Read pokoot RUMI 4 Bible Online

RUMI 4 - pokoot bible

RUMI 4

¹Kïmwoghecha ne ye nyu, ompö kukötönyo Apraam?

²Ntökile nyo kikiyityï man ompö tawu Tororöt ompö ighisyewutkachi, kötötïng kïgh nyo kwolo kegh. Wölo kimöminye wölo kimuköy kwigh lenyoni ompö tawu Tororöt.

³ Ompöwölo mwoghöy Kikirut lö, “Kighan Apraam Tororöt, akwompö kighanatenyi nyoni kuyityï Tororöt nyinte man ompö tawunyi.”

⁴Kïnömchini chi ropïyen nyo pöghisïyi amelö kiyitöy le ropöw, wölo le tïkwïn cho pö kighotichi.

⁵Wölo chi nyo twoytoy kegh kighanatenyi amelö ighisyewutkachi akughan Tororöt nyo löstoghchini mwokïyis, kï konyïtöy Tororöt kighanatenyi akuyityï man ompö tawunyi.

⁶Nka nyoni ngölyontonay kimwa Daudi ato kingalana ngörekyo chi nyo yityini Tororöt man amelö ompö ighisyewut lö,

⁷ “Soyönote pich cho kikelöstoghchï lelutkökwa akepuktö ngokikwa!

⁸Soyönote chi nyo mökuyitönye Echotyon ngokichi!”

⁹Pöyitu so ngörekyononi kingalana Daudi pich cho kipa tum opïn? Ewo, pöyitu nko cho tomöcha kïpa tum tïkwïl? Ompöwölo kikemwaghacha ataye lö lentöy kirurut, “Kighan Apraam Tororöt, akwompö kighanatenyi nyoni kuyityï Tororöt nyinte man ompö tawunyi.”

¹⁰Oyï ato kigha ngölyontononi nya? Kigha otini kitomönye kïwö Apraam tum nya, anta otinö kikikïwö tum? Kigha otini kitomönye kïwö tum, melö otinö kikikïwö tum.

¹¹ Kikïmut nyinte ato le löt, akïlïkwï mutatenyi machey nyo poru lö kikïtach Tororöt nyinte akuyityï man ompö kighanatenyi nyo kitïng kïtomö kïwö tum. Kïlenyona kilïkwï nyu Apraam papoto pich löwïr cho ghönöy Tororöt, kïrkegh möpetöy tum.

¹²Akï papoto pich cho kikemut tïkwïl, amelö pat ompöwölo kikemut chane, wölo ghönöy Tororöt le kukötönyo Apraam kïtomö kemut.

¹³ Otini kiyomis Tororöt Apraam nko monechi lö pöyitu chane ngwïnya, kï kigh lenyoni melö pat ompöwölo kikikïrïp nyinte kirurut, wölo ompöwölo kighan nyinte Tororöt. Akwompö kighanatenyi, kuyityï Tororöt nyinte man ompö tawunyi.

¹⁴ Ompöwölo ntökökitöni kiyomisut pö Tororöt pich cho rïpöy kirurut opïn, tömelö kïgh kighanata, akömökïtïngnye kinyiwut nyonikïny kiyomisöto Tororöt.

¹⁵Ipu kirurut nörekyo Tororöt, wölo ntökömökïmicha kirurut kötömökïmicha kirurut cho kïpenyöy.

¹⁶ Nka nyoni chïchïmo kiyomisötö paraku kighanat, atökumï kiyomisötö kïtighö kegh pöropcho Tororöt atökukïniniechï pipö ara Apraam löwïr, amelö pat ompö cho rïpöy kirurut opïn, wölo ompö chona ghonöy Tororöt kïle wölo kighan Apraam. Ompöwölo paponcha nyinte löwïr ompö ara mïkulögh.

¹⁷ Kïle wölo mwoghöy Kikirut lö, “Kaghinyi lïkuna papo nyo pö punton cho chang.” Poru nyu nyoni lö, nïkis kiyomisöto Tororöt nyini kighan Apraam. Tororöt nyinte nyo tutuy mïntïrïch, akwotini kangalan ighöy kïgh nyo melö kömito tagh kïrumï.

¹⁸ Kighan Apraam Tororöt akukönisyö, kïrkegh kimelö kitökïmi kïgh nyo kitökekönöy kïrïp kegh nko wölini kilata ngala. Kïlenyona kïlïkwï nyu nyinte papo nyo pö punton cho chang, le wölo mwoytoy kirurut paraku Apraam lö, “Chongitu piko arengu le kokel.”

¹⁹Kikikïyosit nyinte atoni akikwit könyiswechi 100. Wölo mötomtomönnye kighanatenyi kïrkegh kinkït lö kikarkegh portanyi nko por nyo kimeyta akwanyï atoni tïkwïl ki sonö korkenyi Sara.

²⁰Melö kipïstö nyinte kighanatenyi akimötomtomönnye nyinte ompö kiyomisöto Tororöt. Kiyetï kighanatenyi nyo kikil nyinte, akïsal Tororöt.

²¹Akinkït nyoman lö, muköy Tororöt kwighöy kïgh nyo kikuyomis.

²²Nka nyoni “kiyityï Tororöt man Apraam,” ompö kighanatenyi.

²³Wölo melö ngalechï lentöy “kiyityï Tororöt man,” kïngölono Apraam onkït,

²⁴wölo ngölono parakuncha tïkwïl, acha cho kikeyitwech man, ompöwölo kighönecha Tororöt nyo kingetunö Echotyontenyo Yeso ngwen.

²⁵ Kikonï Tororöt Kristo* kungwïn kïma ompö ngokicha akututï nyinte atökeyitwecha man.