Read pokoot RUMI 2 Bible Online

RUMI 2 - pokoot bible

RUMI 2

¹ Ato irwokyinenyi pikö walaka, möminye wölo ichïwïtonyi nyinte tïkwïl, kïrkegh kechï ngo. Ompöwölo otini irwokyinenyi pikö walaka aimitenyi ighöy tïkwïl tïkuchoni ighöy chane, imitenyi irötöy kegh nyinte.

²Nkït pich lapay lö, otini rwokyini Tororöt pich cho ighöy tïkwïn cho lata choni, kwighöy man.

³Wölo, inonenyi so, otini irwokyinenyi pich cho ighöy tïkuchoni lö ichïwötonenyi kirwoko Tororöt akwanyï ighenyi nyinte tïkwïl tïkuchoni?

⁴Nkï töptoy isösenyi köromnyenyi nyo wow nko mïkukönötenyi nya? Menkïtönyinye so lö karam Tororöt lenyoni ompöwölo kökoninyi pöroyïn kötenö ngokï?

⁵Akwompöwölo kelïkunyi tighin, nyo mölïmönye ngal, imitenyi itösini kegh kïngwanit tya sitöt nyo koninyi Tororöt ompö asis nyo poru nyinte nörekyenyi ompö ngokï akurwokï pich ompö man.

⁶ Ompöwölo ropchini Tororöt chi anka tïkwïl kïrïp kegh nko ighisyewutkachi.

⁷Töni Tororöt söpon pö kokay pich cho ighchini pikö walaka nyo karam akïsomöy Tororöt kutö chane ororyö nko konyït nko söpon nyo melö wïröy.

⁸Wölo nyoru sito Tororöt pich cho yongöy kegh opïn, cho melö konyïtöy man wölo chömöy kwighöy cho merokonye.

⁹Nyoru pich löwïr cho ighöy ghöyityö nyarïl nko ngwonïn, akutoro pipö Yaudi kïrïpöy pipö punton tïkwïl.

¹⁰Wölo töni Tororöt chï anka tïkwïl nyo ighöy nyo karam ororyö nko konyït nko kalya akï towuno pipö Yaudi kïrïpöy pipö punton tïkwïl.

¹¹ Ompöwölo melö tïng Tororöt kïltagh.

¹²Kigh ngokï pipö punton cho kimötïngnye Kirurut pö Musa akupotyot kïrkegh kimötïngnye kirurut. Akupotyot pipö Yaudi cho kigh ngokï ompöwölo kirwokyï chane Tororöt ompö Kirurut pö Musa cho kïtïng.

¹³Ompöwölo melö pich cho tïng kirurut cho yitote lö pö man ompö tawu Tororöt, wölo chane cho rïpöy kirurut.

¹⁴Melö tïng pipö punton kirurut, wölo ato igh chane ompö asïltangwa kïrïp kegh nko kirurut, kuporu lö chane kigh nyo mïchini nko nyo mömïchininye kegh kïrkegh kömelö kötïng kirurut.

¹⁵Poru ompö otöptöngwa lö, kikekirchï mïkuliskökwa tïkwïn cho mwoghöy kirurut. Söwintönchini chane tïkwïl choghïntino mïkuliskökwa lö, lata choni, ompöwölo muköy kurwokï anta tököwï chane ompö kinonutkökwa.

¹⁶Kïlenyona nyu, kïrïp kegh nko Lökoy cho Karamach omtonan lenye nyoni wölo lïku Asisoni rwokyini Tororöt, ompö Yeso Kristo,* pich ompö otöptinekwa cho wïngote.

¹⁷Ekï nyi nyu nyo ikuro kegh chi pö Yaudi aimontonyi kegh kirurut aikwolo kegh Tororöt

¹⁸ainkïtönyi kïgh nyo mökeninyi Tororöt igha, ompöwölo kenetinyi kirurut nkïtunö igha man

¹⁹ainkïtönyi nyo pö nyoman lö ichinyi kintöghoghinto chepkörotonoy aichinyi löpoyïn ompö pich cho mi tuwïn

²⁰aichinyi tïkwïl kirurinto pich cho menkïtnye kïgh, cho tomönye kïpköchï ngala ompöwölo itïngetenyi ngöghomnyo man lö döng ompö kirurut

²¹akwotï inetenyi pikö walaka, ompö ne tömenetenyi kegh nyinte? Nyi nyona ilenchini pich, “Mochorsyö,” eichorsïyenyi nyinte?

²²Imwoghenyi lö, “Megh cheporesnan,” eighenyi cheporesnan nyinte tïkwïl? Nyi nyona lilin kïgh körkeyïntino tororötin, eichorenyi tïkwïn ompö kori tororötin?

²³Ikwolenyi kegh lö onkït Kirurut pö Tororöt, eipchinenyi arasï Tororöt otini ipenyenyi kirurutkachi?

²⁴ Mwoghöy Kikirut lö, “Kemwa pipö punton kaynata Tororöt akwompö akwa pipö Yaudi.”

²⁵Tïngeto mutata kinyiwut ato rïp chi kirurut, wölo ato ipenyenyi kirurut, kitöngwangwa lïkuna somchon.

²⁶Kïlenyona, ato töp chi nyo le somchon tökïrïp kirurut, kuyitöy Tororöt nyinte le chi nyo kikemut.

²⁷Rwokyinokwa nyu pipö Yaudi pipö punton, ompöwölo kapenyakwa kirurut, kïrkegh otïngetekwa kirurut cho kirote akikemutekwa, wölo rïpöy chane kirurut kïrkegh melö kikemut.

²⁸Ompöwölo molenchï kegh chi pö Yaudi nyo pö man chi nyo rumu pat ompö sany lö chi pö Yaudi, amölïkunye pat chi nyo le mïrön, chi pö Yaudi nyo pö man lö ompöwölo kikemut nyinte.

²⁹ Wölo chi pö Yaudi nyo pö man, kï nyo le chi pö Yaudi ompö orinyi, akikïnyorï mutata man nyo pö mïkulöwunyi ompö owesyo Mïkulöwu Tororöt, amelö ompö kirurut cho kirote. Mönyorunonye chi nyo lata nyoni kikusat ompö wölo mi pich, wölo nyoruno Tororöt.