Read pokoot IGHISYEWUT 16 Bible Online

IGHISYEWUT 16 - pokoot bible

IGHISYEWUT 16

¹Kïrutö Paulö kutang Derpe nko Lustra wölo kimi kighönintö nyo kikuro Timoteo. Ki chi pö Yaudi kame akï nyo kikughan Kristo,* wölo ki chi pö Krik kwanta.

²Kingalana Timoteo kighönï tïkwïl cho pö Lustra nko Ikonio lö karam.

³Kimököy Paulö kumït Timoteo kïwö nko nyinte, kïlenyona kumït. Kigh lenyoni ompöwölo kinkït pipö Yaudi cho kimi koroswechoni löwïr lö, ki chi pö Krik papoto Timoteo.

⁴Akwotini kirutoy kuwerotoy kanastin kïmwochinotö kighönï kirurut cho kimut kiyoktoghï nko poy ompö Yerusalem, cho poru wölo mïchini kumpurtoy kighönï, akïmwochï chane kïrïp.

⁵Kïlenyona kukil ngalechoni pipö kanisen kïchïchïm lasiny ompö kighanatanay akïtösisyö kighönï osis lapay.

⁶Kirutö pïchoni kuwerata kor nyo kipesyö Prukia nko Kalatia, ompöwölo kimwochï chane Mïkulögh nyo Tïlil tömamta ompö okumpö Esya.

⁷Akwotini kitïta chane rotyot Misia, kumukyï lö kyoghsot kepetöy koro Pitinia, wölo möchömchïnye Mïkulögh pö Yeso chane.

⁸Kïlenyona kïpa kuwer kwenu Misia akïröytö kutang Troa.

⁹Kungwïnchï Paulö sïwïyagh oghononi nyo kisïwa chi pö Makedonia nyo kighyongöy akïsomöy nyinte lö, “Owunö Makedonia atengarakech!”

¹⁰Nyini kïsïwa Paulö sïwïyaghnoni, kenapacha kegh lawel kepa Makedonia, ompöwölo kipköchecha lö kökurecha Tororöt kepa kyomchinö Lökoy cho Karamach, pipö wölini.

¹¹Kepeghecha Troa ompö meli ketang Samotrake, atomi asisto odeny ketacha Neapoli.

¹²Kengetecha atoni kepa ketang Pilipi, kanasyanta Makedonia, nyo kirumunote ompö korononi, kïpöytoy nyo pipö Rumi. Kempuröcha kanasyantanoni osis cho chang.

¹³Nyini kitïta asispa Sapato,* kengetucha kelïtöy ara kanasyan kepa ketang atolekïto lalwa kelentöy tökenyorunö ana wölo kösogho su pipö Yaudi. Kempuröcha ngwïny akengalan nko kor cho kinyoryeghö atoni.

¹⁴Akonga ompö cho kiter lökoyecha kï Lidia nyo kingwïno Tuatira, nyo kile oltoghinto sïro cho kilata akwa reper. Ki korka nyinte nyo kisoghöy Tororöt, kwigh nyu Echotyon mïkulöwunyi kumï kïter akughan ngal cho kimwowu Paulö.

¹⁵Nyini kikipatisan nyinte nko konyi piko löwïr. Kïsomecha lö, “Ato kasïwekwa nyoman lö kaghanan Echotyon, apkan otïpï konyan.” Kïtïkïchecha kepe.

¹⁶Kikany asistanka ato kikïpetecha wölo kïsogho su, kïtuyeghecha työ nyo le sekeyon nyo kitïng oyin nyo gha nyo kighöy nyinte kïngorsyö. Kighöy cheponi yetïntinechi kïnyorï ropïyen cho chang, ompö ngorutkachi.

¹⁷Kïtas tagh kïrïp Paulö nko acha akuteghonu kïlentöy, “Pipö Tororöt nyo Töror Tya Pïchï. Akwomwokwa ara sörunöt.”

¹⁸Kwigh lenyoni ompö osis cho chang ntökïtenö kulil Paulö astanka, akuchirchï kong kïlenchï oyintonay, “Omwowunyi ompö kaynata Yeso Kristo, lö ngetena chepï!” Kïpïstö oyintonay chepay panini.

¹⁹Nyini kunkïtï Yetïntinechi lö mökïtïngcha pöröyïn nyo nyoruno chepay ropïyen ngat, kïnam Paulö nko Sila akuchut chane kïpa tawu kirwok cho kimi donyö.

²⁰Kumïtï chane wölo mi kirwokot pö pipö Rumi, akïmwa lö, “Pïchï kï pipö Yaudi cho mi kususöy pich ompö kanasyantencha.

²¹Mi kunetöy chane otöptin cho melö asïltinecha pö pipö Rumi. Kïlenyona mömïchininye keghacha le wölo möktenecha pïchï kegha.”

²²Kïlïtï nyoryonay tïkwïl kïporyeghö chane, kïkarer kirwokichay sïro pö Paulö nko cho pö Sila, akïmwa kemuny chane sitit.

²³Kïkany kïmuny chane tya, akïtorchï chela, akemwochï ripin kïrip chane lasiny tömöchïwïtyö.

²⁴Kïkany kïlïm ripintonay lenyoni, kïtorchï chane kot nyo pö ori, akïrötï kelyekwa tömöleni ket.

²⁵Ato mi oghökwen kïwechï Paulö nko Sila kïsagh akïtum tumwöy cho sölöy Tororöt, akilïmöy pipö chela walaka.

²⁶Kïnyini lawel kïpotan ngwïnya nyoman kïngönngönitu pölöw cho kikïteka chelanay. Akïpanini lawel kïyotisyö kukot lapay akïngötö sïrïmtine chay kikïrata pïchay löwïr.

²⁷Kwotyeghö ripintonay pö chela rïwon kïlö arosïta kiyotisyö kukoti chelanay löwïr, kunana lö kikupertoy pïchay körötote löwïr kïlenyona kïngwïsï rotwenyi pö cho kimököy kïpöröy kegh.

²⁸Wölo kuteghchï Paulö, “Mepar kegh! Kïmitecha yete lapay.”

²⁹Kikurtö kepï kitömöwon, kukomchï ori akupïtyï kelyo Paulö nko Sila kïpotönöy ompö kiwaghat.

³⁰Atolapay kumït chane sany akïtep lö, “Echotchï oghan ne, tökesörwon?”

³¹Kïlenchï, “Ghana Echotyon Yeso atesïkö sörunötenyi nko piko katangu.”

³²Atolapay kwomchï nyinte nko pikö walaka cho kimi konyi ngölyonto Echotyon.

³³Ompö atoni chane panini kwoghonini kïpa kot anka akïmwat moyokökwa, kïnyini lawel kepatisan nyinte nko piko katanyi kïmïkul.

³⁴Atolapay kumït Paulö nko Sila kïpa konyi akutö omisyö kwam. Kïngarak nyinte nko piko katanyi nyoman. Ompöwölo kakughan Tororöt.

³⁵Kïkany kïyech kuyoktö kirwokotichay pö Rumi wowïntino askarin akïlenchï, “Opïstenö pïchono kïpechï kegh.”

³⁶Kïmwochï ripintonay pö chela Paulö ngalechay lö, “Kakuyokwï kirwokotï kut kepïstinyi nko Sila. Nyo karam ape ompö kalya.”

³⁷Wölo kïlenchï Paulö wowïntinechay pö askarin, “Kikïmungecha kïsïwïyi pich lapay. Aketorchecha chela, akechicha pipö Rumi. Nkanyï kïyöröy kewïchtonecha? Melö lenye nyona! Nya kïpka kirwokotichoni chane yeteyi kutyakecha.”

³⁸Kïpa wowïntinechay pö askarin kïmwöchï ngalechay kirwokot pö Rumi, kïkany kïlïm lö kïchï pö Rumi Paulö nko Sila, kwotyö.

³⁹Kïlenyona kïpa kïsaghsagh chane, atolapay kumïtuna chane chela kïpka sany akïmwochï chane kïngeta kanasyantanay.

⁴⁰Kïngetunö Paulö nko Sila chela akïpa kuwerata kö pö Lidia. Kuryama wöloni nko kighönï, kïcher chane ompö ngala kikilöto kegh akïpa.