Read pokoot YOANA 21 Bible Online

YOANA 21 - pokoot bible

YOANA 21

¹Ato mi lötï, kuchumchï Yeso ngat kinetankachi ompö sörömu nanampa Tiperya. Kiporchï kegh le nyï.

²Kimi tïkwïl Simon Petro nko Tomas, nyo kikuro Sölowö nko Natanael, nyo kingwïna Kana nyo pö Kalilaya nko werpö Sepedayo nko kinetankachi walaka cho le odeny,

³ kïlenchï Simon Petro chane, “Kowan anam kaghagh.” Kïlenchï pïchay, “Kïpkonecha tïkwïl nko nyi.” Kïpa nyu akïlany meli, wölo kimanamcha kïgh nyonikïny oghononi.

⁴Ato mi otini kimach kïyech, kughyongö Yeso sörömu nanam, wölo kimenkïtcha kinetankachi lö ki nyinte.

⁵Kïtep nyu Yeso chane lö, “Tomönye so anamakwa koghoghwö wechara?” Kuyokyï chane lö, “Ewo! Tomönye kenamacha kïgh.”

⁶ Kïlenchï, “Owirchinö netït nyo kïnömöy kaghagh ewu tagh nyo pö meli atonyorunö kaghaghe.” Kïwirchï nyu netoni pögh, wölo kïmökumïcha kuchutï ompö chongïn pö kaghagh cho kinam.

⁷Kïlenchï kinetananay kichömöy Yeso Petro, “Echotyon nyete!” Otini kilïm Simon Petro lö, Echotyon nyoni, kïkörmön sïrenyi (ompöwölo ki chïrut nyinte,) kukomchï pögh.

⁸Kïpka kinetanpa Yeso walaka kutöngwï sörömu nanam ompö meli akimi chane kuchïtu netoni kinyïghï kaghagh. Kimölowöcha chane nko kor nyo tïyame, kimi ato tenö miten 100 pat.

⁹Otini kitï kor nyo tïyame, kïsöchï atoni ngeset cho kikïwotöno kaghagh nko makaten cho te.

¹⁰Atolapay kïlenchï Yeso chane, “Opunö kaghaghe cho te choni kötonömekwa.”

¹¹Kïlany nyu Simon Petro melinoni akuchutï netoni kinyinghï kaghagh cho echön cho le 153 ntökwit sörömu nanam akï kïrkegh ki chang lechoni, wölo melö kingat netoni.

¹²Kïlenchï Yeso chane, “Apkana omisyenö.” Kimöminye nyo le ompö akonga ompö chane nyo kinyakanan kïtep nyinte lö, “Ichinyi ngo?” Ompöwölo kinkït chane lö ki Echotyon.

¹³Kungwïn nyu Yeso akïcheng makatyan akutö chane akwigh lenyoni nko kaghaghe tïkwïl.

¹⁴Ki panto sömök nyoni nyo kiporchï kegh Yeso kinetankachi kïngeta otini kitutunö nyinte ngwen.

¹⁵Kïkany kuwany kwomisyö, kïlenchï Yeso Simon Petro, “Simon, wero Yoana, ichömaninyi kïsir pïchï löwïr nya?” Kuyokyï lö, “Owöy Echotyon, inkïtönyi lö, ochöminyi.” Kïlenchï Yeso, “Pagha wareko kechiryechan.”

¹⁶Kïlenchï Yeso nyinte panto odeny, “Simon, wero Yoana, ichömaninyi nya?” Kuyokyï Petro lö, “Owöy, Echotyon, inkïtönyi lö, ochöminyi.” Kïlenchï Yeso, “Yakwïya kechiryechan.”

¹⁷Kïtep Yeso panto sömök lö, “Simon, wero Yoana, ichömaninyi?” Kusïngirö Petro, ompöwölo kitep nyinte Yeso kïnyïl sömök lö, “Ichömaninyi nya?” Kuyokyï lö, “Echotyon inkïtönyi tïkwïn löwïr, inkïtönyi lö ochöminyi!” Kïlenchï Yeso, “Yakwïya kechiryechan.

¹⁸Omwowunyi nyoman lö, otini kitechinyi mïnïng, kiterötenyi kegh aiwö wölo kimököy wete, wölo otini keyositunyi, ighïtenyi nyu ewuneku akïrat morichoni chitö anka akumïtinyi wölo kömemökenyinye wete.”

¹⁹(Kiporï Yeso atoni kimwoghöy lenyoni wölo lata or nyo wonguno Petro meghat atökutö Tororöt ororyö.) Atolapay kïlenchï Yeso, “Rïpkanïn.”

²⁰ Kïwaghaka Petro akïsöchï lötunyi kinetana Yeso nyanya anka kichömöy Yeso. Kinetananoni kï nyanya kidopöy Yeso nangat ato kyomisïyi akïtep nyinte lö, “Ngo nyini wïchtoninyi nya Echotyon?”

²¹Otini kisïwa Petro nyinte, kïlenchï Yeso, “Echotyon, achichï nya?”

²²Kuyokyï Yeso lö, “Ato komökan kïsöpöy nyinte ntökïtenö angwïnan, kï ketïngenyi ne? Rïpaninyi.”

²³Kïghömï nyu ngalechoni kwenu pich cho kirïp Yeso lö, mömeghönye kinetananoni pö Yeso. Wölo melö kimwa Yeso lö, mömeghönye nyinte, wölo kilö, “Ato komökan nyinte kïsöpöy ntökïtenö angwïnan, kï ketïngenyi ne?”

²⁴Nyete nyu kinetananoni kisöwintönchï ngalechï akukir. Akenkïtöcha lö man söwintönenyi.

²⁵Mi nyu ngale walaka cho chang cho kigh Yeso, cho ntökikikir ngalechoni löwïr, kötolentan kötömemukönye ngwïnya kïmïkul kïroröy kitapunechoni.