Read pokoot RUMI 12 Bible Online

RUMI 12 - pokoot bible

RUMI 12

¹Kïlenyona, tupchenichu, ompöwölo wow nyoman kisyonöto Tororöt, osomokwa ompö mïkulöwunyu kïmïkul lö, otötenö porwöyikwo kïlïkwï tïsöwon nyo satate ompö Tororöt, tïsöwon nyo tïlil akï nyo ngörokini nyinte. Arenkwa nyoni nyo tenate nyo pö saghat.

²Marïp otöptino pipö ngwïnyinï, wölo nya kïwaghach Tororöt kinonutkökwo. Pköchokwa nyu atoni lö ne machata Tororöt, ankïtukwa kïgh nyo karam nyo ngörokini nyinte akï kïltït.

³Akwompöwölo kicham Tororöt kïkonanïn pöropchenyi, omwowokwa lapay lö, mop kegh yïm tya kïtïl wölo kalatekwa. Wölo akanya kurwokyï kegh chi anka tïkwïl kïrïp kegh nko kighanat nyo ketö Tororöt nyinte.

⁴ Kïle wölo tïng por ngichayay cho chang kïtïng anka tïkwïl ighisyenyi nyo sis.

⁵Kïlenyoni tïkwïl, kïrkegh kökïchicha chang, kechicha por akonga otini kakelinyecha nko Kristo* akenomnyech löwïr le ngichaya por akonga.

⁶Kepöghisyeghenö nyu ropöwecho cho sisinchö kïrïp kegh nko pöropcho Tororöt nyo kökonecha. Nyo ato röpöwonto chi ki werkoynön, kipöghisyeghö kïrïp kegh nko kighanatenyi.

⁷Kïkany ato kö kepöghisyechï kighönï, kïpöghisyö kuten, anta kö kinetat, kunetisyö lasiny.

⁸Ato ko ropöwonto kikilöto pich, kukil pich lenyoni. Kïkany chi nyo pöghöy pich, kwigh lenyoni ompö mu nyo karam, akwanka tïkwïl nyo ghyongchini pich, kughyongchï lasiny akwanka tïkwïl nyo syonchini pich kwigh lenyoni ompö ngörekyö.

⁹Ochomnyö ompö chomnyogh nyo puryö lïs. Atagha kïgh anka tïkwïl nyo gha achama kegh kiyon karam.

¹⁰Achama kegh le pich cho tupchö ompö Kristo, acham okonyït kegh akwane.

¹¹Malïkwï soson otinö opöghisïyi. Opöghisyechinö Echotyon ompö mïkulögh nyo pö kitötogh.

¹²Akanya kïkonok kikönötengwo ngörekyö kïnomnyö, amïkukön ompö nyörilwok, akil kegh kïnomnyö ompö saghat.

¹³Angarak pipö Tororöt ompö möchutkökwa, atach to ompö kestonikwo.

¹⁴ Osoyönö chane cho chopokwa kong, osomchinö kisoyönöt, mochïp.

¹⁵Ongörekyenö nko pich cho ngöreksot, ariryö nko pich cho riryot.

¹⁶ Ayanga pich lapay ompö or nyo körökegh. Mop kegh yïm, wölo achama agha ighisyewut cho sösöy pich. Moyit kegh lö kïchï ngöghomöch.

¹⁷Ato ighunyi chi nyo gha meghchï nyinte nyo gha. Aimukyï igh tïkwïn cho sïwïyi pich lapay lö karamach.

¹⁸Igha kïgh anka tïkwïl ompö okuntöngu nyo muko ate töpenö nko pich lapay ompö kalya.

¹⁹ Chamankachu, matak ghöyïn nyo kighwokwa, wölo opïsinö Tororöt, ompöwölo mwoghöy Kikirut lö, “Ani nyo otökisïyi, ompö ghöyïn nyo kakighwakwa mwoghöy Echotyon.”

²⁰ Akïmwoghöy ngat Kirurut cho Tïlilöch lö, “Ato amate punyontengu kömöy, ipagh. Ato amate maral, itö pögh. Ompöwölo ato ighanyi lenyoni, kï keghanyi nyinte kïsïch arasï nyo ngwan le ngöset cho nöghsot ompö mötïnyi.”

²¹Mekany kïrïntin ghöyityö, wölo irïnta ghöyityö ompö köromnyö.