Read pokoot RUMI 14 Bible Online

RUMI 14 - pokoot bible

RUMI 14

¹ Ataka chi nyo nyarkalal ompö kighanat ompö kwenunkwa, amomöl kegh nko nyinte paraku kinonutkachi.

²Sisinchö pich, chömchini kighanata chitö anka kwomöy kïgh anka tïkwïl, wölo kwam onkïy chi anka nyo nyarkalal kighanatenyi.

³Merokonye kïsas chi nyo omöy kïgh anka tïkwïl chitö anka nyo momönye tïkwïn löwïr, amömïchininye nyinö anka omöy onkïy kïpoto, kurwokyï nyinö anka omöy tïkwïn löwïr, ompöwölo kikïtach Echotyon chichoni.

⁴Ichinyi ngo nya terwokyine mötworinto chitö anka? Ato kegh cho rokono anta ewo, kï paraku echotyontenyi kegh kïmwa. Wölo ato igh cho tenate, kwompöwölo Echotyon nyo kengarak nyinte.

⁵Muköy chi anka kupïlil asis akonga lö pïchigh kïtïl osiswe walaka, kuyit chitö anka osis löwïr lö karkegh. Mïchini chi anka tïkwïl kïrïp lasiny lenyini kikunan nyinte.

⁶Nyo kepïlilöy asis akonga, kwighöy lenyoni ompö konyït pö Echotyon. Kïkany chi nyo omöy kïgh anka tïkwïl, kwighöy lenyoni ompö konyït pö Echotyon, ompöwölo yokyini nyinte sörö Tororöt ompö omisye. Kïlenyoni tïkwïl ompö chi nyo mulöy kegh omisyewut walaka, ighöy lenyoni ompö konyït pö Echotyon akuyokyini nyinte tïkwïl sörö Tororöt.

⁷Ompöwölo möminye chi akong ompö kwenuncha nyo söpöy ompö kinyiwutyenyi kegh anta nyo meghö ompö kinyiwutyenyi kegh.

⁸Ato tökesöpchonecha anta kikemeghö, kemitecha lenyoni ompö Echotyon. Kïlenyona nyu ato tökesöpchonecha anta kikemeghö, kepoyecha Echotyon.

⁹Ompöwölo kima Kristo* akututï atökumï kïlïkwï Echotyonto cho söpsot nko cho kimeghö.

¹⁰ Kwompö ne nyu terwokyinenyi tupchengu? Akwompö ne tesösenyi tupchengu? Kighyongonecha löwïr tawu ngacharu kirwoko Tororöt atö kurwokwech. *

¹¹ Ompöwölo lentöy Kikirut lö mwoghöy Echotyon lö, “Le otini osöpan, kïtïngchinanïn chi anka tïkwïl asïyech akïngany kutinyi akïmwa lö, ochan Tororöt.”

¹²Kïlenyona nyu, rörchini chi anka tïkwïl ompö acha asïyech Tororöt wölo kitöptö nyinte.

¹³Kïlenyona nyu, mökerwokyinö kegh ngat, wölo kekïrö kegh tömökitö kïgh areto tupchenyo nyo muköy kïkwat anta igh nyinte kupïtyï ngokï.

¹⁴Ompöwölo kyolinyan nko Echotyon Yeso otïngetan man lö, möminye omisyö nyonikïny nyo lïku sïmnyon onkït. Wölo ato nonchï chi kegh lö sïmnyon omisyö anka, kïlïku omisyononi sïmnyon ompö nyinte.

¹⁵Ato ililanyi tupchengu ompö omisyö nyo iyomenyi, kïmelö kerïpanyi ara chomnyogh. Ikïrö kegh omisyö nyo iyomöy tömegh chitö anka nyo kimegha Kristo kupot.

¹⁶Kïlenyona mekany kengalana nyo gha köromnyengu.

¹⁷Ompöwölo Pöyunöto Tororöt kï melö ngala omisyö nko gheghsyö, wölo kegh man nko kalya nko ngörekyö, nyo konu Mïkulögh nyo Tïlil.

¹⁸Akï chi nyo pöghisyechini Kristo lenyoni kïngörokyini Tororöt akï tïng nyinte tokoch nyo karam ompö pich.

¹⁹Kïlenyona nyu, mïchinecha kerïpa ngal cho ipu kalya kïnomnyö nko cho ipu kikilöto kegh.

²⁰Menyar nyu ighisyo Tororöt ompö ngala omisyö. Kyomöy omisyewut löwïr, wölo mömïchïninye kyam omisyö nyo ighöy chitö anka kupïtyï ngokï.

²¹Mömïchininye kyam peny anta kegha dipay* anta kigh kïgh anka tïkwïl nyo ighöy tupchengu kupït.

²²Nya kïtöpo nyu kïgh nyo ighönenyi ompö ngalechete kwenungu nko tororötïngu. Soyönote chi nyo mölïmchininye kegh kirwok ompö choghïntanyi otini ighöy kïgh nyo kacham kwigh.

²³Wölo ato tïng chi tomtomönöt ompö omisyö nyo omöy, kurwokyini Tororöt nyinte ato am, ompöwölo melö kam omisyononi kïrïp kegh nko kighanatenyi. Akï kïgh anka tïkwïl nyo mörïpönye kegh nko kighanat, kï ngokï.