Read pokoot IGHISYEWUT 28 Bible Online

IGHISYEWUT 28 - pokoot bible

IGHISYEWUT 28

¹Nyini kikïchïwïtyeghecha nanam aketïk kor wölo tïyame, kenkïtucha lö kïkuro korononi kikwen pögh, Malta.

²Kïnamenecha piko korononi kongot nyoman. Kinoghwecha ma, akïtakecha lapay. Ompöwölo kökikutor kïropan akïkaghïtit.

³Akwotini kimi Paulö kïrïngöy kwen atökutö nökögh, kungwïna moroya kwenchay ompö kilayata ma, akïnanagh ewunyi.

⁴Kïsïwa pïchay pö koronay kïyïsö moroyonay ewu Paulö, kïmwochï kegh lö, “Kipörisyö chichï nyoman, wölo kïrkegh kachïwïta nanam, wölo möpïsininye manpa Tororöt kïsöp.”

⁵Wölo kusösokï Paulö moroyonay ma amedanye kïgh nyinte nyonikïny.

⁶Kikönöy lö kutu portanyi, anta wir ngwïny lawel akïma. Kïkany kïkönyisyö nyo kogh amökïsïwa Paulö kuchir, kïwaghach kinonutyengwa akïlö, “Chichete kï tororöt!”

⁷Kimito atolekïtö atoni pareni wowïnto korononi kikwen pögh nyo kikuro Puplio. Kïtakecha nyo karam, kelïkucha toyechi osis sömök.

⁸Kirïwöy papoto Puplio pöröy kyamate tïnyon, akuyitoy kisön. Kïlït Paulö konyi akukanagh ewunechi parakunyi akïsagh, kïsöp nyinte.

⁹Kïkany kusop lenyoni, kïpkana pich löwïr koronay cho kichirsot, akesop.

¹⁰Kïropkecha tïkwïn cho chang, kïkany kengetenacha meli, kutö melinay tïkwïn cho kikïmökecha ompö rutogh.

¹¹Kikimpuröcha atoni aro sömök, atolapay kepeghecha meli nyo kingwïno Aleksandria, nyo kingwïn kïpöghön atoni ompö aroyo kaghïtan. Kikuro melinoni, “Tororötin cho le Sala.”

¹²Ketacha kanasyanta Sirakusa, ketïpicha atoni osis sömök.

¹³Kengetecha atoni ompö meli kerelöcha kanasyanta Rekio. Kutor yomöt nyo kikutuno okumpö tagh asista nyo kirïptoy, ketucha asisto odeny kanasyanta Puteoli.

¹⁴Kenyorucha pich cho le kighönï, kelïkucha toyekwa ompö wiki akonga. Nka nyoni nyu wölini kikïpkantecha ntöketï Rumi.

¹⁵Kïkany kïlïm kighönï cho kimi Rumi lö kïpïnucha or, kïpka ntökwitï Donyo Apio nko Korïn Sömök cho pö To kïtorokecha. Nyini kïsïwa Paulö chane kïsal Tororöt akïsïch nyakanan.

¹⁶Nyini kikitacha Rumi, kepïsï Paulö kïtöpö onkït nko askaryon nyo kiripöy nyinte.

¹⁷Kïkany kumpur Paulö osis sömök, kïkur kintöghoghi pipö Yaudi cho kimi wöloni kïpka kokwö. Nyini kituyö pïchay, kïlenchï, “Werköcho! Kïrkegh kimaghanye kïgh nyo kichuniö nko piköcho anta otöptinecho cho kikïnyorchï papotïnecho, Kï kitötanïn pipö Yaudi kïratanïn pipö Rumi ompö Yerusalem.

¹⁸Kïkïtenanïn ngal tökïmach kutyakanïn, ompöwölo kipköchï lö, kimaghanye kïgh nyo kimïchini ketïghenanïn.

¹⁹ Wölo nyini kitagh pipö Yaudi ketyakanïn, kïmasïwanye nyu or anka kïpoto orirchan pöytoghin. Amelö ompöwölo kyotïngetan kïgh nyo orwokyinegho piköcho.

²⁰Nka nyoni katepan onyorwokwa atangalan nko akwa, ompöwölo kakïratenanïn sïrïmnyontonï ompö nyinte nyini le kikönöto pipö Israel.”

²¹Kïlenchï pïchay, “Tomönye kesïköcha palalyan nyo ngwïno Yudea nyo poru lö ichinyi lelate, akïtomönye kelïmacha ngal chonikïny ompö kighönicho cho pkono wölini, anta mwa ngölyon nyo gha ompö nyi.

²²Wölo kïmökecha kelïme wölini inontonenyi nyinte, ompöwölo kinkïtöcha lö taghate pich lapay tuyononi le nyengu.”

²³Kïkany kïchomnyechï asistangwa, kïpka pich cho chang wölini kimöngöy Paulö. Kïngalan nko chane ngala Pöyunöto Tororöt ompö tatat kïngeta otini kiyech ntökwimön. Akumukyï lasiny kupurchï chane lö tökïpköchï lö ki pö man ngalechoni kimwochini nyinte chane ompö paraku Yeso, otini kineto chane Kirurut pö Musa nko ngala werkoy.

²⁴Kïcham walaka ompö chane ngalechi, wölo kimemïcha walaka tökughan.

²⁵Kïnget kïpa akïmi kumölöy kegh achane, otini kökikuwang Paulö kïmwochï chane ngölyon akonga nyo kilö, “Nkïchï nyoman nyay kimwochï werkoyon Isaya papotïnekwa ompö owesyo Mïkulögh nyo Tïlil!

²⁶Ompöwölo kimwa lö, ‘Wïyö ailenchï pïchï, “Oterekwa alïm, wölo möpköchinokwanye. Orosekwa asïwa, wölo monkïtunekwanye.”

²⁷Ompöwölo kimeghö mötöwö pïchï, akïmingote yitikwa, amökurostonye konyikwa. Ompöwölo kötösïwïyi konyikwa akötölïmöy yitikwa akötöpköchini ompö mötöwekwa akötemuköy kïmïlonchot wölo omitan atosopön chane.’ ”

²⁸Kuwany nyu Paulö kïlenchï, “Onkïtunö ye nyu lö, kakeyonta ngölyonto Tororöt nyo pö sörunöt kutang pipö punton. Lïmöy chane!”

²⁹Nyini kiwany Paulö kïmwa lenyoni, kumölomöl kegh pipö Yaudi nyoman.

³⁰Kïmang Paulö könyis odeny kö nyo kighoktoy nyinte, akïtach pich lapay cho kipka kuros nyinte.

³¹Kyamta ngala Pöyunöto Tororöt, akunet ngala Echotyon Yeso Kristo,* kïngölonöy ompö nyakanat, akimökïminye chi nyo kitagha nyinte kwomchï pich ngala Tororöt.