Read pokoot KINONO KIRURUT 12 Bible Online

KINONO KIRURUT 12 - pokoot bible

KINONO KIRURUT 12

¹“Achï kirurut löwïr cho oripekwa agh ompö kor nyo kikonokwa ECHOTYON Tororöt pö papotïnekwa kïlïkwï nyingwo ompö osiswekwa löwïr.

²Anyar nyu wop anka tïkwïl wölo köpöghisyegho puntonichoni opetekwa ochengöy korengwa kïsogho tororötinekwa. Ato kö ompö kutïngkot cho koghöch anta komos anta ket cho echön cho tïnkusöch.

³Anganya ato kïpelo amöros arul pchörinekwa apel tororötïngwa Asyera* atörotör körkeyïntinekwa cho kipötöy kewutyeghö kaynötutkökwa.

⁴“Amasagh ECHOTYON Tororötïngwo le pïchoni.

⁵Opetekwa wölo porwokwa ECHOTYON Tororötïngwo ompö ortïnekwa ompöwölo lïku atoni möngenyi, wölo opkonekwa osogho nyinte.

⁶Opökwanyu wöloni amörostinekwa cho kïpelöy nko amörostin cho pö chamat nko cho pö twatan pö kyakikwa.

⁷Kïkany otini komisyekwa ompö wölo mi ECHOTYON Tororötïngwo nko piko kongwo, ongörekyö ompö kïgh anka tïkwïl nyo kotötekwa, ompöwölo kesoyönokwa ECHOTYON Tororötïnkwa.

⁸“Motöp ntagh tïkwïn ompö osis cho pkonöy otï le ye, ighöy chi anka tïkwïl kïgh nyo kacham,

⁹ompöwölo tomönye atakwa wölo omöngekwa ompö kalya ompö kor nyo konokwa ECHOTYON Tororötïnkwa achenga.

¹⁰Oghyokwa lalwa Yordan apa amang kor nyo konokwa ECHOTYON Tororötïnkwa amanga ompö kalya nko punkökwo löwïr.

¹¹Atolapay opokwa nyu kïgh anka tïkwïl nyo komwowokwa ye wölo kakïl ECHOTYON Tororötïnkwa kesagha nyinte. Choni kï: amörostin cho kïpelöy nko amörostin walaka nko kareranpa taman nko ropöw nko amörostin cho kyowolwolchikwa ECHOTYON.

¹²Atongörökyinökwa ECHOTYON Tororötïngwo nko monekwo nko mötworikwa nko pipö Lawi cho mi kanastinekwa, ompöwölo mötïngcha chane kor nyo le nyingwa.

¹³Orip kegh motötö amörostin cho kïpelöy ompö wop anka tïkwïl nyo ochömekwa,

¹⁴kïpoto wölo kakïl ECHOTYON wop ompö ortïnekwa. Wöloni onkït wölo opekwa amörostin cho kïpelöy agha wöloni kïgh anka tïkwïl nyo komwowokwa.

¹⁵“Wölo omukekwa oyenge kyakikwo, atolapay ama kestonikwo kïtïkon, kïrïp kegh nko wölo kesoyöntokwa ECHOTYON. Omöy chi anka tïkwïl nyo orus nko nyo melö orus penyoni nyo pö cheptirkich anta nyo pö asarïch.

¹⁶Molï kisön wölo, omïlchï ngwïny le pögh.

¹⁷Motöp ntama kestonikwo kareranpa paghekwa anta dipaykakwa* anta mwowöyi arol anta twatanpa kyakikwa anta amörostin cho pö kiwalwalat anta cho pö chamat anta ropöwekwa.

¹⁸Wölo omekwa tïkuchoni ompö tawu ECHOTYON Tororötïnkwa ompöwölo kakïl nyinte. Omekwa nko monekwo nko mötworikwo nko pipö Lawi cho mi kestonikwa. Ongörekyö ompö kïgh anka tïkwïl nyo otïngkwa.

¹⁹Orip kegh mopïstö pipö Lawi ompö osiswekwo löwïr cho omöngöy korengwo.

²⁰“Kïkany ato töswokwa ECHOTYON Tororötïnkwa kore kïyetï, kïrïp kegh nko wölo kiyomistokwa akwamakwa mïnyas nyo pö peny amukekwa ome le wölo komöktoy.

²¹Ato low ompö akwa wölo kakïl ECHOTYON Tororötïnkwa kesagha nyinte, ayeng nyu ompö kyakikwo cho kikonokwa ECHOTYON amakwa ompö kestonikwo le wölo komöktoy.

²²Omöy chi anka tïkwïl nyo orus nko nyo melö orus penyoni, le nyo pö cheptirkich nko asarïch.

²³Wölo orip kegh tömolï kisön, ompöwölo mi söpon kisön. Kïlenyona mam peny kïmi nko söpon.

²⁴Molï kisön, wölo omïlchï ngwïny le pögh.

²⁵Ato molïwökwanye kï koghchikwa ECHOTYON ki pö man, tenöy nyu osiswekwa nko cho pö monekwa.

²⁶Opekwa wölo kakïl ECHOTYON kesagha nyinte tïkukwa cho tïlilöch nko amörostin cho pö kiwalwalat le wölo kyoyomistekwa.

²⁷Otötö amörostin cho kïpelöy ompö ato kïpelo amörostino ECHOTYON Tororötïnkwa. Omïlchinekwa kisön pö ropöw ato kïpelo amöros, wölo omekwa panye.

²⁸Orip ngalechï löwïr omwowokwa ato aghakwa lenyoni kï koghchikwa ECHOTYON kipö man akï karam tenöy nyu osiswekwa nko cho pö monekwa kokay.

²⁹“Ato wany asïyech ECHOTYON Tororötïnkwa pipö punton, ompö koronini opetekwa ochengöy amany,

³⁰orip kegh nyu tömarïp atöptino pïchoni nyoni ngöghöp ompö akwa. Amatep wölo soghtoy tororötinekwa lö tökegha lenyoni.

³¹Masagh ECHOTYON Tororötïngwo le chane. Ompöwölo otini soghöy chane tororötinekwa kwighöy, lilöy ECHOTYON kïgh nyo lilöy ECHOTYON. Köpechï kïpel ompö chini le monekwa le amörostin ompö tororötinekwa.

³²“Orip nyu kïgh anka tïkwïl nyo omwowokwa asete arïp, matas kïgh anta achïchuk.