Read pokoot IGHISYEWUT 20 Bible Online

IGHISYEWUT 20 - pokoot bible

IGHISYEWUT 20

¹Otini kïwïs syalanay, kïkur Paulö kighönï akutuyö, akukil chane. Atolapay kïpïstö chane akïwö kutang Makedonia.

²Kïwö kuwerata woptinechoni akukilotö piko wöloni ompö ngal cho chang. Atolapay kïwö koro Akaya,

³akumpur wöloni aro sömök. Otini kimi kïnöpöy kegh tökïwö koro Sirya ompö ara nanam kunkït lö, mi pipö Yaudi kitötöy kïpar nyinte! Kïlenyona kïmach kïmïla ngat kuwerata Makedonia.

⁴Kïpa pïchï nko nyinte Sapatro wero Piro nyo pö koro Perea nko Aristarko nko Sekunto cho kipkono kanasyanta Tesalonike nko Kayo nyo kingwïno kanasyanta Derpe nko Tukiko nko Tropimo cho kipkono koro Esya nko nyu Timoteo.

⁵Kipa chane tagh akïkanyecha Troa wiki akonga.

⁶Otini kiwonyö Ichon pö Makatin cho puryö Mumar, kengetecha Pilipi kepegha meli ntöket Troa, ki rutogh pö osis mut, kepöghönöcha wölini wiki akonga.

⁷Ato mi nangatuto asispa Sapato,*[1] ketuyecha akemïnchïr makatyanta mesa Echotyon. Kwamta Paulö nyo kogh ntökwit oghö kwen ompöwölo kirutoy ato le asïyech.

⁸Kinöghyegho kitömöw cho chang köyoni pö parak kikïghömechicha.

⁹Kimito karöchïnin nyo kikuro Eutiko nyo kimpuröy tirisya. Kïkany kïngalan Paulö nyo kogh, kïnam rïwöntö Yutiko tya, ato mi löt kïchïnta kïngetunö koto sömök nyo mi parak. Kïpa pich kïsït nyinte kïnyorï kima.

¹⁰Wölo kïröyto Paulö wölini akïnama ewunechi kïpïrchï takat akïlö, “Mosus kegh, tökïsöpöy nyinte.”

¹¹Atolapay kïmïla kïpus köyay akïmïnchïr makatin akwam. Otini kiwany kïngalan Paulö nko chane nyo kogh ntökuwas, kïwechï kegh.

¹²Kumït pïchoni karöchïnintonay kaw kïsöpöy, kigh ngölyontononi chane kïturonchö nyoman.

¹³Kentaghoghacha kepa kelïtöy meli atolapay kepecha Asos, ompöwölo wöloni wölo kikimïtecha Paulö kïwö kïpus meli. Kikimwowecha nyinte lenyoni, ompöwölo kimököy nyinte kïwegho kor nyo tïyame.

¹⁴Otini kikiryamecha nko nyinte Asos, kelangacha meli akepa Mitulene.

¹⁵Kepeghecha meli ompö atoni ntöket Kio asista nyo pö odeny. Ketacha asisto sömök Samo, asista nyo rïptoy ketacha Mileto.

¹⁶Ompöwölo kimököy Paulö kïweghö meli ntökwit Epeso, atömeropunö nyinte nyo kogh koro Esya. Kikuskus lenyoni atökumï kwitï Yerusalem, asispa Pentekoste,* ato töp ntökumuka.

¹⁷Kïyonta Paulö pich ompö Mileto kïpa Epeso kïkur poyi kanisa kipka kuryam nko nyinte.

¹⁸Nyini kitï kïlenchï, “Onkïtökwa wölo kyotöptan atanye kyomitan nko akwa, kïngeta asisini tagh kyatwan koro Esya,

¹⁹lö kyopöghisyan le mötworinto Echotyon, ompö rïngata kegh nko ompö lok cho chang nko työmut cho kyosïkan lïsata pipö Yaudi,

²⁰onkïtökwa lö möminye ngölyon anka tïkwïl nyo kimuköy kungörokokwa nyo kyachïchukan momwowokwa, wölo kyanetakwa, ompö tawu pich nko ompö kestonikwo tïkwïl.

²¹Kyorirchan pipö Yaudi nko pipö punton löwïr lö okötenö ngokikwo amïlonchö wölo mi Tororöt, aghan Echotyontenyo Yeso.

²²Owetan ye nyu otöngöy Yerusalem, ompöwölo oterchinan Mïkulögh nyo Tïlil, kïrkegh monkïtönye ngal cho onyorchinan wölini.

²³Kïpoto onkït nyo porwanïn Mïkulögh nyo Tïlil lö könyanïn rata nko kömpölelyö ompö kanasyan anka tïkwïl.

²⁴ Wölo moyitanye lö kïgh söpenyan atamuk awany pöghisyö nyo kökonanïn Echotyon Yeso agh, nyoni kï kemwatïta Lökoy cho Karamach cho pö pöropcho Tororöt.

²⁵“Kowesteghan kwenunkwa lapay, amtotoy Pöyunöto Tororöt. Ankïtön ye nyu lö mökïmïnye chi akong ompö akwa nyo tökïsïwïyanïn ngat kokay.

²⁶Kïlenyona orirwokwa ompö tawu Tororöt asisete lö ato töp chi ompö akwa ntökupot, kïmotïngönye kigheghchin.

²⁷Ompöwölo kyomwowokwa ngal lapay cho mököy Tororöt.

²⁸Akamana kegh arip, apagh kechiryo Tororöt cho kökonokwa Mïkulögh nyo Tïlil ayakwïya. Alïkwï mösöw cho pö kanisa Tororöt nyo kyala nyinte kisönko Werïnyi.

²⁹Onkïtön lö atowan kulungokwa suyï cho köromöch, amesyonchinicha okwot pö kechir.

³⁰Itu osiswö cho ngetöy pikökwa cho omitö tïkwïl kïmïröy putintön atökumït kighönï kïrïp chane.

³¹Otïpï kïpsach, anan lö kyanetakwa lapay ompö lok cho chang nangat nko pöghet ompö könyis sömök.

³²“Kïlenyona, opïsinökwa ye nyu ewuno Tororöt nko ngölyonteto kisyonötenyi, nyo muköy kïtekokwa akïkonok kisyonöt nyo rorchini pikachi lapay.

³³Kimopïrchanye ropïyeni pikö walaka anta koltin, anta sïro.

³⁴Ankïtökwa akwane lö kyopöghisyeghan ewunechan chete atonyorï möchutköchan kegh nko cho pö pich cho kyomitan tïkwïl.

³⁵Kyoporwokwa ompö tïkwïn lapay lö ato opöghisyekwa le ani, kïmïchini angaraka pich cho nyörkölöle, akïkaram anana ngölyonto Echotyontenyo Yeso nyay kimwa nyinte lö, ‘Mi ngörekyö nyo wow otinö kakitötö kïsir ketach.’ ”

³⁶Nyini kiwany Paulö kïngölonöy, kïkïtïng nko chane lapay akïsagh.

³⁷Kïlokyö chane lapay otini kimi kukonköyöy nyinte ompö chomnyogh nyo wow, akïmwochini nyinte lö wow sörö.

³⁸Kisïch chane nyarïl tya ompö ngölyontonay kömwochï chane lö, mökïsïwïyicha chane nyinte ngat. Kumïtata kegh nko nyinte ntökïlany meli.