Read pokoot KINONO KIRURUT 26 Bible Online

KINONO KIRURUT 26 - pokoot bible

KINONO KIRURUT 26

¹“Otini katakwa koronini konokwa ECHOTYON Tororötïnkwa achenga amöngisyö,

²kïmïchini kwipö köröp chi anka tïkwïl ompö akwa poretayi tïkwïn cho ilo koronini kutang wölo kakïl ECHOTYON Tororötïnkwa kesagha.

³Ape wölo mi tïsin nyo pö osiswechoni alenchï, ‘Kachaman asisete ompö ECHOTYON Tororötïnyan lö katwan koronanye kiyomisyï nyinte papotïnecha lö okonecha.’

⁴“Chengöy nyu tïsin köröpononi akutö ato kïpelo amöroso ECHOTYON Tororötïnkwa.

⁵Omwoghwekwa nyu ompö ECHOTYON lö, ‘Ki chi pö Aram paponyan nyo kipototö akïwö kutang koro Misri. Kitöpö wöloni le pïnotyon akïmöngisyö. Ki pich chane cho ngörï otini kitïta wöloni, wölo kïtösisyö chane tya ntökïlïkwï pipö punton cho owesöch.

⁶Kureyecha pipö Misri akuchopecha kong akwighecha kelïkuna sekeykökwa cho kighchini chane ighisyewut cho nïkisöch.

⁷Kerirchicha ECHOTYON Tororöt pö papotïnecha, kïter nyinte lokecha akïsïwa wölini kiwongunötencha nko kichopatencha nko nyarïltancha.

⁸Kumïtwecha ECHOTYON kepkanena Misri ompö owesyenyi nyo wow akwigh kiporut nko töngönchin.

⁹Akumïtwecha nyinte ketuna wölete akïkonecha koronete chang chö akï wow kumata.

¹⁰Sïwene ye nyu köny poretayichï pö ilö kekonaninyi, we ECHOTYON.’ “Atolapay otö atoni mi ECHOTYON Tororötïnkwa asagha nyinte wölini.

¹¹Ongörekyö ompö tïkwïn löwïr cho karamach cho kökonokwa ECHOTYON Tororötïnkwa, akwa nko pipö Lawi nko pïnotyon nyo omitekwa tïkwïl.

¹²“Ato opetekwa otötoy kareranpa taman nyo pö tïkwïn löwïr ompö könyi sömök, köny nyo kitöni ropöw pipö Lawi nko pïnot nko pönon nko mïsïktin atökïsïch chi anka tïkwïl ompö kanastinekwa kïgh nyo omöy ntökïpïghyö.

¹³Otini kaghakwa lenyoni, olenchï ECHOTYON Tororötïngwo, ‘Kochengunan konyan tïkwïn löwïr cho kikengot atönön pipö Lawi nko pïnot nko pönon nko mïsïktin, lenyini kimwowaninyi. Melö kopïstan anta owutyeghö nyo le ompö akonga ompö ngalechini kimwowaninyi.

¹⁴Melö kyaman tïkuchoni osiswo lok anta angwïsunan konyan ato kyochan sïmnyon, anta apiyta. Kyateran ngala ECHOTYON Tororötïnyu aghan lenyini kemwowaninyi.

¹⁵Rosa ye nyu ngwïny, ompö yïm möngengu nyo tïlil isoyön piköku Israel nko koronete kikonechanyi nyo kiyomisyinyi papotïnecha, kor nyo chang chö akïwow kumata.’

¹⁶“Komwowokwa ye nyu ECHOTYON Tororötïnkwa asisete lö oripö kirurutkachi löwïr ompö man nko ompö mïkuliskökwo kïmïkul.

¹⁷Kachamakwa ye nyu asisete lö, ECHOTYON nyo le Tororötïnkwa, achamakwa arïpa nyinte arip kirurutkachi löwïr, agh tïkwïn löwïr cho kimwa nyinte.

¹⁸Kachamakwa ECHOTYON asisete alïkuna pikachi kegh, kïle atakinye kiyomisokwa nyinte, akwanyï ye omisokwa nyinte oripö kirurutkachi löwïr.

¹⁹Atökutoteghenokwa nyinte kïtïl puntoni walaka löwïr cho kigh nyinte ompö salat nko ororyö akïsïch konyït. Atalïkuna pich cho tïlilöch ompö ECHOTYON Tororötïngwo kïrïp kegh nko kiyomisötenyi.”