Read pokoot RUMI 10 Bible Online

RUMI 10 - pokoot bible

RUMI 10

¹Otïngetan machat, tupchenichu, ompö mïkulöwunyan kïmïkul akï saghatenyan kï kesörï piköcha choni pö Israel.

²Omukan söwintön lö, kikutötö kegh chane nyoman kïpöghisyechi Tororöt, wölo melö ompö pköchin pö man.

³Ompöwölo möpköchïcha chane ara Tororöt nyo yityinegho pich man ompö tawunyi, wölo kumukyï chane kïyar arengwa anka kilenyona kimökïchamcha kïrïp ara Tororöt nyo yityinegho pich man.

⁴Ompöwölo kingwïn Kristo* ighisyo kirurut, atökeyityï chi anka tïkwïl nyo ghönöy man ompö tawu Tororöt.

⁵ Kikir Musa akuporï or nyo kiyityinegho pich Tororöt man ato rïp kirurut lö, “Söpöy chi anka tïkwïl nyo rïpöy akwigh lenyini mwoghöy kirurut.”

⁶ Wölo lentöy Kikirut paraku wölo kiyityinegho pich man ompö ara kighanat lö, “Memwagh ompö mïkulöwungu lö, ngo nyo pusöy yïm?” (Nyoni kï kepu Kristo ngwïny.)

⁷“Anta itep lö, ngo nyo röytoy ngwen?” (Nyoni kï kemïtuna Kristo ngwen).

⁸Wölo lentöy kirurut, “Lekïteninyi ngölyonto Tororöt, mi kutingu akïmi mïkulöwungu.” Akï nyoni kï ngölyonto kighanatanete kyomtonecha.

⁹Ato inganganyi kutingu aimwagh lö, “Yeso kï Echotyon,” aighananyi ompö mïkulöwungu lö kitutunö Tororöt nyinte ngwen, kesörunyi.

¹⁰Ompöwölo ghonöy chi Tororöt ompö mïkulöwunyi atökeyityï man, akwoto nganyta chi lenyoni ompö kutinyi, kesöru.

¹¹ Mwoghöy Kikirut lö, “Mönyorunye arasï chi anka tïkwïl nyo ghönöy nyinte.”

¹²Ngölono Kikirutchoni lapay ompöwölo möminye sisïn nyo mi kwenu pipö Yaudi nko pipö punton. Tororöt kï Echotyonto chane löwïr akï nyinte nyo soyönöy nyoman pich löwïr cho kuröy nyinte,

¹³ompöwölo lentö Kikirut, “Chi anka tïkwïl nyo kuröy kaynata Echotyon kesöru.”

¹⁴Wölo kuröy nyu nyinte chane lö, ne ato tomöcha kughan? Akughönöy lö ne ato tomöcha kïlïm lökoyechoni? Akïlïmöy chane lö, ne ato möminye omtoghintö?

¹⁵ Akumuköy pich kwomtoy lö, ne ato mökiyoktö? Kïle wölo mwoytoy Kikirut lö, “Pïchighöch kïtya kelyo pich cho omtoy Lökoy cho Karamach!”

¹⁶ Wölo melö chane lapay cho kirïp Lökoy cho Karamach, ompöwölo kimwa Isaya nyinte lö, “Echotyon ngo nyo kighan ngalecha nya?”

¹⁷Kïlenyona nyu nyoru pich kighanat atolïm ngölyon, akï nyoni kï ngölyonto Kristo.

¹⁸ Wölo nya tepan lö, kitomöcha so kïlïm chane ngölyontononi? Kikïlïm lö chïs! Ompöwölo mwoghöy Kikirut lö, “Kighömï kutïwekwa koros lapay akwitïta ngalekwa söremwok pö ngwïny.”

¹⁹ Otepan ngat lö, kimöpköchïnye so pipö Israel? Nyinte Musa nyo kinya kïwöghökwï lö, “Opöghisyeghonan pipö punton cho melö kö kiyitöy lö pich tökwigh piköchan kwam nyonyintön. Akwompö pich cho le sölwöy Oghokwa onörekyenö.”

²⁰ Aki mewaghnye Isaya nyonikïny kïmwa lö, “Kinyorwanïn pich cho melö kiyöranïn kyoporchan kegh pich cho melö kitepanïn.”

²¹ Wölo mwoghöy ompö pipö Israel lö, “Kyoghïtyan ewuno linyogh kwimön pich cho le tighï akï penyi.”