Read pokoot YOANA 15 Bible Online

YOANA 15 - pokoot bible

YOANA 15

¹“Ochan ket pö sapipu nyo pö man akï ngorinte Paponyan.

²Töröy akïwirta morïn anka tïkwïl nyo mi orinyan nyo meyinunye akwa akïpïtyï morïn anka tïkwïl nyo karam tökuyin akwa cho chang.

³Kaketïlilokwa ompö ngalechaye kökomwowokwa.

⁴Ompurö orinyan atompurön orinkwa. Kïle wölaye memuchönye morno ket kuyinöy akwa onkït kïpoto ato töpö ket pö sapipïyon, kïlenyoni tïkwïl ompö akwa ato motïpikwanye orinyan.

⁵“Ochan sapipïyonte, ochikwa mori. Yinöy akwa cho chang chi nyo mi orinyan, amitan orinyi, ompöwölo momuchekwanye oghöy kïgh nyonikïny ato momitanye nko akwa.

⁶Ato mötöpönye chi anka tïkwïl nko ani, kewirchini sany atökïyam le morno ket. Ghömïtöy nyu pich morichoni pö ket akïwirchï ma atökepel kïnöghö.

⁷Ato amangakwa orinyan akïmang ngalechan orinkwa, osom kïgh anka tïkwïl nyo omököy atökekonok.

⁸Kïkonyïtöy Paponyan ato ayinukwa akwa cho chang alïkwï nyu ompö aranoni kinetankachi.

⁹Kachamakwa kïle wölo chömtonanïn Paponyu, otïpinö chomnyenyan ori.

¹⁰Ato arïpakwa kirurutköchan otïpïyonekwa nyu chomnyenyan ori, kïle wölo kyarïptan kirurutko Paponyu atöpö orito chomnyenyi.

¹¹“Komwowokwa ngalechoni atökïtöpö ngörekyenyan orinkwa atökwitïta ngörekyenkwa.

¹²Anyï kirurtyenyan: achama kegh akwane, kïle wölini kachamakwa kïlïkwï.

¹³Möminye chomnyogh nyo wow kïsir chomnyogh nyo tötoy chi söpontanyi ompö kongotichi.

¹⁴Ochikwa kongotichan ato aghakwa tïkuchoni kochikwokwa.

¹⁵Melö tokuronokwa ngat mötwor, ompöwölo menkïtnye mötworintö kini ighöy echotyontenyi. Wölo kokurenokwa kongotichu, ompöwölo koyotwokwa tïkwïn lapay cho kyalïman Paponyu.

¹⁶Kimakïlanïkwanye, kyakïlakwa acherokwa ape atayina akwa cho chang, akwa cho pö kokay. Atökïkonokwa nyu Paponyan kïgh anka tïkwïl nyo osomekwa nyinte ompö kaynenyan.

¹⁷Ochikyinokwa ye nyu lö, achama kegh akwane.

¹⁸“Ato ghöchokwa ngwïnya, onkïtï lö kinya kïghöchanïn tagh.

¹⁹Ntökochikwa pipö ngwïny, kötochömökwa ngwïnya cho ochï pikachi. Wölo ompöwölo melö ochikwa pipö ngwïny, wölo kyakïlenakwa ngwïny, nka nyoni ghöchinokwa ngwïnyinï.

²⁰ Anana ngölyontonay kyomwowokwa lö, ‘Möminye mötworintö nyo wow kïsir echotyontenyi.’ Ato kichopanïn chane kong, kuchopokwa kong tïkwïl, ntökiter chane ngölyontenyan, kötöteröy nyinkwa tïkwïl.

²¹Wölo ighwokwa chane ngalechoni löwïr, ompöwölo ochikwa piköchan, ompöwölo menkïtcha chane Tororöt nyini kiyokwanïn.

²²Ntökimangwïnanye angalan nko chane, kitömötïngcha ngokï, wölo mötïngcha kïgh otï le ye nyo tyoko kegh ompö ngokikwa.

²³Anka tïkwïl nyo ghöchinanïn, kïghöchini Paponyan tïkwïl.

²⁴Ntökimelö kyaghan kwenunkwa ighisyewut cho kimöminye chitö anka nyo kigh, kitömötïngcha chane lelut: wölo kasïwa ye chane ngalechoni kyaghan, kïghöchanïn akïghöchï Paponyan tïkwïl.

²⁵ Wölo igh lenyoni atökwitïta lö man ngölyon nyo kikikir ompö Kirurutkökwa lö, kighöchanïn chane kwïle.

²⁶“Wölo ato itï Kingörokintononi oyonwokwa kungwïna wölo mi Paponyan, nyinte kï Mïkulöwu man akïsöwintönchinanïn nyinte.

²⁷Osöwintönchinanïkwa tïkwïl, ompöwölo kyomitekwa nko ani kïngeta otini le towunöt.