïchangit osiswekwo nko cho pö monekwo ompö koronini nyo kiyomisï ECHOTYON papotïnekwa lö otöni chane.

²²“Ompöwölo ato oripökwa kirirurutchï löwïr komwowokwa asete, acham ECHOTYON Tororötïngwo arïp ngalechi alinyö nko nyinte lasiny,

²³kïyonöy ECHOTYON puntonichoni löwïr atapaytenakwa nyu puntonichoni owesöch kïtïlokwa.

²⁴Lïku nyinkwa kore anka tïkwïl nyo otïkokwa kelyekwo. Kïngetunö koronay le surkwen ntökwitïta Lepanon akïngeta lalwa Yuparet ntökwit nanampa Kwen nyo mi okumpö ta.

²⁵Möminye chi nyo muköy ntökïyonokwa. Töni ECHOTYON Tororötïnkwa otyogh nko kiwaghat pich löwïr ompö kor anka tïkwïl nyo otïkekwa, le wölanye kiyomisï nyinte.

²⁶“Okonokwa asisete kisoyönöt nko chïpöt.

²⁷Lïku kisoyönöt ompö akwa ato arïpakwa kirurut pö ECHOTYON Tororötïngwo cho omwowokwa asete.

²⁸Wölo lïku chïpöt ato marïpakwanye kirurutchoni, amastekwa ompö aranoni asagh tororötin walaka cho melö kyonkïtökwa.

²⁹Kïkany otini kemïtwakwa ECHOTYON Tororötïnkwa akïkonïn kor nyo opetekwa ochengöy amwatïta kisoyönöt kwitïta kutïng pö Kerisim, amwatïta chïpöt ompö kutïng pö Epal.

³⁰Mito kutïngkotichoni lalwa Yordan antakwagh okumpö ta koro pipö Kanan cho möngöy Arapa wölo pörtoy Kilkal, wölo lekïto keti More cho tïlilöch.

³¹Ompöwölo karich oghyenökwa lalwa Yordan atape nyu achenga amang kor nyo konokwa ECHOTYON Tororötïnkwa.

³²Orip lasiny kirurut cho okonokwa asisete.