Read pokoot KINONO KIRURUT 15 Bible Online

KINONO KIRURUT 15 - pokoot bible

KINONO KIRURUT 15

¹“Otini ketïta sörömu köny anka tïkwïl nyo pö könyis mut nko odeny, opïstö pösönut.

²Akwanyï wölo odokwa pïstoy chi anka tïkwïl pösöntanyi nyo kipösönchï pöröryenyi anta werïngwa amelö tökïghoköy ngat, ompöwölo kikemwatïta kityakata ECHOTYON.

³Omukekwa oghoköy ton, wölo kïgh anka tïkwïl nyo le nyinkwa nyo tïng pikökwa.

⁴“Wölo mörumunocha meyï korenkwa, ompöwölo soyönokwa ECHOTYON Tororötïnkwa lasiny ompö koronini konokwa.

⁵Ato okonyïtökwa ECHOTYON Tororötïnkwa, arip kirurutkachi löwïr omwowokwa asete.

⁶Ompöwölo soyönokwa ECHOTYON Tororötïnkwa kïrïp kegh nko wölini kiyomistokwa. Opösönchinekwa pipö punton cho chang, wölo melö akwa cho opösönöy tïkwïn. Opöytokwa pipö punton cho chang amöminye nyo le ompö akonga nyo pöytonokwa.

⁷“Ato mi kanastin löwïr ompö kor nyo konokwa ECHOTYON Tororötïnkwa, meyï cho pö pikökwa malïkwï sïköyut ompö werkökwo cho mey.

⁸Wölo alïkwï pörop opösönchï chane cho tenö kömököy.

⁹Orip kegh tömanan lö ompöwölo kikïlekïtit könyinay kïpïstoy pösönut arosekwa kong nyo gha pikökwa cho le mey amopösönchï kïgh chane. Atorirchï chane ECHOTYON ompö akwa kïlïkwï nyu ngokï ompö akwa.

¹⁰Otönö chane ompö chomnyogh otini otöni chane, atökusoyönok ECHOTYON Tororötïnkwa ompö ighisyewutkökwa löwïr.

¹¹Mi meyï nko akwa kokay korononi. Nka nyoni omwowokwa lö, alïkwï pörop ompö pikökwo cho le mey nko chopot.

¹² “Kïkany ato kyolwokwa werïngwo nyo pö Israel, nyo le ngetat anta korka akïpöghisyewokwa könyis mut nko akonga, atyak nyinte könyito mut nko odeny.

¹³Akwotini kangeta nyinte korenkwa, makany kïwö kwïle.

¹⁴Otöninekwa nyinte ompö köromnyö: kechir nko pagh nko dipay,* kïrïp kegh nko wölini kesoyöntokwa ECHOTYON Tororötïnkwa.

¹⁵Anan lö kyochikwa sekey ompö koro Misri. Kïsörunenokwa ECHOTYON Tororötïnkwa. Wöloni, nka nyï omwowokwa asisete lö arïpa ngalechan.

¹⁶“Wölo ato lenchï chi sekeyontenyi, ‘Moweghonanye korengu,’ ompöwölo chöminyi nyinte nko katangu, akïngarakate nyinte ato mi nko nyi.

¹⁷Icheng kata airïtö yitïnyi kïnam ket pö kukat atökïlïkwï sekeyontengu kokay. Aigh lenyoni tïkwïl ompö työ nyo le sekeyontengu.

¹⁸Amekany kwaghïghit ompö nyi, pïstenö kïweghö katangu, ompöwölo kökakïpöghisyewunyi nyinte könyis mut nko akonga ighisyö nyo köpö mötwor odeny. Atö kusoyönïn ECHOTYON Tororötïngu ompö tïkwïn löwïr cho ighenyi.

¹⁹ “Itïlilchï ECHOTYON Tororötïngu twatanpa tïch nko cho pö kechir cho melö sökote, mepöghisyeghö tïch cho le twatan ompö ighisyö anka tïkwïl amemut puto kechiryechoni le twatan.

²⁰Omenyi nyinte nko piko kongu ompö köny anka tïkwïl ompö tawu ECHOTYON Tororötïngu ompö wölini kakïl kesagha nyinte.

²¹Wölo meropchï ECHOTYON Tororötïngu kïgh nyo sapul nyo melö tenate nyo ngwolöy anta nyo karote anta nyo le sölwö le amöros.

²²Omokwa panyekwa kestonikwo akwa löwïr, ato kochï tïlilöch anta kochï orusöch, kïle wölini omekwa cheptirkich anta asarïch.

²³Wölo molï kisönkö, omïlchï ngwïny le pögh.