Read pokoot IGHISYEWUT 5 Bible Online

IGHISYEWUT 5 - pokoot bible

IGHISYEWUT 5

¹Kimito chi nyo kikuro Anania nko korkenyi Sapira, nyo kyalta kareranto tïkukwa,

²wölo kuchuchuk ropïyeni walaka nko korkenyi, akwip cho mi ori kïwö kutö kiyoktoghï.

³Wölo kïlenchï Petro, “Ompö ne nya Anania tepïsinönyi Onyöt kipöyï mïkulöwungu ntelïsanyi Mïkulögh nyo Tïlil, aichïchukanyi ompö sison kareranto ropïyeni cho kesïkenyi par?

⁴Otini kitomönye kyalta kï kinyengu, akwotini kyaltenyi kï kipöyunenyi. Kwompö ne nyu tepïsinönyi mïkulöwungu kwigh kïgh nyo lata nyï? Melïsanyinye pich wölo kelïsanyi Tororöt.”

⁵Nyini kilïm Anania ngalechoni kupït akïma, kwotyö pich lapay cho kilïm,

⁶kïpka pich cho le chumwak, akïnanagha portanyi ananka, akïsït sany kïpa kïtïp.

⁷Kïkany kuwer satïn cho lentöy chi mu sömökï, kïlïtï korkenyi, akimenkïtnye kegh nyo kigha.

⁸Kïlenchï Petro, “Mwowante lö, tenö chete ropïyeni cho kalteghekwa parenkwa?” Kïlö, “Owöy, tenö choni.”

⁹Kïlenchï Petro, “Kötöptö onö tochomnyechinökwa kwodeny atyama Mïkulöwu Echotyon? Achona pïchay kapa kïtïp pontengu mi kukat ye, pkonöy chane kïsïtinyi tïkwïl.”

¹⁰Panini lawel kupïtyï ngwïny otini le kelyechi akïma. Kïlïtï chumwakchay kutomï kima, kïlenyona kïsït sany akïpa kïtïpchï kamasuto santenyi.

¹¹Kungwïnchi mïghötö kanise kïmïkul nko pikö walaka cho kilïm ngalechoni kighisyö.

¹²Kwigh kiyoktoghï kiporunöt nko töngönchin ompö kwenu pich. Kinyoryeghö kighönïchoni körköru Solomon ompö machat akonga.

¹³Kimöminye chi nyo kitomönye kughan nyo kïlït nyoryononi, wölo kikonyït pich löwïr chane.

¹⁴Kitösisyö kïtösisyot tya kighönï cho chang ompö nyoryononi, cho le mïrön nko kor cho kighan Echotyon.

¹⁵Ntökumïtï pich cho chirsot kïpa ortïn, akumïkonchï chane men nko rïpkay tömanyïl otini weröy Petro kïswangata rurwenyi pïchoni walaka.

¹⁶Kïpkana söpïchis kanastin cho kilekïto Yerusalem, cho kipu pikökwa cho kichirsot nko cho kipote oy. Kesop chane lapay.

¹⁷Atolapay kïnget Tïsin nyo Wow* nko kongotichi cho kile pipö Sadukaytin* kwipö sikong kiyoktoghï. Kïlenyona kïmach kwighchï chane kïgh nyo gha.

¹⁸Kïnam kiyoktoghichay akïtorchï chela.

¹⁹Wölo kïyat malaykayanta Echotyon kukoti chela oghö akumïtï chane kïpka sany, akïlenchï,

²⁰“Ape oghyongenö Kö pö Tororöt,* amwochï pich ngal lapay cho pö Söponï.”

²¹Kïkonyït kiyoktoghï ngalechay, akïpa kïlïtöy Kö pö Tororöt kiwasan akutor kunetisyö. Kïlenyona kïnget Tïsin nyo Wow nko cho kimi tïkwïl, kïkur Kokwö* nko poyi Yaudi löwïr, atolapay kïyonta pich kïpa chela kumïtï cho kiyoktoy.

²²Wölo otini kitïta askarinechay, mökïnyorïcha chane ompö chela. Kïmïlonchö nyu akïmwa lö,

²³“Otini kakitïtecha chela ketomtecha körote kukoti lasiny, akimito ripï kughyongo kukotichay, wölo nyini kakïyatacha kukotichay kïmökïnyoruchanye chi ompö ori.”

²⁴Nyini kilïm ngalechoni yetïn pö ripi Kö pö Tororöt nko tïsï cho echön, kïtöngönchï lö ne kïtö nyini kegha.

²⁵Atolapay kungwïn chi kïmwochï chane lö, “Mi pïchay kotorchikwa chela kughyongo Kö pö Tororöt, akunetöy pich.”

²⁶Kïwö nyu yetïnay nko askarinechi kumïtï kiyoktoghï, amelö ompö kichiköt ompöwölo kiwagh lö, wiro pich chane koghïn.

²⁷Akwotini kikimïtï chane, ketö chane kughyongö tawu Kokwö. Kïtep nyu Tïsin nyo Wow chane

²⁸ lö, “Kolentan kikïmwowokwa lasiny lö, monetisyeghö kaynata chichï, wölo arose kini kaghakwa! Köghömï Yerusalem kïmïkul kinetutyenkwa, ayörekwa omwoghe lö acha cho kikighyongchï meghenyi.”

²⁹Kuyokyï Petro nko cho kiyoktoghi walaka lö, “Mïchinecha kekonyïtö Tororöt, kïtïl pich.

³⁰Kigh Tororöt pö papotïnecho Yeso kututï ompö ngwen, nyinte nyo kyowïdochikwa kimurtöwon apar.

³¹Kisyol Tororöt nyinte kïtöpö ewunyi okumpö tagh, kïlïkwï kintöghoghin nko Ghetin. Atökutö pipö Israel pöroyïn nyo kötegho ngokikwa akelöstoghchï chane.

³²Akechicha söwiko ngalechete acha nko Mïkulögh nyo Tïlil, nyo kikonï Tororöt kutö pich cho ghönöy nyinte.”

³³Nyini kilïm lenyoni, kusïnyorisyö akïyar kïpar kiyoktoghï,

³⁴wölo kïnget Parisayon* akong, nyo kikuro Kamaliel nyo kile konetinto kirurut, nyo kikonyïtöy pich löwïr, kïlö, “Akanye kïpa pïchï sany kite,”

³⁵atolapay kilenchï Kokwonay, “Mïrönchï pö Israel, orip kegh lasiny ngala pïchï kïtomö amuta kïgh nyo odoy chane.

³⁶Ompöwölo kikonï kegh Teuda osiswe walaka cho kikuwer, akïlö ochï chi nyo wow, kïrïp nyinte pich cho ngata 400. Wölo kepar nyinte aketoyö pikachi, akïlïkwï kwïle.

³⁷Kïrïpta chichoni Yudas nyo pö Kalilaya ompö osis cho kikiyitöy pich, kïrip söpïch nyinte, kïma nyinte, aketoyö tïkwïl cho kirïpöy nyinte.

³⁸Kïlenyona nyu, omwowokwa ye lö, amalena kegh pïchï. Opïstenö chane, ompöwölo ato pö pich ngalechï anta pöghisyonï, kupotöy lö weng,

³⁹wölo ato ngwïno wölo mi Tororöt, kïmomukekwanye ntarinta. Atömötöp ntökïrumï lö omitekwa omölöy Tororöt!”

⁴⁰Kïrïp Kokwonay ngalechay, kekur kiyoktoghï akemuny, atolapay kemwochï lö, mangalanena ngat kaynata Yeso, akepïstö chane kïpa.

⁴¹Kïngeta kiyoktoghï Kokwö nko ngörekyö nyo wow, ompöwölo kisïwa lö, mïchini kuwongunö chane kaynata Yeso.

⁴²Akimösisyöcha chane asis anka tïkwïl kunetisyö ompö Kö pö Tororöt nko kori pich, kwamta Lökoy cho Karamach lö, “Yeso kï Kristo.”*