Read pokoot IGHISYEWUT 18 Bible Online

IGHISYEWUT 18 - pokoot bible

IGHISYEWUT 18

¹Nyini kiwany Paulö kïngölonöy ompö kokwonay pö Areopako, kïwe Atene kutang kanasayanta Korinto.

²Kïtuyeghö wöloni chi pö Yaudi nyo kikuro Akwila nyo kikïyichï Ponto, nyo kitökungwïno koro Talyan nko korkenyi Prisila, ompöwölo kimwa pöytoghintö Klaudio keyon pipö Yaudi löwïr kïpegha Rumi. Kiwö nyu Paulö kïrutochï chane

³akumpur nko chane akïpöghisyö tïkwïl ompöwölo ki nöpinto emen nyite le chane.

⁴Kïtep kegh ompö asispa Sapato* anka tïkwïl nko chane ompö kö pö saghat* kumukyini kïngwïsu pipö Yaudi nko Krik kïcham kughan ngalechini kyomtoy nyinte.

⁵Nyini kituna Sila nko Timoteo Makedonia, kwamta Paulö kïtenö asis ngölyonto Yeso, akunetöy pipö Yaudi lö, Yeso nyinte nyo le Kristo.*

⁶Wölo otini kipech kumöl nyinte akumwa kïparta terïtyon ompö sïrokachi akïlenchï ompö ngal cho nïkisöch, “Ato opotyekwa ompöwölo mi Tororöt, kï akwane kegh cho onyoru kighechin! Megheghchinanïnye chi. Kïngeta ye kikowan omchinotö pipö punton.”

⁷Kïpïstö chane akïwö kïtöpö nko chi nyo kikuro Tito Yusto, nyo kisoghöy Tororöt, nyo kiriköy kegh konyi nko kö pö saghat.

⁸Kighan Echotyon Krispo nko konyi tïkwïl, aki wowïn pö kö pö saghat nyinte. Kïlïm pikö walaka cho chang ompö Korinto ngölyonto Paulö, akughan, akepatisan.

⁹Kïsïwa oghe anka Paulö ngongut kimwochini Echotyon nyinte lö, “Mewöghisyö ngalananyi, amesis,

¹⁰ompöwölo omitan nko nyi. Möminye chi nyo muköy kwighunyi nyo gha ompöwölo chang piköchan ompö kanasyantanetenyi.”

¹¹Kïlenyona, kumpur Paulö kanasyantanay köny akonga nko aro mut nko akonga, akunetöy pich ngölyonto Tororöt.

¹²Nyini kilïkwï Kalio kirwokinto Akaya, kïngetytï pipö Yaudi Paulö akumït tawu Kalio tökerwokï

¹³kïlentöy, “Kökïnkïn chichï pich kïsagh Tororöt ompö or nyo töghöy kirurut!”

¹⁴Otini kimököy Paulö kïngölonöy, kïlenchï Kalio pïchay pö Yaudi, “Ntö kökïgh nyo kalel anta nyo gha nyï kegh chichï, köterwokwa, we pipö Yaudi.

¹⁵Wölo ato paraku ngal nko kaynötut cho pö kirurutkökwa, omwoghan lö arosa akwane. Molïkunanye mutinto ngal cho lata choni.”

¹⁶Kutulö pïchay köyay pö kirwok.

¹⁷Kïnam chane lapay Sostene nyo kile wowïn pö kö pö saghat, akemungö nyinte köyay pö kirwok. Wölo kimöyangnye Kalio nyonikïny.

¹⁸ Kïkany kïmala ngalechona, kïtöpö Paulö Korinto nko kighönï osis cho chang, atolapay kïpïstö chane akïweghö meli nko Prisila nko Akwila kutang Sirya. Kirwach Paulö mötïnyi kïtomö kïweghö kanasyanta Kenkrea ompö muma nyo kyam ompö tawu Tororöt.

¹⁹Kïpa ntökwit Epeso, kïpökochï wölini Prisila nko Akwila. Kïwö kïlït kö pö saghat akïwechï kïteptep kegh ngal nko pipö Yaudi.

²⁰Kïsagh nyinte kumpur nko chane osis cho chang, wölo kimöchamnye.

²¹Wölo otini kiwetöy kïlenchï chane, “Ato machata Tororöt, orutoghwokwa ngat.” Kïngeta Epeso kïweghö meli.

²²Nyini kitïta Kaysaria, kïpus kutang Yerusalem kutakwes pipö kanisa, atolapay kïwö kutang Antiokia.

²³Kïkany kumpur wöloni osis cho te, kïwö kuwerata koro Kalatia nko Prukia, kukilotoy ompö wöloni kighönï lapay.

²⁴Kitï chi pö Yaudi anka Epeso nyo kikuro Apolo, nyo pö Aleksandria. Ki chi nyo ngöghom, aki chi nyo kinkït kïngalan akipköchinote Kikirut nyoman.

²⁵Kökikenet nyinte ngala Ara Echotyon, kutor kïngalan akunet lasiny ngala Yeso, ompö mïkulöwunyi. Wölo kinkït chichoni kipatisanata Yoana kïpoto.

²⁶Kutor kïngalan ompö nyakanat ompö kö pö saghat. Kïkany kïlïm Prisila nko Akwila ngalechi, kumït nyinte kïwö katangwa akuporchï nyinte lasiny ara Tororöt

²⁷Kimi Apolo kunonöy kwoghyö nanam kutang Akaya, kungarak nyinte cho kighönï cho kimi Epeso kukirchï kighöni cho kimi Akaya kïlenchï, “Atacha nyinte ompö wöloni.” Nyini kitïta, kïlïkwï nyinte kingörokut nyo wow ompö pich cho kisyonchï Tororöt kïsïch kighanat.

²⁸Ompöwölo kilot pipö Yaudi nyoman ompö tawu pich otini kiporchini chane ompö Kikirut lö, Yeso nyo le Kristo.