Read pokoot KINONO KIRURUT 29 Bible Online

KINONO KIRURUT 29 - pokoot bible

KINONO KIRURUT 29

¹Anyï muma nyo kitö ECHOTYON Musa nko pipö Israel kwam ompö koro Moap. Kïtas kegh nko muma nyo kyam ECHOTYON nko chane ompö kutïng pö Sinay.

²Kïkur Musa pipö Israel löwïr akïlenchï, “Kyasïwekwa tïkwïn cho kighchï ECHOTYON Parao nko mötworichi nko pikachi löwïr ompö Misri.

³Kyasïwekwa sömewut cho ghach nko kiporut cho echön nko tïkuchanye pö töngönchin.

⁴Wölo melö kikonokwa ECHOTYON sïkunöt ompö tïkwïn cho kyasïwekwa.

⁵Kintöghoghwokwa ECHOTYON ompö surkwen könyis tömönut angwan amelö kiwïryö sïrokökwa anta kweghkökwa.

⁶Melö kyamakwa makatyan anta aghegh dipay* anta kumïn cho kïtömesyegho. Wölo kikonokwa nyinte omisyö atonkïtunökwa lö nyinte kï ECHOTYON Tororötïnkwa.

⁷Otini kikïpkanacha koronete, kïpka kïporyeghenecha ompö Sion pöytoghinto Espon nko Ok pöytoghinto Pasyan, wölo kerïntecha chane

⁸akecheng korengwa ketö pipö Rupen nko kareran pö pipö Manase nko cho pö Kad kïlïkwï nyingwa.

⁹Orip nyu mumanoni amopïstö ato omököy tökeperurok.

¹⁰“Oghyongokwa löwïr asisete tawuto ECHOTYON Tororötïngwo nko kintöghoghikwo nko poyikwo nko kirwokotikwo nko mïrön pö Israel löwïr,

¹¹nko monekwo nko korukwo nko pïnot löwïr cho mito kanastinekwa, kïngeta nyo törwokwa kwen nko nyini römwokwa pögh,

¹²atamuka otuyenö nko ECHOTYON Tororötïngwo ompö muma nyo omwokwa nyinte asisete,

¹³atökwighakwa nyinte ye alïkuna pikachi akïlïkwï nyinte Tororötïnkwa kïle wölanye kimwochï papotïnekwa Apraam nko Isak nko Yakopo.

¹⁴Amolenchï kegh akwa opïn cho omöy ECHOTYON mumanï tïkwïl,

¹⁵wölo omöy nko chi anka tïkwïl nyo mi yi asete, akwomöy nko monïng cho tomöcha keyï.

¹⁶“Onkïtökwa wölanye kikïtöptö ompö koro Misri nko wölanye kikïpkanta atanye kikiweronu korosweko pikö walaka.

¹⁷Kyasïwekwa tïkukwa cho lilu cho kisoghöy chane cho le körkeyïntin cho kikigha ket nko koghïn nko ropïyen nko koltin.

¹⁸Kïlenyona mömïchininye kïrumunö chi kwenunkwa nyo le mïrön anta korka anta kapor anta ortïn nyo mi asete nyo wöghököy mïkulöwunyi akïpïstö ECHOTYON Tororötïnyo akïwö kïpöghisyechï tororötino puntonichoni. Atömökarkegh nko ket nyo yinu akwa cho ngwonöch le ködöwï.

¹⁹Atömötöp chichoni otini kalïm ngalechï pö muma, kunonchï kegh lö, mönyorunye nyinte chïpötononi otini karïp machateto mïkulöwunyi kipeny ngalechï. Wonyokwa lömïs penyatanoni ato kochï karamach anta kochï ghach.

²⁰Mölöstoghchininye ECHOTYON chi nyo lata nyoni, wölo yetu nörekyenyi tya ompö chichoni, atolapay kïtöpö parakunyi chïpötö anka tïkwïl nyo kakikir kitapunï ntökïtenö kuwany ECHOTYON nyinte lö karpïs.

²¹Pesyot ECHOTYON chichoni ompö ortïna Israel löwïr kïrïp kegh nko chïputchoni pö muma kikikirchï kitapunï pö kirurut.

²²“Sïwïyi nyu pïnwöy cho tökïpkonöy nko pïnot cho pkono koros cho lowöch pörchö nko nyarïl nyo kitö ECHOTYON korenkwa.

²³Lïku parenikwa ghatoy cho nöghyot le ngeset cho kilum paryan. Puryö kïgh nyo kïkötkötyini akïghya, melö pito ompö cho le ratok. Lïku korenkwa le kanastina Sodoma nko Komora nko Adma nko Sepoim, cho kinyar ECHOTYON kuwonyö ompö nörekyenyi nyo wow tya.

²⁴Tepöy nyu puntonï lö, ‘Ompö ne tökwighchï ECHOTYON koronï le nyï? Akigha ne tökïnarek nyinte lenyoni?’

²⁵Kiyokyini nyu pïchoni lö, ‘Kikighchï chane lenyoni ompöwölo kipeny muma ECHOTYON Tororöt pö papotïnekwa nyo kyam nko chane otini kimïtuna koro Misri.

²⁶Kipöghisyechï tororötin walaka cho kitomöcha kïsagh chane cho kitagha ECHOTYON.

²⁷Tökïnörekyï ECHOTYON pikachi akutö chïput löwïr cho kikirchï kitapunï.

²⁸Kïyona ECHOTYON chane korengwa ompö nörekyenyi nyo wow tya kïyonchï koro pïnotön nyo mi chane nko nyete le ye.’

²⁹“Mi tïkwïn cho kiwïny ECHOTYON Tororötïncha, wölo köngongwecha nyinte Kirurutkachi atökeripöcha nko monecho kokay.