Read pokoot YOANA 3 Bible Online

YOANA 3 - pokoot bible

YOANA 3

¹Kimito chi nyo kile kintöghoghinto pipö Yaudi nyo kikïkuro Nikodemo ki Parisayon* nyinte.

²Kungwïn chichoni wölo mi Yeso oghö akïlenchï, “Konetin, kinkïtöcha lö ichinyi chi nyo kiyonï Tororöt, ompöwölo möminye chi nyo muköy kwighöy kiporutchï ighenyi ato möminye Tororöt nko nyinte.”

³Kuyokyï Yeso lö, “Omwowunyi nyoman lö möminye chi nyo muköy kïsïwa Pöyunöto Tororöt kïpoto ato kïyï nyinte ngat.”

⁴Kïtep Nikodemo lö, “Kïyiyöy chi nyo kikïwowit lö ne? Muköy so kïlïtöy muyeto kame nyo pö odeny atökeyï ngat?”

⁵Kuyokyï Yeso chichay lö, “Omwowunyi nyoman lö möminye chi nyo muköy kïlïtöy Pöyunöto Tororöt kïpoto ato kïyï nyinte ompö pögh nko Mïkulögh.

⁶Nyo kiyï chi kï chi kïkany nyo kiyï Mïkulögh kï mïkulögh.

⁷Metangany, ompöwölo komwowunyi lö, mötïnye keyï chi kïnyïl odeny!

⁸Kutöy yomöt kutöngöy wölo kömököy, ilïmenyi kighumötenyi, wölo menkïtönyinye wölini ngwïno anta wölini wetöy, Kïlenyoni tïkwïl ompö chi anka nyo köyï Mïkulögh.”

⁹Kïtep Nikodemo lö, “Akumukisot ngalechoni lö ne?”

¹⁰Kuyokyï Yeso lö, “Kichö menkïtönyinye ngölyontonete so akwanyï ichinyi konetinto Israel?

¹¹Omwowunyi nyoman lö kïmwoghecha kïgh nyo kinkïtöcha akesöwintönchini kïgh nyo kakesïwecha akï möminye chi nyo chömöy söwintönencha.

¹²Ato komwowokwa ngala ngwïny amelö oghönekwa, omukekwa nyu lö ne oghöne ato omwowokwa cho pö yïm?

¹³Möminye chi nyo kiwö yïm kïpoto Wero Chi nyo kirökunö yïm.

¹⁴ “Kïle wölanye kisyoltö Musa moroy ompö surkwen, kïmötïnye tïkwïl kesyol Wero Chi parak,

¹⁵atökumï chi anka tïkwïl nyo ghönöy nyinte kïsïch söpon pö kokay.

¹⁶Ompöwölo kicham Tororöt ngwïny nyoman ntökutö Werïnyi nyo le akonga, atömepot chi anka tïkwïl nyo ghönöy nyinte, wölo tökïsïch söpon pö kokay.

¹⁷Ompöwölo kimöyonïnye Tororöt Werïnyi kurwokyï ngwïny, wölo kingwïn atömanyïl kesörï ngwïny ompö nyinte.

¹⁸“Melö kirwokyini chi nyo ghönöy Wero Tororöt, poto nyo meghönönye nyo kikerwokyï köny, ompöwölo melö kighan nyinte Wero Tororöt nyo le nyinte onkït.

¹⁹Anyï wölini kingwïnta kirwokö ngwïny: kingwïn löpoyïn ngwïny, wölo kïcham pich tuwïn kïsir löpoyïn, ompöwölo ki ghach ighisyewutkökwa.

²⁰“Ompöwölo töghöy chi anka tïkwïl löpoyïn nyo ighöy ngala tuwïn, amörikönye wölo löpoyïn, ompöwölo mömökönye kïrumtö ighisyewutkachi choni ghach.

²¹Wölo ngwïnöy chi anka tïkwïl nyo ighöy ngala man wölo mi löpoyïn atökuparta löpoyïnoni lö kigh chichoni ighisyewutkachi kïrïp kegh nko machata Tororöt.”

²²Otini kiwanta kegh, kïwö Yeso nko kinetankachi kutang koro Yudea akïpöghönö wöloni nko chane osis cho te akupatisan pich.

²³Kipötisöno Yoana tïkwïl wöloni le Ainon nyo kilekïto Salim, ompöwölo kimi pögh cho chang wölini. Kipkonchï pich cho chang kupatisan nyinte chane.

²⁴ (Kitomönye ketorchï Yoana chela atoni.)

²⁵Kumölomöl kegh nyu kinetanpa Yoana atoni nko chi pö Yaudi anka ompö ngala tïlilyö.

²⁶Kïnget nyu kinetanchoni akïpa kïlenchï Yoana, “Konetin, mi chichanya kimitenyi tïkwïl isöwintönchini, lalwa Yordan antakwagh kupatisanöy pich akïpkonchini pich tïkwïl nyinte.”

²⁷Kuyokyï Yoana chane lö, “Memuchönye chi ntökïtach kïgh kïpoto ato tö Tororöt.

²⁸ Chikwa akwane söwichan, lö kyolan, ‘Mochanye Kristo,* wölo kakïyonwanïn ontöghoghchï nyinte.’

²⁹Pö mïrar chito kensyö, akï ngörököy nyoman kongeto chichoni pö kensyö ato ghyongö atoni akïter kutinyi. Lenye nyoni tïkwïl wölo kanyïghï ngörekyenyan kïlïkwï.

³⁰Töso nyinte nyo mötïny kwororitu, amïnïngitwan.

³¹“Wow chichoni ngwïno yïm kïtïl pich löwïr, nyinte nyo pö ngwïny kïpö ngwïny akïngölonöy nyinte ngala ngwïny. Wow chi nyo ngwïno yïm kïtïl pich löwïr.

³²Söwintönchini nyinte kïgh nyo kakïsïwa akïlïm, wölo möminye chi nyo toköy söwintönenyi.

³³Akï chi nyo chömöy söwintönenyi, kukïniniot ompö nyoni lö pö man Tororöt.

³⁴Mwoghöy chichoni kiyonï Tororöt ngala Tororöt, ompöwölo töni Tororöt nyinte Mïkulögh kuwayta.

³⁵ Chömöy Kwanta Werïnyi akakutö kïpöyï tïkwïn löwïr.

³⁶Tïngeto söpon pö kokay, chi nyo ghönöy Wero Tororöt wölo mösïwïyinye söpon nyo möterchininye Wero Tororöt ngalechi, poto nörekyo Tororöt nyo töpo parakunyi kokay.”