Read pokoot KINONO KIRURUT 31 Bible Online

KINONO KIRURUT 31 - pokoot bible

KINONO KIRURUT 31

¹Kulet tagh Musa kïmwochï pipö Israel

²lö, “Ketïta ye könyiswechan 120, nyo melö tomukan ye olïku kintöghoghintenkwa, amelö nyoni onkït, kataghenanïn ECHOTYON oghyö lalwa Yordan.

³Ntöghoghwokwa ECHOTYON Tororötïnkwa oghyenö antakwagh. Wongöy nyinte punton cho mi wölini atö achenga kore. Ntöghoghwokwa Yoswö oghyenö lalwa Yordan kïrïp kegh nko ngölyonto ECHOTYON.

⁴Wongöy ECHOTYON puntonichoni le wölo kida Sion nko Ok pöytoghi pipö Amori nko korengwa.

⁵Konokwa ECHOTYON owesyö nyo orïntegho chane, parakunkwa nyu oghchinö chane lenyini komwowokwa.

⁶Okil kegh anyökonitu, momïghyö anta awagh chane ompöwölo ntöghoghwokwa ECHOTYON Tororötïnkwa, ngörokokwa nyinte nyo mötïny, amelö pïstonokwa.”

⁷Atolapay kïkur Musa Yoswö akïmwochï kïmi nko pipö Israel löwïr lö, “Ikil kegh ainyakanitï, ompöwölo nyi nyo intöghoghchini pïchï ntökwit koronini kiyomisyï ECHOTYON papotïnekwa lö otöni chane.

⁸Ntöghoghwokwa ECHOTYON nyinte akïtöpö nko akwa. Ngörokokwa nyinte nyo mötïny amelö pïstonokwa, kïlenyona momïghyö anta awagh chane.”

⁹Kukir Musa kirurutyononi akutö tïsï cho le pipö Lawi cho kisïtöy Santuku Muma* ECHOTYON nko poyi Israel.

¹⁰Kimwochï Musa chane lö, “Nyini ketïta sörömu köny anka tïkwïl nyo pö mut nko odeny, otini karich kwitïta asisay, kïpïstö pösönut ompö Ichon pö Tunkun,

¹¹otini ketï pipö Israel löwïr atoni kakïl ECHOTYON kesagha nyinte, osomönchï chane löwïr kirurut kïlïm.

¹²Okur mïrön nko kor nko monïng nko pïnot cho omitekwa tïkwïl, atökumï chane kïlïm akunet kegh akïkonyït ECHOTYON Tororötïnkwa atökwigh chane ngalechoni löwïr pö kirurut.

¹³Nkïtu nyu monekwa cho kitomöcha kïlïm kirurut pö ECHOTYON Tororötïnkwa akunet kegh akïkonyït nyinte osis löwïr otini tökïmi chane koronini oghchinekwa ompö lalwa Yordan atachenga.”

¹⁴Atolapay kïlenchï ECHOTYON Musa, “Karich rapasanyi, kurunö Yoswö aimïtï kïlïtï emanï atoporchan nyinte kïgh nyo ighöy.” Kïwö Musa nko Yoswö kutang Emanay pö Tuyot.

¹⁵Kungwïnchï ECHOTYON chane ompö pchöri polta akughyongö kuka Emanay.

¹⁶Kïlenchï ECHOTYON Musa, “Karich wïyönyi rïwö nko kukötineku, otini melö temitenönyi, wöghökisyot pïchï akïsagh tororötine walaka cho mi koronini karich kïlït. Pïstonanïn chane akïpeny mumenyan nyo kyaman nko chane.

¹⁷Onörekyinan chane tya asisoni apïstan awïnyan kegh chane atökewany. Nyoru chane nyörilwok cho pö otyogh, akutupï nyarïl kong, ato mi löt kïlö, ‘Ketwecha tïkuchï ghach löwïr, ompöwölo kakïpïstecha ECHOTYON.’

¹⁸Owïngan kegh nyoman asisoni, akwompö ghöyityengwa nyo kigh chane, otini kiwöghökisyö akïsagh tororötine walaka.

¹⁹“Kïlenyona nyu, akira tumï anet pipö Israel, atökïlïkwï nyoni kïgh nyo rwokyini chane.

²⁰Omïtan chane kïlïtöy koronay chang chö akïwow kumata, kïle wölanye kyoyomisön kukötinekwa. Atökïnyorï chane omisyö anka tïkwïl nyo kömököy, akïmöngisyö nyo karam. Wölo wöghökisyot chane akïsagh tororötin walaka. Töghanïn chane akïpeny mumenyan,

²¹akïnyorï nyörilwokï cho pö otyogh. Wölo kïrkegh kïlenyoni anet pipö Israel atökïlïkwï kïgh nyo rwokyini chane ompöwölo, melö wutyegho monekwa tumoni. Onkïtön kinonutkökwa cho nonöy, kïrkegh ompö nyete le ye kïtomö kwitïta chane koronini kyoyomisyan.”

²²Kukir Musa tumoni asisoni akunet pipö Israel.

²³Atolapay kïmwochï ECHOTYON Yoswö wero Nun lö, “Ikil kegh ainyakanitï, ompöwölo nyi nyo imïtöy pipö Israel kïlïtöy koronanya kyoyomisyan chane amitan nko nyi.”

²⁴Otini kiwany Musa kukirchï kitapï ngalechay pö kirurut löwïr,

²⁵kïmwochï pipö Lawi cho kisïtöy Santuku Muma ECHOTYON lö,

²⁶“Opö kitapunï pö kirurut atö kamasu Santuku Muma ECHOTYON Tororötïngwo, atökïlïkwï nyoni kïgh nyo rwokinokwa.

²⁷Onkïtön penyatenkwa nko wölini otïngetekwa mötöw cho ongeröch. Ato openyekwa ECHOTYON le nyï otï tochan satate, ekïlïku ne otinö karapasan?

²⁸Okurunö poyi ortïnekwa nko kirwokotikwa kïtuyö, atomwochan ngalechï kïlïm, akuran yïm nko ngwïny kïlïkwï söwï cho rwokyini chane.

²⁹Ompöwölo onkïtön lö oghekwa nyo gha tya otini karapasan amïloncheghö arananye kyomwowokwa arïpa. Onyorukwa nyu nyarïl osiswechoni, ompöwölo oghekwa ECHOTYON kïnarek otini kaghakwa tïkwïn cho kitagh nyinte.”

³⁰Kukorchï Musa tuyonay pö Israel kïmïkul ngala tumï löwïr.