Read pokoot RUMI 3 Bible Online

RUMI 3 - pokoot bible

RUMI 3

¹Ne nyu nyo tïlo pipö Yaudi pikö walaka nya? Anta tïng tösunöt ne mutata?

²Tïngeto nyu so lasiny ompö or anka tïkwïl! Nyo pö tagh kï ompöwölo kitö Tororöt pipö Yaudi ngölyontenyi.

³Wölo ekïlïku ne nyu ato meghancha walaka ompö kwenungwa? Ekumukoy ye kemwa lö, melö ghanate Tororöt?

⁴ Ewo kokay! Mwoghöy Tororöt man osis tïkwïl kïrkegh kö putin ptangengmöt. Le wölo mwoghtoy Kikirut lö, “Pö man ngaleku otini ingölonenyi, ailotisïyenyi ato kirwokunyi.”

⁵Wölo ekemwoghecha ne nyu ato poru ghöyityö nyo kighecha lö ighöy Tororöt man? Muko kemwaghacha lö kalel Tororöt otini kömungecha? (Olentan mwoghöy pich ataye lenyoni.)

⁶Ewo! Ntökömelö ighöy man Tororöt köterwokyini nyu ngwïny lö ne?

⁷Wölo ato nyorchini Tororöt ororyo otini körumï lötok mantanyi ompöwölo kalïkwan lïsin, kwompö ne tökemi kerwokyinanïn le mwokïyon?

⁸Kwompö ne nyu tömökïmwa lö kegha ngokï ato kungwïn kïgh nyo karam? Lenye nyoni köny wölo mwoghecha pikö walaka otini mïrchinecha. Kirwokyini chane kïmïchï.

⁹Akï yeo, kichïcha so karamach pipö Yaudi kïtïl pipö punton? Ewo, nyonikïny! Ompöwölo kanyaghan oporï lö, karkegh pipö Yaudi nko pipö Punton, pöytoy chane ngokï.

¹⁰ Kïle wölo mwoytoy Kikirut lö, “Möminye chi nyo pö man, nyo le ompö akonga,

¹¹amöminye chi ompö akong nyo pköchini kïgh, anta nyo yöröy Tororöt.

¹²Kikïmostoy pich löwïr, kikïlel chane löwïr. Möminye nyo le ompö akonga nyo ighöy nyo karam.”

¹³ Lenye kutïwekwa ngwen nyo pankase, kinyïghï lïsata ngölyepkekwa, pkono ngala kutïwekwa cho lata ngwono moroy.

¹⁴ Nyïghitate chïpötö nyo ngwan kutïwekwa.

¹⁵ Kwïskwïschini chane kïmïltoy kisön.

¹⁶Nyörilöy pich kong ompö woptin löwïr cho weröy chane.

¹⁷Tomöcha kunkïtï ara kalya,

¹⁸ amewöghöcha Tororöt.

¹⁹Kinkïtöcha ye nyu lö, kïgh anka tïkwïl nyo mwoghöy kirurut, kïmwoghöy ompö pich cho mi paytaghpa kirurut atömömi wölo ghöpöno chi asïyech akurwokini Tororöt ngwïny kïmïkul.

²⁰ Ompöwölo möminye chi nyo kiyityini man ompö tawu Tororöt, ompöwölo karïp nyinte kirurut. Kïgh nyo ighöy kirurut kï kuporchï chi lö, kegh ngokï.

²¹Wölo kakengongwï ye or nyo yityinegho pich Tororöt man akï nyo mönömönye kegh nko rïpata kirurut. Söwintönchini Kirurut pö Musa nko werkoy aranoni.

²² Yityini Tororöt pich ma ompö ara kighanat nyo ghönöy Yeso Kristo. Akuyityini lenyoni pich löwïr cho ghönöy Kristo, kïrkegh kechï ngo,

²³ompöwölo kikwigh pich löwïr ngokï akïrörchï ororyo Tororöt.

²⁴Wölo ompö ropöwonto pöropcho Tororöt, muko nyu keyityï pich man ompö Kristo Yeso nyo le kityokintengwa.

²⁵Kiropï Tororöt nyinte atökïlïkwï meghenyi or nyo löstegho pich ngokï ompö kighanat nyo ghönöy Kristo. Kigh Tororöt kïyoni atökuporï lö pö man nyinte. Ompö mïkukönö osiswechanya pö tagh, Tororöt amökïyangnye kurwokï ngoki ptangengmöt.

²⁶Wölo ye, ompö osiswechete, rwokini Tororöt ngoki ptangengmöt atokïrumï lö pö man nyinte akuyityini man chi anka tïkwïl nyo ghönöy Yeso.

²⁷Kïlenyona, kïgh ne nyo kimukecha kekwolone kegh nya? Puryö kïgh nyonikïny! Ekwompö ne köny? Ompöwölo so kakïrïpacha kirurut? Ewo, wölo ompöwölo kakighacha Yeso Kristo.

²⁸Kakïsïwecha ye nyu lö kiyityini chi man ompöwölo mi Tororöt ompö ara kighanat kïpoto amelö ompöwölo karïp nyinte kirurut.

²⁹Anta yeno, Tororöt ataye kï Tororöt pö pipö Yaudi opïn nya? Mö Tororötnye so nyo pö pipö punton tïkwïl? Ay, pö punton tïkwïl.

³⁰ Tororöt kï akonga akuyityini pipö Yaudi man ompö kighanatengwa akuyityï man pipö punton tïkwïl ompö kighanatencha.

³¹Ekuporu ye nyoni lö kikemötecha kirurut ompö kighanatengwa? Ewo, puryö, nyo kötökïmötonecha, kepïlilacha kirurut.