Read pokoot IGHISYEWUT 17 Bible Online

IGHISYEWUT 17 - pokoot bible

IGHISYEWUT 17

¹Akwotini kökikïpa kuwerata kanastina Ampipoli nko Apolonia, kwit kanasyanta Tesalonike, wölo kimi kö pö saghat* nyo kisogho pipö Yaudi.

²Kïlït Paulö köyay pö saghat le wölo lata su otöptanyi, kïteptep kegh nko pïchoni ngala Kikirut ompö Sapatotin* sömök cho kirïp kegh.

³Kimwochini akuporchini lasiny ompö Kikirutchoni lö, kimïchï Kristo* kuwongwï, akututï ngat ompö meghat. Kïlenchï Paulö chane, “Yeso nyoni omwowokwa, nyini le Kristo.”

⁴Kughan walaka ngala Paulö nko Sila, akïcham tïkwïl tuyot nyo wow nyo pö Krik cho kisoghöy Tororöt nko koru pich cho kile kintöghoghï.

⁵Wölo kïnyonyintön pipö Yaudi, ompöwölo kirïp pich cho chang Paulö nko Sila, kïghamït pich cho kile katurök ompö ortïna kanasyan. Atolapay kunget syala ompö kanasyantanay kïmïkul, akïpa kupokyï kö pö Yason, kïmököy lö tökïnyorï Paulö nko Sila atökumïtï chane wölo mi pipö kanasyan atökerwokï.

⁶Akwotini kïmökïnyorcha, kuchut Yason nko kighöni walaka kïpa tawu kirwok ompö kanasyantanay akuteghyö lö, “Ketï wölete ngat pïchay kiwaghach ngwïny kïmïkul achï kapka kutöngwï kanasyantencha,

⁷kapagh Yason chane le toyechi. Netöy pïchï lapay kwigh tïkwïn cho töghöy kirurut pö Kaisari akï lentöy mi pötoghintö anka nyo kïkuro Yeso.”

⁸Akwotini kilïm ngalechoni, kwotyö tuyonay nko kirwoki kanasyantanay.

⁹Kwigh kirwokotchay Yason nko pïchay walaka kutötö ropïyen cho kakïmöko chane atolapay kïpïstö kïpa.

¹⁰Nyini kituwit, kïwïchtö kighönï Paulö nko Sila kïwö kutang Perea. Nyini kitïta kïpa kutang kö pö saghat nyo kisogho pipö Yaudi.

¹¹Kingötïpöch pïchoni pö Perea kïtïl pipö Tesalonike. Ompöwölo kitïng chane machat nyo wow, kusyach Kikirut atö kïsïwa lö lechachoni ngalechoni kimwowu Paulö.

¹²Kughan cho chang ompö chane akughan tïkwïl koru Krik cho chang nko mïrönkökwa cho kile monkor.

¹³Wölo nyini kilïm pipö Yaudi cho pö Tesalonike lö kiwö Paulö kwamta ngölyonto Tororöt ompö Perea tïkwïl, kïpa wölini akutor kïwïkï pich kïsyal.

¹⁴Kïnyini lawel kïwïchtö kighönï Paulö kïwö kutang sörömu nanam nko pikö walaka, wölo kudong Sila nko Timoteo Perea.

¹⁵Kïpa pïchini kimïtöy Paulö ntökwit Atene. Atolapay kïmïlonchö Perea kïpa kïmwatïta ngala Paulö cho kimwa lö, mïchini kïwö Sila nko Timoteo kïtuyö nko nyinte lawel.

¹⁶Akwotini kitökïmi Paulö Atene kïköngöy Sila nko Timoteo, kulil kïgh nyoman otini kisïwa körkeyïntino tororötin cho kinyïghï kanasyantanoni kuwit.

¹⁷Kïlenyona kïngalan kïteptepöy kegh ompö kö pö saghat nko pipö Yaudi nko pipö punton cho kisoghöy Tororöt nko cho kiryomo osis löwïr donyö nko pich cho kimi asoni.

¹⁸Nyinte nko koneti walaka cho ngöghomöch cho kikïkuro Epikurio nko Stoyiko. Kïlo walaka, “Möchöy nyu nyï sölwe lö oporu kegh kïmwowu ne nya?” Kïlo walaka, “Nkïlenye atomököy kïngölono tororötin cho le to.” Kimwa lenyoni ompöwölo kyomchini Paulö ngala Yeso nko kitutunöt.

¹⁹Kïlenyona kïkur Paulö kungwïn kokwo Areopako akïlenchï, “Kïmökecha kenkïtune kinetutyonï rel inetenyi pich.

²⁰Kakïlïmacha ngal walaka cho le to ompö tïkuchoni inetenyi pich nyo kïmökecha ye nyu kenkïtune lö mwoghöy ne ngalechoni.”

²¹Kipöghisyeghö pipö Atene kïmïkul nko to cho kimi wöloni pöroyïn nyo wow kukoröy akïlïm lökoy cho relach.

²²Kïlenyona, kighyongö Paulö kokwonay pö Areopako kwen, akïlenchï pïchay, “Akwa pipö Atene! Kasïwan lö ochikwa pich cho kilote kegh nyoman ompö sowut!

²³Ompöwölo kowestotan awerata kanasyantenkwa kïmïkul asïwan wölo osoghonekwa anyorwan tïkwïl wölo kïpelo körostin tïng kikirut cho lentöy, ‘Ompö Tororöt nyo menkïtnye chi!’ Nyoni osoghekwa amonkït, nyo omökan omwowokwa.

²⁴ Mömöngönye Tororöt nyo kigh ngwïny nko tïkwïn lapay cho mi orinyi kori sowut cho kitek pich, ompöwölo Echotyonto yïm nyinte nko ngwïny.

²⁵Amötighonye kegh kïgh anka tïkwïl nyo ighöy pich atökutö nyinte, ompöwölo nyinte nyini töni pich söpon nko kimïny nko kïgh anka tïkwïl nyo mököy pich.

²⁶Kitor nyinte kwigh chi akonga kïpkana chichoni pich löwïr, akïkany kïmang kor kïmïkul, akï nyinte nyo kimut ato ngata osiswö nko rotyotïno möngo pich.

²⁷Kigh lenyoni atökumï chane kïyar nyinte, atömanyïl kïnyorï nyinte otini mi kïsömsömöy nyinte, Akïnyïl kï mölownye ompö acha lapay

²⁸le wölo kimwa chitö anka lö, ‘Nyinte nyini ighecha kesöpchenö akepesïta aketïpï le nyete kïmitö.’ Karkegh nko wölo mwoytoy pikö walaka cho kikir lö, ‘Kïchicha löwïr monechi.’

²⁹“Nko kakïchicha monïngo Tororöt lenyoni o, kïmömïchinechanye kenone lö karkegh Tororöt ompö otöptanyi nko kïgh anka tïkwïl nyo kikigh ompö körkeyïn nyo kigho koltin, anta ropïyen, anta kogh nyo kikipat ompö chïreryo tïnganata chi.

³⁰Nka nyaya kitagh Tororöt kuyityï pich ghöytyö, ompöwölo kitomöcha kïpköchï, wölo sikyini ye nyu pich löwïr ompö wop lapay lö, ‘Okötenö ortïnekwo cho ghach.’

³¹Ompöwölo kikïror asis akonga nyo rwokinegho ngwïny ompö man ompö chichoni kikïl nyinte. Akakuporchï nyoman pich lapay ngalechoni tömömi chi nyo tomtomönöy ompöwölo kigh nyinte kututï ompö meghat.”

³²Nyini kilïm pïchay Paulö kïngölono kitutunöto pich cho kimeghö, kïngem, kungörer walaka, wölo kïlö walaka, “Kïmökecha mwowechanyi ngalechoni ngat.”

³³Kïngeta nyu Paulö kokwanay.

³⁴Kïrïp walaka ngalechi akughan akï akonga ompö pïchoni kï Dionisio nyo pö Areopaki nko korka nyo kikuro Damaris nko pikö walaka cho kighan.