Read pokoot KINONO KIRURUT 22 Bible Online

KINONO KIRURUT 22 - pokoot bible

KINONO KIRURUT 22

¹“Ato sïwa chi teto werïngwo nyo pö Israel anta kechenyi nyo kepot, megh kegh le chi nyo masïwanye, mïchini yodenanyi wölini mi nyinte.

²Akwoto möminye werïnkwa ato lekïteninyi amelö inkïtönyi nyinte, ikat anta iretö katangu aikany kïtöpö wöloni ntökïtenö kungwïn werïnkwa kïyaranïn ateyokyinö nyu nyinte.

³Igh lenyoni tïkwïl ato inyorï sïkïryenyi anta sïrenyi anta kïgh anka tïkwïl nyo kepot nyo pö werïngwo, megh kegh le chi nyo masïwanye.

⁴“Ato isïwa chi sïkïryeto werïngwo nyo pö Israel anta tetanyi nyo kepïtyï arawet kamas, megh kegh le chi nyo masïwanye, mïchini ngarakanyi kïnget.

⁵“Mömïchininye kulak korka sïro pö mïrön amelö mïchini tïkwïl mïrön kulak sïro pö korka. Ompöwölo ghöchini ECHOTYON Tororötïnkwa chi nyo ighöy tïkwïn cho lata choni.

⁶“Ato nyorï chi kö pö tarit nyo mi ket, anta mi ngwïny akïmi kame kulölongöy warechi anta adöstinechi, mömïchininye kïcheng kame nko warechi.

⁷Ipïstonenyi kame, wölo imukenyi chenga ware atenyrunö pöghisyö nyo karam akïchangit osisweku.

⁸“Ato itekanyi kongu, kïmïchini naghanyi wölo le parak kuwit, tö ato chïnuna chi wöloni akïma, kïmelö kigheghchini nyinte.

⁹“Melechï chi kösïgh walaka para sapipun, ato igh chi lenyoni, kïkalïkwï sïmnyon paghechoni nko akweko sapipun tïkwïl.

¹⁰“Merat chi egh nko sïkïryö kïngor par.

¹¹“Melak chi sïra nyo kakïnapa puto kechir nko katani.

¹² “Inöpchï chi sowow sïrengu nyo irïwegho woptine kwangwan.

¹³“Ato ip chi korka akïruyö tïkwïl akïtagh atole löt,

¹⁴akïmïrchï ngala arasï lö, ‘Kyopön kokonï akyolentan chepkïltït, wölo nyini kyonyorwan osöwan lö melö kilata nyoni.’

¹⁵“Ato igha kïgh nyo lata nyoni, kïcheng yiyiko kokononi sïra koyögh nyo mi kisön nyo poru lö ki chepkïltït nyinte otini kikipöy akwipchï poyi kanasyan ompö otini le kokwö.

¹⁶Lenchini nyu papoto kokononi poyichay, ‘Kyoyilchan chichï cheptanyu, ato mi ye kïtagh.

¹⁷Akïwechï kïmïrchï ngala arasï lö melö ki chepkïltït otini kipöy nyinte. Anyï ye nyu kïgh nyo poru lö ki chepkïltït cheptönyan. Arose sïranï pö kensyö mi kisön.’ Atolapay kukarkar sïranay kïrumï kisönchay.

¹⁸Nömöy nyu poyichoni pö kanasyan chichoni akïmuny.

¹⁹Akïmutyï nyinte ropïyeni silpa cho le 100 tökutö poyichay papoto kokononi, ompöwölo ketö chepö pipö Israel arasï akïlïku kokononi korkenyi amelö kïpïsyini kutyoköy kokay.

²⁰“Wölo ato töp ngölyontononi ntökïlïkwï man, lö melö ki chepkïltït kokononi,

²¹akany kumït poyichoni kokononi cheponi ntökwit kuketo koto kwanta akïwira piko kanasyantanoni koghïn ntökïma. Ompöwölo kitö arasï pipö Israel otini kinya kïwestotö kïtomö keyilta. Aranoni nyo omukekwa onoteghone ghöyityö ompö kwenunkwa.

²²“Ato kïnyorï chi nyo rïwöy nko koko chi ketïghöy chane kwodeny. Aranoni nyo omukekwa onoteghone ghöyityö ompö kwenunkwa.

²³“Ato kïnyorchï chi kanasyan nyo rïwöy nko työ nyo kikelotokïn,

²⁴Kimïtöy chane kwodeny kïlïtöy kanasyantanoni sany akewira koghïn ntökïmeghö. Kïtïghöy cheponi ompöwölo melö kirir nyo kitö kyowönchini, ketïghöy chichoni ompöwölo kirï nyinte nko työ nyo kökikelotokïn. Aranoni nyo omukekwa onoteghone ghöyityö ompö kwenunkwa.

²⁵“Wölo ato nyorchï mïrönö työ wuw nyo kikelotokïn akïwechï kïporyeghö, kepöröy chichoni onkït.

²⁶Mada kïgh cheponi, melö kegh nyinte ngokï cho mïchini meghat. Karkegh ngölyontononi nko chi nyo kepulchï chitö anka akïpar.

²⁷Ompöwölo kinyorchï wuw akïkïrkegh kilö arir, kïmelö kimi chi nyo kyowönchï nyinte.

²⁸ “Ato kïnyorchï chi poryegho työ nyo melö kikelotokïn,

²⁹akany kutö chichoni papoto cheponi ropïyeni silpa cho le tömönut mut akepïsyï kïlïkwï korkenyi, ompöwölo kiporyeghö amelö tökumuköy ntökïpïstö nyinte kokay.

³⁰“Kïkïröy kïrï chi nko korketo kwanta.