Read pokoot IGHISYEWUT 23 Bible Online

IGHISYEWUT 23 - pokoot bible

IGHISYEWUT 23

¹Kuchirchï kong Paulö pïchay mi Kokwö* akïlö, “Tupchenichu! Möwiranïnye choghïn nyo gha ompö tawu Tororöt ompö nyete le asisete.”

²Kïmwochï Anania nyo le Tïsin nyo Wow* pich cho kighyongo atolekïtö Paulö lö, arapaka nyinte kut.

³ Kïlenchï Paulö, “Nya kurapakinyi Tororöt, nyi nyo ilata nayat nyo kikïnyïra choka! Ketöponenyi atoni irwokwanïn kïrïp kegh nko kirurut, akwanyï inyorenyi kirurut imwochini pich kurapakanïn.”

⁴Kïlenchï pïchay kighyongo atolekïto Paulö, “Kechïpönyi Tïsinto Tororöt nyo Wow.”

⁵ Kuyokyï Paulö lö, “Kömonkïtönye tupchenichu lö, kö Tïsin nyo Wow, ompöwölo lentöy Kikirut, ‘Mengalana nyo gha pöytoghinteto pikökwo.’ ”

⁶ Nyini kinkïtï Paulö lö, Sadukaytin* walaka kï Parisaytin* walaka ompö pïchoni, kïngölonchï Kokwö ompö kut nyo wow lö, “Tupchenichu. Ochan Parisayon, nyo le wero Parisaytin. Kakirwokwanïn ompö yi ompöwölo okönan lö, tutu asïyech pich cho kikïmeghö.”

⁷Nyini kiwang kïmwa lenyoni, kutor kïsyal Parisaytin nko Sadukaytin, akïpesyö.

⁸ Ompöwölo lentöy Sadukaytin metutucha pich akï puryö malayken anta oy. Wölo ghönöy Parisaytin choni löwïr kï sömök.

⁹Kïtasa syalanay kïyetï, kïnget koneti kirurut walaka cho pö okumpö Parisaytin kughyö akïghetisyö lö, “Möminye kïgh nyo kalel chichï manan köngölonchï nyinte mïkulögh anta malaykayan köny?”

¹⁰Kïwowit kimölötonay tya ntökuwöghisyö yetïnay lö, töptoy pöröy tuyononi Paulö. Kïlenyona, kïmwochï askarinechi lö, oröytenö ape amïtuna Paulö, kungwïna kwenungwa, amït nyinte kïwö kö pö soch.

¹¹Kughyongö Echotyon oghononi ato kilekïto Paulö akïlenchï, “Inyakanitï! Ompöwölo kïle wölo kesöwintönchaninyi ompö yi le Yerusalem, kïmïchini söwintönchaninyi lenyoni ompö Rumi tïkwïl.”

¹²Kïtuyö pipö Yaudi walaka ompö asis nyo kirïptoy akuwalwal kegh ompö tawu Tororöt lö, “Mökyomisïyechanye anta kïgheghsyö tökïtenö ketïghöcha Paulö.”

¹³Kitïlöy, tömönut angwan pïchoni kituyö akitat ngalechoni.

¹⁴Otolapay kïpa wölo mi tïsï cho echön nko poy akïlenchï, “Kakewawalacha kegh löwïr lö mökyomechanye kïgh nyonikïny tökïtenö keparacha Paulö.

¹⁵Kïlenyona ye mwochinö nyo le nyi nko pipö Kokwö atetepa yetïnay kumïtï kungwïn wölo omitekwa aghakwa kegh le ato oyörekwa okïte lasiny ngale walaka ompö nyinte. Wölo kïmicha nyu atoni kïpsach keköngöy nyinte atökepara kïtomö kïrikï wölo omitekwa.”

¹⁶Wölo kïlïm karöchïnin nyo le mamato Paulö ngalechoni mwoghöy, kïlenyona kurïp kutang kö pö soch akïmwochï Paulö.

¹⁷Atolapay kïkur Paulö wöwïn pö askarin akïlenchï, “Mïte karachïnintonï kïwö wölo mi pöytoghintö nyo wow, tïng ngölyon nyo yöröy kïmwochini nyinte.”

¹⁸Kumït yetïnay weray kïwö wölo mi yetïnay wow akïlenchï, “Kökuranïn chichay ratate le Paulö akïlenchanïn mïta karachïnintonï wölo imitenyi ompöwölo tïng ngölyon nyo yöröy kïmwowunyi.”

¹⁹Kïnam yetïnay karachïnintonay egh akumït ato le yona, akïlenchï, “Ne ngölyonte nyini imökenyi mwowanïn nya?”

²⁰Kïlenchï, “Köchomnyechï wowïntino pipö Yaudi lö pkonöy kïtepïnyi asïyech kemït Paulö tawu Kokwö le nyo kötomököy Kokwö kïtepo nyinte ngale walaka lasiny.

²¹Wölo meterchï chane, ompöwölo mi pich cho tïlöy tömönut angwan cho ghïpchot kusyepöy nyinte. Kikuwalwal kegh chane lö momisïyicha anta gheghsyö tökïtenö kepar Paulö. Mi chane ye kïpsach tökwigh ngölyontononi, akïmi kïköngöy ngölyon nyo ngwïno wölo imitenyi.”

²²Kïlenchï yetïnay wow karachïnintonay, “Memwochï chi ompö akonga lö, kemwowaninyi ngalechï. Atolapay kïlenchï, ‘Wïyö.’ ”

²³Atolapay kikur yetïnay wow yetïntin odeny cho rïpöy nyinte akïlenchï, “Akanya kïnap kegh askarin cho le 200 atökïpa kutang Kaysaria nko walaka 70 cho pegho angoletin nko 200 cho pö ngötwö, anap kegh atangeta satïn sömök nyo pö soya oghö.

²⁴Akïmwochï kïyörchï Paulö angoletin cho kiwegho, atökemït nyinte kwit wölo mi pöytoghinto Peliki nyo karam.”

²⁵Atolapay kukirchï pöytoghintonay wow palalyan kïlö,

²⁶“Takwes, we pöytoghin Peliki nyo konyïtote, ani Klaudio Lisia nyo kakir palayantanï.

²⁷Kinam pipö Yaudi chichï, akilekït kïpar chane nyinte. Onkïtwan lö chi pö Rumi nyinte, kïlenyona owan nko askarin osörï nyinte.

²⁸Kyomökan nyu onkïtune lö ne nyo kirwokyineghö chane nyinte, kïlenyona amïtan kïwö Kokwengwa.

²⁹Kïpköchanïn nyu lö kitöpö kokwe kimölöto kirurutkökwa walaka kimasïwanye kïgh nyo kimïchini chichï kepar anta kerat.

³⁰Kïkany kemwowanïn lö mi pipö Yaudi walaka kusyepöy nyinte, cho kimököy kïpar, amutan lö nya oyokwan nyinte kungwïn wölo imitenyi. Kyomwochan pich cho kirwokini nyinte kwipï kirwokengwa wölo imitenyi.”

³¹Kumït nyu askarin Paulö kïle wölini kikiyomïstö. Kïyotï Paulö akumït oghononi kïwö Antipatris.

³²Kïkany kïyech, kïmïlisyö kö pö soch askarinechay kipegho kelyön, kïpïstö chay pö angoletin kïpa nko nyinte.

³³Kumït kïwö Kaysaria, akutö pöytoghintonay palalyante, akwonkoghchï nyinte Paulö.

³⁴Kusomön nyu pöytoghintonay palalyantanay atolapay kïtepa Paulö kore wölo kingwïno. Nyini kinkïtï lö ki chi pö Kilikia,

³⁵kïlenchï, “Oteran ngaleku asïyech atonkïtwan kini keghanyi otini ketï pïchoni kirwokunyi.” Atolapay kïmwatïta keripö Paulö kö pö Erode nyo pö kirwok.