Read pokoot YOANA 17 Bible Online

YOANA 17 - pokoot bible

YOANA 17

¹Otini kiwany Yeso kïmwa ngalechoni, kïtopön yïm akïlö, “Paponyu ketïta ye nyu asis. Tönö Werïngu ororyö atökumï Werïngu kïkoninyi ororyö.

²Ompöwölo kitönönyi nyinte kïpayta pich löwïr, atökumï nyinte kutö söpon pö kokay pich lapay cho ketönönyi nyinte.

³Anyï nyu söpon pö kokay, kenkïtunyi nyo ichï onkït Tororöt pö man, akenkïtï Yeso Kristo* nyo kiyonunyi.

⁴Kyapartan ompö ngwïny töroryengu, kyawanyan ighisyonanya kikonaninyi agh.

⁵Paponyu! Konante ororyö ompö tawungu ye, ororyö nyo karkegh nko nyanya kyotïngetan nko nyi kïtomö ketowï ngwïny.

⁶“Kyoporchan kaynengu pich cho kikonaninyi kïngetunö ngwïny. Ki cheku chane, ikonaninyi kïlïkwï chichan akïkaman chane ngölyontengu

⁷akakunkïtï ye nyu chane lö kingwïna kïgh anka tïkwïl nyo kikonaninyi wölo imitenyi.

⁸Kyomwochan chane ngalechanye kikonaninyi akakïtach chane akunkïtï nyoman lö, kyangwïnan wölo imitenyi akughan lö nyi nyo kiyokwanïn.

⁹“Osoghchinan chane, mosoghchinanye ngwïny, wölo osoghchinan pïchoni kikonaninyi, ompöwölo cheku chane.

¹⁰Cheku tïkwïn tïkwïl cho otïngetan akï cheku kï chichan, akonyorchan ororyö tïkuchoni.

¹¹Kangwïnan ye wölo imitenyi, momitanye ngwïny ngat, wölo mi chane ngwïny. Paponyu nyo Tïlil! Ikamana chane owesyeto kaynengu, kaynananye kikonaninyi atökumï chane kïlïkwï akonga le wölini ichinyi akonga nko ani.

¹² Kyakamanan chane atanye kitomitan nko chane ompö owesyeto kaynengu, kaynananye kikonaninyi. Kyoripön chane akimöminye nyo le ompö akonga ompö chane nyo kipot, kïpoto chichanye le kipotin atökwitïta lö man Kikirut.

¹³Wölo kangwïnan ye wölo imitenyi amwoghonan ngalechï ngwïny atömanyïl kïsïch chane ngörekyenyan ompö mïkulöwekwa akïsïch kïmïchï.

¹⁴Kyanetan chane ngaleku, kurey ngwïnya chane, ompöwölo möpöcha chane ngwïny, le wölini mopoyanye ngwïny.

¹⁵Mosoghanye lö techenga chane ngwïny wölo osoghinyi lö iripö chane Mwokïyontonay.

¹⁶Möpöcha chane ngwïny melö oponan ngwïny.

¹⁷Itïlil chane ompö man, ngölyontengu nyo le man.

¹⁸Kayontan chane kïpa ngwïny, le wölanye kiyonwaninyi angwïn ngwïny.

¹⁹Kotïlilön kegh ompö chane atokumï chane tïkwïl kutïlil kegh ompö man.

²⁰“Mosoghanye ompö chane opïn, wölo osoghchinan pich tïkwïl cho ghönanïn ompö amtaghto pïchete

²¹asoghan lö talïkwï chane kïgh akonga. Paponyu! Ikany kïtïpï chane orincha, le wölini imitenyi orinyan omitan oringu. Ikany kïlïkwï chane kïgh akonga atökumï ngwïnya kughan lö nyi nyo kiyokwanïn.

²²Kyotönön chane ororyö nyo karkegh nko nyanye kikonaninyi atökumï chane kïlïkwï kïgh akonga, le wölini ichinyi akonga nko ani,

²³omitan oringwa imitenyi orinyan, atökïlïkwï chane akonga laras atökumï ngwïnya kunkïtï lö nyi nyo kiyokwanïn aichömenyi chane le wölini ichömtonaninyi.

²⁴“Paponyu! Omökan chane choni kekonanïn kïmi nko ani atoni omitan, atökumï chane kïsïwa töroryenyan nyanye kikonaninyi, ompöwölo kichömaninyi kïtomö kegh ngwïny.

²⁵Paponyu nyo chï tenate! Menkïtinyinye ngwïnya, wölo onkïtinyi akunkïtinyi pïchï, lö nyi nyo kiyokwanïn.

²⁶Kyoporchan chane kaynengu atoporchinan chane kaynanoni atökumï chomnyot nyo itïngetenyi ompö ani kïtöpö oringwa, otöpan tïkwïl oringwa.”