Read pokoot IGHISYEWUT 14 Bible Online

IGHISYEWUT 14 - pokoot bible

IGHISYEWUT 14

¹Kilïtöy Paulö nko Parnapa kö pö saghat* ompö Ikonio, atolapay kïngalan nyoman tökughan pipö Yaudi cho chang nko pipö punton,

²Wölo kïpechï pipö Yaudi cho kimeghancha Yeso kuwulyö akwigh pipö punton kurey chane.

³Kumpur kiyoktoghï wölini osis cho chang, akingölonöy ompö nyakanan paraku Echotyon, kïsöwintönchï ngölyonteto pöropchenyi, akutö chane owesyö nyo igho kiporunöt nko töngönchin.

⁴Wölo kïmuryö pïchay kimi kanasyantanay, kipöyit walaka pipö Yaudi kïpöyit walaka kiyoktoghï.

⁵Atolapay kuchumï poryot nyo kikïporyeghö kiyoktoghï, poryot nyo kingetï pipö punton nko Yaudi, kïmi nko kintöghoghikwa akïghapghap akïwira chane koghïn.

⁶Nyini kinkïtï kiyoktoghï ngalechoni, kupertoy kutang okumpö Lustra nko Derpe, kanastina koro Lukaonia nko koroswe walaka cho lekïtöch.

⁷Kwamtegha wölini Lökoy cho Karamach.

⁸Kimito chi nyo kimönyöy Lustra nyo kisipisyote kelyön. Kingwolöy kingeta keyï, amöwestönye nyonikïny.

⁹Kimi chichoni kïteröy ngala Paulö, kuchirchï kong kïsïwa Paulö lö tïng kighanat nyinte yöröy kisopöt.

¹⁰Kïmwa ompö kut nyo wow lö, “Ghyongenö kelyeku lasiny!” Kughyö chichay lenyini akïwestö.

¹¹Kïkany kïsïwa söpïchischay kïyoni kigh Paulö, kuteghyö ompö ngalekwa pö Lukaonia lö, “Körökwecha tororötinö ompö körkeyïn pö ptangengmötin!”

¹²Kïkurö Parnapa Seus, akïkuro Paulö Ermes ompöwölo ki nyinte nyo kile ngöloninte.

¹³Kimi kö pö saghata Seus kanasyan sany. Kïrongwï tïsinto Seus nko söpïch eghin akwipï seret lö tökutötö amöros.

¹⁴Kïkany kïlïm Parnapa nko Paulö kïyoni kimököy pïchoni kwighöy kïkarer sïrokökwa akïryagh kutang tuyonay kwen, akuteghyö lö,

¹⁵“Kölö ne taghakwa le nyï nya pïchï? Kichicha ptangengmötin le akwa! Kïmitecha yi kemwowokwa Lökoy cho Karamach, cho pö Yeso atamuka owöghökisyenö atömasagha ngat tïkuchï mötïny kinyiwut apkonchï Tororöt nyo söpöy, nyo kigh yïm nko ngwïny nko nanam nko tïkwïn lapay cho mi orinyi.

¹⁶Kipïsï pich könyisyok kïpesta le wölo kimöchtöy.

¹⁷Wölo porï nyinte kegh osis lapay ompö tïkwïn cho ighöy cho karamach, konokwa rop nyo ngwïno yïm, akïkonok osiswo ilö konokwa omisyö akwighak ongörekyenö.”

¹⁸Kïrkegh kimwochï kiyoktoghï ngalechoni, kimemïcha kïmir nyoryonay kïpelchï chane amöros.

¹⁹Kïpkana pipö Yaudi walaka kanastina Antiokia nko Ikonio, kwigh nyoryonay kïrïp ngalekwa, kïpechï kïwir Paulö akuchut kïngeta kanasyantanay kunonöy lö kima.

²⁰Wölo otini kipka kighönï kuwit nyinte, kïnget akïmïla kutang kanasyantanay. Atomi asis nyo pö odeny kïwö nyinte nko Parnapa kutang Derpe.

²¹Kyamta Paulö nko Parnapa Lökoy cho Karamach ompö Derpe kughan pich cho chang Yeso. Atolapay kïmïlisyö kutang Lustra, kïpa Ikonio, ntökwit Antiokia nyo mi Pisidia.

²²Kuchïchim kighönï cho kökikughan Yeso kughyö lasiny, akukil chane kïnam kighanatengwa. Kunet chane lö, “Weröy pich lapay cho ghönöy Yeso nyörilwok cho chang otete tökïsöpchot atökumï nyu kïlïtöy Pöyunöto Tororöt ompö osis cho pkonöy.”

²³Akwotini kiwany kwomtoy kïkïlchï poy kanisa anka tïkwïl akïsagh, kïmi nko kïrurat akutö chane mori Echotyon, nyo kökikughan chane.

²⁴Kïkany kuwany kïpa kuwer koro Pisidia, kïpka ntökwitï Pampulia.

²⁵Kwomchï pich Lökoy cho Karamach ompö Perka atolapay kïröytö kutang Atalia,

²⁶akïngetunö atoni kïmïlisyö ntökwit Antiokia wölay kikitöneghö chane ripöto Tororöt nko pöropchenyi ompö pöghisyonay kakupuntö chane.

²⁷Nyini kitï chane Antiokia kunyoryö pipö kanisa akïmwochï chane ngal lapay cho kegh Tororöt nko chane nko wölo kiyatïta nyinte are atökughan puntonï tïkwïl.

²⁸Kitïpï wölini nyo kogh nko kighönichay.