Read pokoot RUMI 1 Bible Online

RUMI 1 - pokoot bible

RUMI 1

¹Kakiran palalyantanï Paulö ante mötworinto Kristo* Yeso, nyo kikekurön alïkwï kiyoktoghin* akelöwon kwamta Lökoy cho Karamach cho pö Tororöt.

²Kiyomisï nyinte könyisyok kuwerï werkoykachi, kïle ato kirate ompö Kikirut cho Tïlilöch.

³Ngölono Loköyechï Wero Tororöt akï Echotyontenyo Yeso Kristo nyo kikïyï ompö ara Daudi.

⁴Kikiporï lö wero Tororöt nyinte kegh ompö owesyö Mïkulögh nyo Tïlil otini kitutunö nyinte ngwen.

⁵Kikonanïn Tororöt pöropchö ompö Werïnyi alïkwï kiyoktoghin atamukan ontöghoghchï pipö Punton löwïr kughan akïterchï nyinte ompö.

⁶Ochikwa tïkwïl löwïr cho kikurok Tororöt alïkuna pipö Yeso Kristo.

⁷Kakirwekwa nyu löwïr cho omitö Rumi cho chömok Tororöt akikïkurokwa alïkuna pikachi kegh: Nya kïkonokwa Tororöt Paponyo nko Echotyon Yeso Kristo pöropchö nko kalya.

⁸Nyo pö tagh, oyokyinan sörö Tororötïnyan ompö Yeso Kristo akwompö akwa löwïr, ompöwölo kighomï ngwïny kïmïkul ngala kighanatenkwa.

⁹Söwintenyan Tororöt lö nyo opöghisyechinan ompö mïkulöwunyan kïmïkul, otini omtonan Lökoy cho Karamach cho pö Werïnyi, lö ononokwa kïnomnyö ompö sowutköchan.

¹⁰Osoghan ato machata Tororöt kïkonanïn ye pöroyïn orutowokwa.

¹¹Ompöwölo otïngetan emö nyo wow nko akwa, angwïn ochöghwokwa ropöwo mïkulögh cho muköy kukilokwa.

¹²Kikilecha kegh nyu achane, kilokwa kighanatenyan kukilanïn nyinkwa.

¹³ Omökan onkïtunekwa tupchenichu lö kikyatatan kïnyïl cho chang orutowokwa, wölo kïratanïn kïgh nko nyete le ye. Omökan otu wöloni atomchï pich kughan Kristo le wölo kighanta puntoni walaka.

¹⁴Ompöwölo otïngetan ghosyö omchï punton löwïr cho kikulet nko cho tomöcha, cho ngöghomöch nko cho le sölwöy.

¹⁵Nka nyï opïrchinan angwïn omwokwa tïkwïl Lökoy cho Karamach Rumi.

¹⁶ Mololïyönchinanye Lökoy cho Karamach, ompöwölo nyoni kï owesyo Tororöt nyo söru pich löwïr cho ghönöy, pipö Yaudi nyo tagh nko pipö punton tïkwïl.

¹⁷ Ngongu nyu Lökoy cho Karamach or nyo yityinegho Tororöt pich man ompö tawunyi. Aranoni kï kighanat akï kighanat ntökwit söröm. Kïle wölo mwoghöy Kikirut, “Söpöy chi nyo kikuyityï Tororöt man ompö ara kighanat.”

¹⁸Kikengongwï nörekyo Tororöt ompö yïm ompö paraku ngokï nko ghöyityo pich, cho tïpöy man ompö ighisyewutkökwa cho ghach.

¹⁹Ne nyo menkïtnye chane ompö paraku Tororöt, akwanyï kikuporchï kegh Tororöt chane.

²⁰Kïngeta towunöto ngwïny, kipköchï pich lötok owesyo Tororöt nyo pö kokay nko Tororötnötenyi kïrkegh nyo mösïwïyinye chi ompö kong, wölo kirumu ompö tïkwïn cho kigh nyinte. Kïlenyona mötïngnye pïchoni kïgh nyo gheto kegh kigheghchin.

²¹ Nyoman kinkït chane lö ngo Tororöt, wölo kimökonyïtnye nyinte le wölo keroko kekonyït Tororöt anta ompö kïyang kuyokyï nyinte sörö. Nyinö kötö ighöy lenyoni, kïwöghökisyö kinonutkökwa kïlïkwï kwïle ntömökunan lenyini keroko.

²²Lenchini kegh kïchï ngöghomöch, akwanyï sölwöy.

²³ Nyinö kötösoghöy Tororöt nyo söpöy, kïnget kïsagh körkeyïntin cho kikigh kemustö tïkwïl cho meghsot cho lata ptangengmöt anta törit anta tïpö wudïn anta cho mi pögh.

²⁴Nka nyay, kechalta Tororöt chane kïrïp pïrchinoghtino mïkuliskökwa cho ghach akwighchï kegh chane nko chane tïkwïn cho pö arasï ompö porwöyikwa.

²⁵Kitagh chane kughan ngala man paraku Tororöt akïpechï kughan putintön. Kïnget ngat kïsagh akïpöghisyechï kïgh nyo kigh Tororöt, nyinö kötösoghöy Tororöt kegh, nyini le ighinto tïkwïn löwïr, akï nyinte nyo mïchini kesal kokay! Amen.*

²⁶Nka nyoni nyu kipïstö Tororöt chane kïrïp pïrchinoghtin cho ghach cho pö arasï. Rose lö köwö korka nko korketö anka amelö kömïchini kwighöy lenyoni.

²⁷Kegh mïrön tïkwïl lenyoni, ompöwölo nyinö kötöpetöy nko kor le nyaye pö su, nkanget kïpïrchï kïpa mïrön nko mïrön! Sörömunyi, ompö ptakalnanengwa nyoni, nyoru chane sito Tororöt.

²⁸Akwompöwölo kilö pich mökïmököy kenone ngala man paraku Tororöt, kïpïstö Tororöt chane kïrïp kinonutkökwa cho wïryote ntökwanyï ighöy tïkwïn cho merokonye.

²⁹Kinyïghï oringwa ghöyityö anka tïkwïl cho lata, nyonyintön nko kiswomöt nko pïrchin nyo gha nko nyïtat nko tïghö nko lïsa nko sastagh.

³⁰Pich chane cho ngölono kegh ompö or nyo gha akï töghöy Tororöt, cho kölköl akï cho mwoghöy kegh, cho kwolöy akïsyolöy kegh. Pich cho nonöy kïnomnyö ortïne walaka cho igho tïkwïn cho ghach akï cho möterchinicha yiyikwa.

³¹Pich cho le chelölos, cho yomisöy pich kïgh atolapay makwigh lenyini, cho menkït köromnyö anta, kisyonchin.

³²Nkït chane lö lentö Kirurut pö Tororöt pich cho möngisïyi lenyoni kïmïchini kïmeghö. Wölo letöy chane tagh ompö ngalechoni akï, mwochini piko walaka cho ighöy ngalechoni lö, “Kaghakwa kuten.”