Read pokoot IGHISYEWUT 27 Bible Online

IGHISYEWUT 27 - pokoot bible

IGHISYEWUT 27

¹Kïkany kemut ngal lö mïchinecha kepe ketanga koro Talyan, ketö Paulö nko pikö walaka cho kirötote mori yetïn pö askarin nyo kipö lïko Aukusto nyo kikuro Yulio.

²Kelangacha nyu meli nyo kingeta Adramutio, nyo kïwetöy kuwerotoy kanastin cho kimi sörömu nanamtina koro Esya. Kimito chi pö Tesalonike nyo kikuro Aristarko nyo kingwïno Makedonia nko acha.

³Ketacha asis nyo pö odeny Sidon. Kusyonchï Yulio Paulö ompöwölo kipïsï nyinte kïwö wölo mi kongotichi, atökïnyorï kingörokut ompö chane.

⁴Kengetecha atoni ompö meli kepa keghöpunö kegh Kupro ompöwölo kikutuno tawuncha yomat.

⁵Kyoghyecha nanampa Kilikia nko Pampulia, ketacha Mira nyo le kanasyanta Likia.

⁶Kïnyorchï wöloni yetïnay pö lïko pich 100 meli nyo pö Aleksandria nyo wetöy Talyan, kulangecha melinay.

⁷Kepeghecha meli pampa mut ompö osis cho chang, töketacha kanasyanta Nido ompö kömpölelyö nyo wow. Kimökïpïswechanye yomonay kenacha nyonikïny ketanga tagh, kïlenyona kepeghecha meli keröytö wölo kimïnïng yomat, kechapata kor nyo kiluch pögh nyo kikuro Krete, nyo kipoyö nko Salmone.

⁸Keweracha ompö kömpölelyö sörömu nanam töketucha ato kïkuro Lukway cho Tïpisot melinö nyo karam, nyo kilekïtö kanasyanta Lasea.

⁹Kempuröcha atoni osis cho chang, tökïtenö kïrumï akïlïkwï tapan ompö rutoghtöncha nyo pö nanam, ompöwölo kökikuwer Asis nyo kikinono lastaghpa ngokï. Kïlenyona kurur Paulö pïchay lö,

¹⁰“Wechara, osïwïyan lö ghöyitu rutoghtöncha kïngeta yeteyi amelö meli onkït, anta tïkwïn cho mi ori, wölo ompö söponwecho tïkwïl.”

¹¹Wölo kïrïp yetïnay ngala chi pö meli kïsir ngalechay kömwochï Paulö chane.

¹²Akwompöwölo kimökaramnye ketïpï onkunoni ompö osiswo kaghïtan, kimwa cho chang ompö pïchay lö karam kïpa gha chane atoni kutang pögh kwen, tökumukyï kwit koro Poinike atomuka, atökumï kïtïpï wölini osiswo kaghïtan. Wölini le Poinike kï ki luchpa Krete nyo pörtoy wölnötoka akï wölnö le ta nko wölnö porö akï okumpö kongasis.

¹³Kinya kutor yomöt nyo kikutuna wölo porö kungwïn mut, kïlenchï kegh pïchay, kimuköy kepete le wölo kökakunanta chane. Kïpa kïrich sörömu nanampa Krete lasiny.

¹⁴Akitökïnyini lawel kïkutï yomöt nyo awes tya, yomöt nyo kingwïno ewu löt nyo pö okumpö kongasis kikutï kïrökunö koronay mi pögh kwen.

¹⁵Kïwïs melinay, kïkany otini kïmökumukanye kep melinay wölo ngwïno yomonay, kïmeghecha mu, kepïstecha kïwö kwipsötö yomöt.

¹⁶Kenyorucha wölo kïghïpo otini kikiweracha okuntö wölo toka nyo pö kor nyo le kite nyo kiluch pögh, nyo kikuro Kauda. Kemukacha ompö wöloni kerat melinay mïnïng ompö kömpölelyö.

¹⁷Kïsyol kutoch akutö meli parak, kutö pörköyi melinay wölo porö kukich. Kimi kuwöghöy lö, tömökichutech ngayama sörömu nanampa koro Lipya, kïlenyona nyu kureyteghö ananka akïpïsï yomonay kwip melinay kutang wölini kömököy.

¹⁸Kïkut yomonay ompö owesyö asista nyo kirïpöy kutor kïlasta tïkwïn cho kikösönöy.

¹⁹Ato mi asista nyo kirïpöy kïwirta pïchay tïpö meli cho lata pörköy, anankis nko pïrompur kïwirchï pögh.

²⁰Kimökïsïwechanye asis anta kokel ompö osis cho chang, kitasa yomöt kïkut ompö owesyö. Ato mi löt, kewutyeghecha söpon.

²¹Kïkany kuwany osis cho chang cho mamnye kïgh pïchoni, kughyongö Paulö tawungwa akïlenchï pïchay, “Wechara, ntökaterakwa ngalechan kötömökïngetunonechanye Krete, kötökïchïwïtonecha wïrat nyo teno nyï tïkwïl.

²²Wölo omwowokwa ye nyu lö, osïkö mïkulögh! Ompöwölo möminye chi nyo le ompö akonga nyo meghöy ompö akwa, poto meli nyo potöy.

²³Ompöwölo kengwïnchanïn amïna malaykayanta Echotyon, nyo pöywanïn akï nyinte nyini osoghan,

²⁴akïlenchanïn, ‘Mewöghisyö Paulö! Ighyongonenyi tawu Kaisari akikïkoninyi Tororöt ompö kisyonötenyi söponwo pïchï löwïr rutoy nko nyi.’

²⁵Kïlenyona pikachu, osïkö mïkulögh. Ompöwölo oghönan lö, itïtoy ngalechini kalïman Tororöt le chini kamwa nyinte.

²⁶Wölo ipecha yomöt kepete kor nyo kwenote pögh.”

²⁷Kïkany kwitïta ogheto taman nko angwa, otini kitökïyumtonecha yomonay kepe wöl nko wöl ompö nanampa Kwen. Ato mi oghökwen, kïngom pïchay pö meli lö, kakïrich chane kor.

²⁸Kïlenyona kïwirta kïgh nyo kinkïtuno koghïn pö pögh, kïlïkwï miten 40 kwit to, kïpa tagh kite, kïwirta pörköyonay ngat, kïlïkwï miten 30 kwit to.

²⁹Kwotyö pïchay lö manan kutöy ana yomonay melincha tökïwir ghatoy, kïlenyona kureyteghö lötuto melinay kömöy angwan ighöy meli kughyö akïsagh lö töyech wey!

³⁰Kumukyï pïchay pö meli lö kïryögho melinay, kureyteghö melinay mïnïng kïlït pögh atolapay kwigh kegh le pich cho petöy kïwirtoy nïkisïntine walaka ompö melinay wölo le tagh.

³¹Wölo kïlenchï Paulö yetïntonay pö askarin, “Ato töp tökïpegha pïchï meli ori, kïmokönö söpon.”

³²Kïpechï nyu askarin kïmut pörköyichay könömöy melinay mïnïng akïpïstö kïweghö pögh.

³³Nyini kiwas, kïlenchï Paulö pïchay löwïr, “Ngwangwa omisyenö ompöwölo kapekwa kwïle osis taman nko angwa, akïtomönye amakwa kïgh nyonikïny.

³⁴Nyo osomokwa ye nyu lö omisyenö, ompöwölo nyoni nyo ripöy söpontönkwa. Möminye kïgh nyo swongokwa nyonikïny.”

³⁵Kïkany kuwany kïngalan, kïcheng Paulö makatyan akutö Tororöt sörö ompö tawungwa lapay, akïmïnchïr akutor kwam.

³⁶Kïsïch pïchay mïkulögh kwam chi anka tïkwïl ompö chane omisyö.

³⁷Kikïchicha lapay cho kikïmitö melinoni 276.

³⁸Kïkany kuwany chi tïkwïl kwam omisyö kipïghyö, kïlösï nkanun nanam atökïkwïskwïsit meli.

³⁹Nyini kipusï asis, kïmökïpköchïcha pïchay pö meli koronay, wölo kïsïwa ato le ngoyomwö nyo mi sörömu pögh, kunan lö atomuko kïkaram kep melinay kuwit atökughyöngö wölini.

⁴⁰Kïmutïta pörköyichay körötöy melinay kïlïtöy pögh, akïpechï kuriy ket cho kirötyini lötu meli tökep kiweghö pögh. Atolapay kïsyol anankanay kötöy yomöt atö kïwö meli, kïpechï kegh kutang sörömu nanam.

⁴¹Wölo kwitïta ato kinyoryeghö nanamtina odeny, kïpïstö melinay kïlït ngoyomwö, akïnam melinay wölo le tagh ntökïmökumïnye kiwö, kiwechï wölay le löt kïmïromïrö ompö mïltaghata kegh nyo pö pögh.

⁴²Kïmach askarinechay kïpar pïchay rötote löwïr, atömötöp tökïchïwït nyo le ompö akonga otini lentöy owegho pögh atoghyö sörömu nanam.

⁴³Wölo kimököy yetïnay pö lïko 100 kïsöru Paulö, kïlenyona kïtagha chane. Kïwechï kuchikyï pich löwïr cho nkït kïpegha pögh kusikyï pögh tökïwïr akïpus kor nyo tïyame.

⁴⁴Kïrïp chunö köngötï kïnamata ngötunön pö meli. Are nyoni onkït nyo kimuköy töketu kor nyo tïyame kïtokesöpsone.