Read pokoot YOANA 4 Bible Online

YOANA 4 - pokoot bible

YOANA 4

¹Kilïm nyu Parisaytin* lö kipatisan Yeso pich akïsïch kinetan cho chang kïtïl Yoana.

²(Wölo nyoman kimelö Yeso nyoni kipötisönöy pich kïpoto kinetankachi.)

³Otini kilïm Yeso lenyoni kïngeta Yudea akïmïla ngat Kalilaya

⁴akimöminye are anka kïpoto ato wer koro Samaria.

⁵Kungwïn ntökwit kanasyanta Samaria akonga nyo kikïkuro Sukar nyo kilekïto par nyo kitö Yakopo werïnyi Yosep.

⁶Kimito atoni kö pö pögh nyo kipö Yakopo akökikwaghach Yeso ompö rutoghtanyi kïtöpö nyu ato lekïto köyoni pö pögh. Ki wölo ngata satïn mut nko akonga atoni.

⁷Kungwïn korka nyo pö Samaria kïram pögh. Kïlenchï Yeso, “Konante pöghe agha.” (

⁸Kökikïpa kinetankachi kanasyan kwal omisyö.)

⁹ Kuyokyï kokonay lö, “Ketepaninyi pögh cho igheghöy lö ne akwanyï ichinyi chi pö Yaudi, opoyan Samaria?” Melö kitïng pipö Yaudi tïlyantan nko pipö Samaria.

¹⁰Kïlenchï Yeso, “Ntökenkïtönyi röpöwonto Tororöt ainkïtï lö ngo nyinte nyete lenchininyi, ‘Konante pögh agha,’ kötesömenyi nyinte kïkonïn pögh cho tïng söpon.”

¹¹Kïlenchï kokonay, “Echotyon, nyini metïngetenyinye kïgh nyo irömo pöghe akwanyï low koto pögh, isïkonyi nyu onö pögh cho tïng söpon?

¹²Ichinyi so wow kïtïl paponcha Yakopo nyo kikonecha köyete pö pögh, akïghegha nyinte nko monechi nko kyakichi?”

¹³Kuyokyï Yeso lö, “Anka tïkwïl nyo gheghöy pöghechete, kwomöy maral ngat,

¹⁴wölo anka tïkwïl nyo gheghöy pögh cho otönan kïlïku ompö orinyi kongpa pögh cho pö söpon, akutöni pöghechoni nyinte söpon pö kokay.”

¹⁵Kïlenchï kokanay, “Echotyon, konante pöghechoni atömökwamanïn maral ngat anta angwïn aram pögh ompö wölï löw!”

¹⁶Kïlenchï Yeso, “Wïye köny kurunö santengu, apkan yi.”

¹⁷Kuyokyï kokonay lö, “Motïngetanye santenyu.” Kuyokyï Yeso lö, “Kemwanyi ngala man lö metïngetenyinye santengu.

¹⁸Ompöwölo kakwipïnyi pich cho le mut amelö santengu ompö chichoni imitenyi ye tïkwïl. Nyo kemwowaninyi ngala man.”

¹⁹Kuyokyï kokonay lö, “Nkasïwan lö ichinyi werkoyon, nya Echotyon.

²⁰Kisagha poyicha Tororöt kutïngï parak, onetekwa pipö Yaudi lö mötïnye kesagha Tororöt Yerusalem.”

²¹Kïlenchï Yeso, “Korkonï, ghananïya, pkonöy osiswö cho mosoghokwanye Paponyan kutïng parak anta Yerusalem.

²²Osoghekwa kïgh nyo monkïtökwanye, wölo kïsoghecha kïgh nyo kinkït, ompöwölo ngwïno sörunötö pipö Yaudi.

²³Wölo pkonöy osiswö akikwitï osiswechoni, cho ato mi pich cho soghöy Tororöt nyoman, kïsoghöy Paponyan ompö mïkulögh nko man.

²⁴Mïkulögh Tororöt, kïkany pïchona soghöy, kïmïchini, kïsagh nyinte ompö mïkulögh nko man.”

²⁵Kïlenchï kokonay, “Onkïtön lö itu Masiya,* (ompö kayne anka kï Kristo).* Otini ketï, kïmwowecha ngal löwïr.”

²⁶Kilenchï Yeso, “Ani nyete ongölonöy nko nyi nyoni.”

²⁷Kwitï nyu kinetankachi, kïtangany nyoman, ompöwölo kingölonöy nyinte nko korka. Wölo kimöminye chi nyo kïlenchï, “Imökenyi?” Anta, “Kölö ne tengölonenyi nko korka?”

²⁸Kïpïstö kokonay kösïmenyi akïwechï kegh kutang kanasyan akïlenchï piko wöloni,

²⁹“Apkane ya arosa chi nyo kömwowanïn tïkwïn löwïr cho kyaghan. Ekumuko nyinte kïlïku nya Kristo?”

³⁰Kïngetunö pich kanasyantanoni akïpa wölo mi Yeso.

³¹Kimito nyu atoni kinetankachi kïsoghöy nyinte lö, “Kayakay konetin, omisyenö!”

³²Wölo kïlenchï Yeso, “Otïngetan omisyö nyo monkïtökwanye.”

³³Kïtep kegh kinetankachi lö, “Eketö ngo nyinte omisyö köny?”

³⁴Kïlenchï Yeso, “Omisyenyan kï aghan machata nyinte nyini kiyokwanïn awany ighisyenyi.

³⁵Momwoghekwanye ataye lö, ‘Köngötï aro angwanï pat kel pagh so?’ Omwowokwa ye lö, ‘Arose paren lasiny lö kikïmïchï kel.’

³⁶Nyoru ilinto pagh ropöwontenyi, akïghömïtöy pagh ompö söpon pö kokay atökïngörekyö chane kwodeny, ngorin nko ilin.

³⁷Lïku nyu man mwaghatanay lentöy, ‘Letoy chitö anka, kwilöy anka.’

³⁸Kayontokwa ape olenö pagh par nyo kimasïngekwanye, kisïnga pikö walaka paranoni, akwa nyu choni kosïkö ighisyengwa kinyiwut.”

³⁹Kighan nyu pipö Samaria cho chang cho kimi kanasyantanoni ngala Yeso ompö söwintöno kokononi kimwa lö, “Kömwowanïn ngal löwïr cho kyaghan.”

⁴⁰Kïkany kuwany pipö Samaria kïrutochï Yeso, kïsom lö tempur nyinte nko chane, kïpoghön nyu nyinte wöloni osis odeny.

⁴¹Kughan pikö walaka cho chang ompö ngölyontenyi

⁴²akïlenchï kokonay, “Kakighanacha ye amelö ompö ngaleku wölo kakïlïmacha achane akenkïtï nyoman lö nyinte nyo le Ghetinto ngwïny.”

⁴³Otini kiwany Yeso kupana wöloni osis odeny, kïnget akïwö kutang Kalilaya.

⁴⁴ Ompöwölo kökikïmwa Yeso nyinte lö, “Mötïngnye werkoyontö konyït ompö korenyi.”

⁴⁵ Otini kit nyinte Kalilaya, kïtak pich nyinte ompö wöloni, ompöwölo kisïwa chane tïkwïn cho kigh nyinte ompö asis nyo wow nyo pö Pasaka* ompö Yerusalem, ompöwölo kitökïpkono chane tïkwïl wöloni.

⁴⁶ Kimïla nyu Yeso Kana nyo pö Kalilaya, wölanye kiwaghaka nyinte pögh kïlïkwï dipay.* Kimito atoni wowïn pö ripï akong nyo kichirate werïnyi ompö Kapernaum.

⁴⁷Otini kilïm lö kikungwïna Yeso Yudea kutöngwï Kalilaya, kïwö wölo mi nyinte akïtep lö töwö Kapernaum atökusop werïnyi nyo kirich kïma.

⁴⁸Kïlenchï Yeso chichay, “Ato masïwekwanye kiporut nko töngönchin, kïmoghönekwanye.”

⁴⁹Kuyokyï wowïnay pö ripï lö, “Echotyon, kepe lawel kïtomö kïma montönyan.”

⁵⁰Kïlenchï Yeso, “Wechinö kegh, söpöy werïngu.” Kughan chichay ngala Yeso akïwechï kegh.

⁵¹Akwotini kimi kïwe katanyi, kïtuyeghö mötworichi cho kilenchï nyinte, “Satate werïngu.”

⁵²Kïtep pïchoni ato teno ato kingwangwanit porto monïngoni. Kïlenchï, “Omötu pöghet ato ngata satïn mut nko odeny otini kangeta nyinte tïnyon.”

⁵³Kunan nyu kwanta lö sayananye kïmwochï Yeso nyinte lö, “Söpöy werïngu.” Kughan nyu nyinte nko piko konyi kïmïkul.

⁵⁴Nyoni kiporunöte nyo awes nyo pö odeny nyo kigh Yeso otini kimïlegha Yudea kutöngwï Kalilaya.