Read pokoot YOANA 2 Bible Online

YOANA 2 - pokoot bible

YOANA 2

¹Kipöghön sömök, kelö mi kensyö kanasyanta Kana ompö Kalilaya. Kimi yoto Yeso tïkwïl tumoni.

²Kikikekur Yeso nko kinetankachi kensyononi.

³Kïkany kuwonyö dipay,* kïlenchï yoto Yeso nyinte, “Kikuwonyeghö dipay chane.”

⁴Kuyokyï Yeso lö, “Orkonï, momökanye netaninyi kïgh nyo oghan, tomönye kwitïta sayenyan.”

⁵Kïlenchï kameto Yeso mötworichay, “Aghakwa kïgh anka tïkwïl nyo mwowokwa nyinte.”

⁶Kimi nyu atoni töreni köghïn cho le mut nko akonga cho kikïrorchï wöloni kïrïp kegh nko otöptino pipö Yaudi cho pö kitïlilöt, kinyïghitöy akong liten cho ngata 100.

⁷Kïlenchï Yeso mötworichay, “Anyïghita törenichoni pögh.” Kunyïghit kuwayta.

⁸Atolapay kïlenchï, “Arame pöghechoni apa atö chichini pöghöy to.” Kïram akwipchï pöghinto to.

⁹Otini kichamcham chichay pöghechay kiwöghökisyö kïlïkwï dipay akimenkïtnye wölini kipkana dipaychoni (wölo kinkït mötworichay kirömu pöghe), kïkur chichay pö kensyö

¹⁰akïlenchï, “Nyoghöy chi tïkwïl kuyintoy dipay cho karamach tya tagh, kïkany otini kikïgheghsyö toye lasiny, kuyinï nyu chay walaka. Wölo keroranyi dipayka chinö karamach nko otï le ye!”

¹¹Kigha Yeso kiporunötonete pö tagh wölnö le Kana koro Kalilaya, kuporunö atoni ororyenyi, kughan nyu kinetankachi nyinte.

¹² Otini kiwany ngalechoni, kïwö Yeso kïröytö Kapernaum nko kame nko werkökwa nko kinetankachi akïpöghön wöloni osis cho ngörï.

¹³ Kilekït asispa pipö Yaudi nyo wow nyo pö Pasaka,* kilenyona kïwö Yeso kutang Yerusalem.

¹⁴Otini kilït Kö pö Tororöt, kïtuyeghö pich cho kyoltoy eghin nko kechir nko chepïrïmtin akimi tïkwïl pich cho kiwöghököy ropïyen cho kimpuröy ato lekïto mesenikwa.

¹⁵Kwigh Yeso syariti angwa akïyon pich löwïr kïngeta Kö pö Tororöt, kïmi nko kechiryekwa nko eghine akïlasta ropïyeniko pïchoni kiwöghököy ropïyen akïköpïghtö mesenikwa.

¹⁶Kïlenchï pïchoni kyoltoy chepïrïmtin, “Opö tïkuchï kïngeta yi, moghöy koto Paponyan kïlïkwï wölo kigho mïnchïrïsnön!”

¹⁷ Kunan nyu kinetankachi lö lentöy kirurut, “Nöghöy chamatenyan nyo pö kongu le ma ompö orinyan.”

¹⁸Kïtep pipö Yaudi walaka Yeso lö, “Ighenyi kiporunöt ne nyo poru lö itïngetenyi man nyo igho ngalechï nya?”

¹⁹ Kuyokyï Yeso lö, “Orule Köyï pö Tororöt pö saghat atasïwena lö otekan ngat ompö osis sömök.”

²⁰Kïlö pïchay pö Yaudi, “Imukenyi iteköy ompö osis sömök Köyï kikïtek könyis 46?”

²¹Wölo kingölono Yeso Kö pö Tororöt, nyoni kï portanyi.

²²Otini kitutunö nyinte ngwen kunan nyu kinetankachi lö kökikïngalana nyinte ngalechoni, kughan nyu chane Kikirut akughan ngalechanye kökikïmwochï Yeso chane.

²³Akwotini kimi Yeso Yerusalem, ompö omisyo Pasaka, kughan pich cho chang nyinte otini kisïwa ighisyewut cho chang cho kigh.

²⁴Wölo melö kighan Yeso chane, ompöwölo kinkït nyinte pich löwïr.

²⁵Akimötïngnye machat lö tömwowon chi ngaleko pikö walaka, ompöwölo kinkït ngal lapay cho kinonöy pich.