Read pokoot KINONO KIRURUT 19 Bible Online

KINONO KIRURUT 19 - pokoot bible

KINONO KIRURUT 19

¹“Otini kewany ECHOTYON Tororötïnkwa pïchoni pö punton konokwa nyinte korengwa, choni oyonekwa amang kanastinekwa nko korikwa,

²angot nyu kanastin sömök ompö korononi konokwa nyinte achenga.

³Oporekwa rotyotïn cho pö korengu, nyoni kïlïkwï woptin sömök cho lekïtöch ompö koronini konokwa ECHOTYON Tororötïnkwa kïlïkwï nyinkwa atökurïpchï chi anka tïkwïl nyo kapar chi.

⁴“Ato par chi chitö anka nyo melö kö punyontenyi amelö kökwötï, kumuköy kurïpchini kanasyan akonga ompö choni atökïchïwït.

⁵Ato wö chi kwen nko pöröryenyi, kïkany otini mito chitö anka kupösöy kwenta, kïngwïsa oywonay akïwir pöröryenyi kïma, mïchini nyu chichoni kurïpchï akonga ompö kanastinechoni atökïchïwït.

⁶Ato lowit kanasyanta nyo kïryoghchini nyo tököy chitöngwa, kïnyorchini nyinte arawet akïpar otini tökïmi ngwonïn mïkulöwunyi akwanyï melö kömïchini kepar nyinte ompöwölo kötomönye kuman kegh ato le tagh.

⁷Kïlenyona komwowokwa ye nyu lö, ongotyinö kegh kanastin sömök.

⁸“Töswokwa ECHOTYON Tororötïnkwa kor le atanye kimwochï papotïnekwa lö otöni chane, akïkonokwa koronini kïmïkul kiyomis nyinte,

⁹ato arïpakwa ngalechete löwïr omwowokwa asisete arip acham ECHOTYON Tororötïngwo, otösekwa nyu kanastine walaka sömök nko chay pö tagh le sömök,

¹⁰tömökïmïlta kisön cho puryö lelut ompö korenkwa nyo konokwa ECHOTYON Tororötïnkwa tömamak kisön pö pich.

¹¹“Wölo ato rey chi pöröryenyi, akusyep nyinte ompö or akïpar, atolapay kurïpchï kanasyan akonga ompö kanastinechoni,

¹²yontoy nyu poyi kanasyantenyi pich kumïtï nyinte atöketö mori pïchoni tököy chitöngwa atökïpar.

¹³Mosyonchï nyinte, wölo otïgh chi nyo lata nyoni ompö Israel atökuten osiswekwa.

¹⁴“Manategha rotyeto pöröryengwo nyo kimut poyï könyisyok ompö koronini konokwa ECHOTYON Tororötïnkwa achenga.

¹⁵ “Makany kughyö chi akong kïsöwintönchï chi ompö ghöyityö anta ngokï anta lelut anka tïkwïl nyo kegh. Akany kukïninö söwï odeny anta sömök ngalechoni.

¹⁶Kïkany ato nget chi kïmïrchï chitö anka putintön,

¹⁷akany kïpa pïchoni kwodeny wölo mi tïsï nko kirwokï cho pöytoy osiswechoni.

¹⁸Paraku nyu kirwokichoni kïkït ngalechoni lasiny akwoto rumï lö kösöwintönchï chichoni werïngwa ompö putintön,

¹⁹oghchï nyu nyinte lenyini kömököy keghchï werïngwa. Aranoni nyo omukekwa onoteghone ghöyityö ompö kwenunkwa.

²⁰Atökuwagh pikö walaka cho köngötï atolïm, mökwighöcha nyu ngat kïgh nyo gha lenyoni ompö kwenunkwa.

²¹Makany kusyonok chichoni, kitököy söpon ompö söpon, kong ompö kong, kelat ompö kelat egh ompö egh, kel ompö kel.