Read pokoot KINONO KIRURUT 13 Bible Online

KINONO KIRURUT 13 - pokoot bible

KINONO KIRURUT 13

¹“Ato ngwïna werkoyonta kwenunkwa anta kirwotïtoghin akuporwokwa kiporunöt anta töngönchin,

²akwigha lenyoni kömwowokwa nyinte akïlenchokwa, ‘Kerïpa tororötin walaka cho melö onkïtökwa atökepöghisyechinö,’

³mater ngalechi. Ompöwölo työmokwa ECHOTYON Tororötïnkwa, atökunkïtï lö, ochömekwa nyinte ompö mïkuliskökwo kïmïkul nko ompö söpontönkwa kïmïkul anta ewo.

⁴Arïpa ECHOTYON Tororötïngwo akonyït arip kirurutkachi ater ngalechi apöghisyechï atuyö kegh nko nyinte.

⁵Wölo apar werkoyon anta kirwotïtoghin anka tïkwïl nyo kenetokwa apenya ECHOTYON Tororötïnkwa nyo kimïtunenokwa Misri, koro sekeynön. Kalïsakwa chichoni opïstenö ECHOTYON Tororötïnkwa nyo kimwowokwa. Aranoni nyo omukekwa onoteghone ghöyityö ompö kwenunkwa.

⁶“Muköy ntökïlïsinyi werïnkwa anta werïngu anta cheptöngu anta korkengu nyini ichömenyi anta kongengu nyo pö man lö, ‘Nyonö kepe kesagha tororötin walaka,’ cho melö inkïtönyi anta papotïneku.

⁷Tororötino punton cho möngöy nko akwa anta cho lowöch.

⁸Moghönchï anta olïmchï ngalechi amosyonchï amopïstö nyinte anta awïny.

⁹Apara chichoni! Nyi nyo pö tagh wira nyinte, atolapay nyu kïrïp pikö walaka.

¹⁰Awira nyinte koghïn ntökïma, ompöwölo kimököy kïlïsokwa amastena ompö ECHOTYON Tororötïnkwa nyo kimïtunenokwa Misri, koro sekeynön.

¹¹Kïkany nyu ato lïm pipö Israel ngalechoni, kuwöghisyö, akïtagh nyu kwigh ghöyityö nyo lata nyoni ngat.

¹²“Ato omöngekwa kanastin cho konokwa ECHOTYON Tororötïnkwa alïmakwa ngölyon

¹³lö kapka pich cho ghach kïlïs pich cho möngöy kanastinekwa kïlenchï, ‘Apkana kepe kesagha tororötin walaka,’ cho melö onkïtökwa,

¹⁴okït ngalechoni lasiny. Kïkany ato onkïtukwa lö man ngalechoni ghach kighisyeghö kwenunkwa,

¹⁵kïmïchini parakwa pïchoni löwïr möngöy kanasyantanoni nko kyakikwa. Anyar kanasyante tïkwïl

¹⁶aghömïtyï pöröwechoni löwïr aker nyo mi kanasyan kwen apel löwïr nko kanasyante tïkwïl le amöros pö ECHOTYON Tororötïnkwa. Lïku atoni kïratyan kokay nyo melö töketeköy ngat.

¹⁷Macheng kïgh anka tïkwïl nyo kikengot, atö kenyar atökïpïstö ECHOTYON nörekyenyi nyo ngwan akusyonchokwa akïtasakwa achangituna lenyini kiyomisyï papotïnekwa,

¹⁸ato oripökwa kirurutchï pö ECHOTYON Tororötïnkwa löwïr, kï koghchikwa nyinte kipö man.