Read pokoot KINONO KIRURUT 20 Bible Online

KINONO KIRURUT 20 - pokoot bible

KINONO KIRURUT 20

¹“Ato apekwa oporyö nko pungkökwa asïwa angoletin nko nkaritin nko pipö lïk cho chang kïtïl chikwa, mawagh pïchoni, ompöwölo mi nko akwa ECHOTYON Tororötïnkwa nyo kimïtunenokwa koro Misri.

²Otini katakwa wölini kïporyegho, kungwïn tïsin akïlenchï pich,

³‘Akwa pipö Israel, karikakwa asisete wölo mi poryot atapara kegh nko punkökwo. Makany kïmeghok mutïnö anta onyökoritu anta opotonchö amotöp ntomïghyö ompö chane.

⁴Ompöwölo mi ECHOTYON Tororötïnkwa nko akwa, akïporyewokwa akïsörwokwa ompö punkökwo.’

⁵“Atolapay kïlenchï yetïntino pich, ‘Ngo chi nyo mi yi nyo katek konyi nyo rel akïtomönye kesoghchï? Nya kïmïla katanyi, atömökïpara poryot akïwö chi anka kïsoghchï konyi.

⁶Akï ngo chi nyo kakatkat para sapipun akïtomönye kwam akwechi? Nya kïmïla nyinte tïkwïl katanyi, atömökïpara poryot, kwam nyu chitö anka akwechi.

⁷Akï ngo chi nyo kakulotokïn korka akïtomönye kwip? Nya kïmïla katanyi, atömökïpara poryot, kwip nyu chitö anka kokononi.’

⁸“Lenchini nyu yetïntinechoni pïchoni ngat, ‘Ngo nyo nyakor nyo kima mu? Nya kïmïla katanyi, atömömeghö mutïnö werkökwa le nyinte.’

⁹Kïkany otini kewany yetïntinechoni kïngölonchï pïchoni, kïkïl nyu wowïntino lïkos kuntöghoghchï pich.

¹⁰“Otini karikakwa kanasyan nyo opörekwa anyagh otö pïchoni pöroyïn nyo pö mis.

¹¹Ato cham pïchoni akïyotwokwa or akany kïlïkwï sekeykökwa pïchoni löwïr nyorchinekwa kanasyantanoni cho pöghisyewokwa.

¹²Wölo ato machamcha chane mis akïmach poryot akany kurich pikökwa cho pö lïk kanasyantanoni.

¹³Otini ketö ECHOTYON Tororötïnkwa morikwa kanasyantanoni, apara chok chi anka tïkwïl nyo le mïrön.

¹⁴Wölo ochengekwa kor nko monïng nko kyak nko kïgh anka tïkwïl nyo mi kanasyantanoni. Opöghisyeghokwa tïkwïn löwïr cho konokwa ECHOTYON Tororötïnkwa cho opörunokwa punkökwo.

¹⁵Lenye nyoni wölo odokwa kanastin cho lowöch ompö koronini omöngekwa.

¹⁶“Wölo ato anamakwa kanastin cho konokwa ECHOTYON Tororötïnkwa achenga apar kïgh anka tïkwïl ompö wöloni nyo söpöy.

¹⁷Wölo apar pïchï löwïr: pipö Ititi nko Amori nko Kanan nko Peris nko Ipiti nko Yepusi lenyini kömwowokwa ECHOTYON Tororötïnkwa.

¹⁸Atömenetakwa chane otöptin cho ghach cho ighchini tororötinekwa akwighakwa oghchinö ngokï ECHOTYON Tororötïngwo.

¹⁹“Otini karikakwa kanasyan motör keti akwa cho mi wöloni, kïrkegh kosyepisyekwa osis cho chang, ompöwölo omekwa akweko ketichoni, ompöwölo melö pungkökwa ketichoni.

²⁰Wölo omukekwa otöre keti walaka atatekena pancha atoporyeghenö ntökïtenö aparakwa kanasyantanoni kïrul.