Read pokoot YOANA 11 Bible Online

YOANA 11 - pokoot bible

YOANA 11

¹ Kichir chi nyo kikuro Lasaro nyo kimöngöy Petaniya. Petaniya kï kanasyantananya kimöngöy Marya nko cheptöngwa Marta.

² Marya nyoni nyanya kimïlchï mwagh nyo ngutoy nyo karam kelyo Echotyon akïmisa putechi aki werïngwa Lasaro nyoni kichirate.

³Kiyonta tipikwa kut wölo mi Yeso akïlenchï, “Echotyon, kasate kongengu.”

⁴Otini kilïm Yeso, kïlö, “Mepunye meghat kösotyononi, wölo kegha atökïsala Tororöt, kechir atöketö Wero Tororöt ororyö.”

⁵Kichömöy Yeso Marta nko cheptöngwa nko Lasaro.

⁶Otini kilïm lö kasate Lasaro, kïtöpö ngat osis odeny wölini kimi.

⁷Atolapay kïlenchï kinetankachi, “Kemïlisyenö ngat Yudea.”

⁸Kïlenchï kinetankachi, “Ayo konetin, melö so otini ataye kömököy pipö Yaudi kïwireninyi koghïn? Kwompö ne nyu temökenyi yodene kegh ngat wölini mi chane?”

⁹Kïwöghökyï Yeso chane lö, “Mötïngnye so pöghetï satïn taman nko odeny? Kïlenyona atowestö chi otini tökïle pöghet kïmepïtönye, ompöwölo tökïsïwïyi löpoyïn pö ngwïnyinï.

¹⁰Wölo atowestö chi oghö kupïtöy, ompöwölo möminye lopöyïn orinyi.”

¹¹Otini kiwany Yeso kïmwa ngalechoni, kïlenchï pïchay, “Kakïrï kongenyo Lasaro, wölo owetan ongetöy nyinte.”

¹²Kïlenchï kinetankachi, “Kwato korï nyinte, Echotyon, kïtökïsöpöy.”

¹³Kimi Yeso kïmwoghöy ngala megha Lasaro, wölo kilentöy chane kingölono nyinte rïwön pat.

¹⁴Kïlenyona, kïmwochï Yeso chane lasiny lö, “Kima Lasaro,

¹⁵wölo ochan ngarakate ompö akwa, ompöwölo kimomitanye wölini atamukakwa nyu aghana. Apkana kepe wölo mi nyinte.”

¹⁶Kïlechï Tomas (nyo kïkuro Sölowö) kinetanka chay walaka, “Kepe nko konetin atökemeghyenö nko nyinte!”

¹⁷Otini kitïta Yeso wölini, kutomtö kiketïp Lasaro osis angwan cho kikuwer.

¹⁸Kimölownye kanasyanta Petaniya nko Yerusalem, kingata kilomiten sömök

¹⁹akimi pipö Yaudi cho chang cho kipka kuros Marta nko Marya atökïsaghsagh chane ompö megheto werïngwa.

²⁰Otini kilïm Marta lö pïnï Yeso arawet, kïwö kïtaroch, wölo kïtöpö Marya kaw.

²¹Kïlenchï Marta Yeso, “Echotyon, ntökemitenyi yi, kötömömeghönye werïncha!

²²Wölo onkïtön lö kirkegh nyete le ye, koninyi Tororöt kïgh anka tïkwïl nyo isomenyi nyinte.”

²³Kïlenchï Yeso, “Tutu werïnkwa.”

²⁴Kuyokyï Marta lö, “Onkïtön lö tutu nyinte ompö kitutunöto asispa söröm.”

²⁵Kïlenchï Yeso, “Ochan kitutunöt, achan söpon. Anka tïkwïl nyo ghönanïn, kïsöpöy, kïrkegh kökikïma.

²⁶Akwanka tïkwïl nyo satate akughönanïn kïmömeghönye kokay. Ighönenyi ngalechoni nya?”

²⁷Kuyokyï Marta lö, “Owöy, Echotyon, oghönan lö ichinyi Kristo,* Wero Tororöt nyo ngwïnöy ngwïny.”

²⁸Kikany kuwany Marta kïmwa ngalechoni, kïmïla kïwö kikur cheptöngwa Marya ompö ato le sison akïlenchï, “Mito konetintö yi akïkurinyi.”

²⁹Otini kilïm Marya ngalechoni, kïnget akïwö lawel wölini kimi nyinte.

³⁰(Akitomönye kwit Yeso atoni kanasyan, wölo kitökïmi atanye kituyeghö Marta nyinte.)

³¹Otini kisïwa pipö Yaudi cho kimi köyoni kïsoghsoghöy Marya wölini kingetïta nyinte, kïrïp akinonöy lö wetöy ana kïriro wölini le parsikon.

³²Otini kitïta Marya wölini kimi Yeso akïsïwa nyinte, kïkïtïng akïlenchï, “Ntökemitenyi yi, we Echotyon, kötömömeghönye werïncha.”

³³Otini kisïwa Yeso nyinte kïloköy akimi pipö Yaudi cho kirïpu nyinte kïlokyot tïkwïl. Kusyon tya akïsïch nyarïl.

³⁴Kïtep chane lö, “Kotïpchikwa nyinte onö?” Kïlenchï, “Echotyon, nyonö rosa.”

³⁵Kïlok Yeso.

³⁶Kïlenyona, kïlö pïchay pö Yaudi, “Arose köny wölo kichömtoy nyinte!”

³⁷Wölo kïlö walaka ompö chane, “Nkï nyinte nyay kimï kwigh chepkarotnay kïyotisyö konyïn, mötemukönye so kïkomönöy Lasaro tömama?”

³⁸Kuwongwï Yeso ngat ompö mïkulögh akïwö kutang parsikon wölini kikïtïpchï Lasaro, ki köpön pïrïmpononi nyo kikïkara kogh otini le kukat.

³⁹Kïlenchï Yeso, “Anateghena kada!” Kuyokyï Marta chepto ompö Lasaro lö, “Echotyon kikwararit ato tenö ye, ompöwölo kikïtöpö pïrïm osis angwan!”

⁴⁰Kïlenchï Yeso, “Kömömwowunyinye so lö isïwïyenyi ororyo Tororöt ato ighananyi?”

⁴¹Kunategha nyu koghay. Kïtopön Yeso yïm akïlö, “Oyokunyi sörö Paponyu, ompöwölo kelïmanyi ngalechan.

⁴²Onkïtön lö ilïmenyi ngalechan kïnomnyö, wölo omwoghan ngalechï ompö pïchï mi yi atökumï chane kughan lö nyi nyo kiyokwanïn.”

⁴³Otini kiwany kïmwa lenyoni, kïkursyö ompö kut nyo wow lö, “Lasaro, ngetunö!”

⁴⁴Kïngetï chichay kökima, kikïrata kelyön nko ewun sïro pö mïntïruch nko sïra nyo kikiluma tokochunyi. Kïlenchï Yeso pïchay, “Atyaka nyinte, apïstö kïwö.”

⁴⁵Otini kisïwa pipö Yaudi cho chang cho kirutochï Marya kïyoni kigh Yeso, kughan nyinte.

⁴⁶Wölo kïpa walaka wölo mi Parisaytin* akïmwochï chane ngalechay kigh Yeso.

⁴⁷Kïtuyö nyu Parisaytin nko tïsï cho echön nko Kokwö* kïmïkul akïtep kegh lö, “Kighecha ne? Kegh chichï tïkwïn cho pö töngönchin nyoman!

⁴⁸Ato kïpïstecha nyinte kulet tagh le nyete, kughönöy pich tïkwïl nyinte, kïpka nyu pipö Rumi kuwur Kö pö Tororöt* nko piköcha löwïr.”

⁴⁹Kïnget akong ompö chane nyo kile Tïsïn nyo Wow könyinoni nyo kikuro Kayapa akïlö, “Monkïtökwanye kïgh nyonikïny!

⁵⁰Möpköchinokwanye so lö köromitu ompö akwa lö töma chi akonga kïtïl ato meghö pipö punton kïmïkul?”

⁵¹Melö kimwa Kayapa ngalechoni ompö machatenyi kegh, wölo ompöwölo kilïkwï nyinte Tïsïn nyo Wow könyinoni, kïngor lö meghöy Yeso ompö piko korengwa,

⁵²amelö ompö piko korengwa opïn, wölo tökumï tïkwïl kutuyö pipö Tororöt kïmïkul cho kitoytoyö.

⁵³Kïmar nyu kintöghoghi pipö Yaudi or kïngeta asisoni nyo pöro Yeso.

⁵⁴Kïlenyona melö kitökïwesteghö Yeso ngat kwenu pipö Yaudi kesïwïyi, wölo kingeta atoni akïwö kore anka nyo lekïto surkwen, ntökwit kanasyan nyo kikuro Epraim. Kïtöpö wöloni nko kinetankachi.

⁵⁵Kikikïlekïtit asispa pipö Yaudi nyo wow nyo pö Pasaka,* kïpkana pich cho chang kestonikwa kutang Yerusalem, atökïtuyechï wölini ompö tuyo kitïlilöto kegh kïtomö kwitïta asisoni wow.

⁵⁶Kimi chane kimöröy Yeso, otini kimi chane kïtuyegho Kö pö Tororöt, kïtep kegh lö, “Ononekwa lö ne nya? Metunye so otete kyomöy Pasaka?”

⁵⁷Kökikïmwatïta tïsichoni echön nko Parisaytin lö ato mi chi nyo nkït wölo mi Yeso, kïmwochï atö kïnam chane nyinte.