Read pokoot 1 KORINTO 10 Bible Online

1 KORINTO 10 - pokoot bible

1 KORINTO 10

¹ Omökan ononwokwa, werköcho, ngal cho kichumchï kukötinecho chanya kirïpöy Musa. Kikarta polta chane löwïr, akimechutcha pögh otini kyoghyot Nanam nyo Pïrir.

²Kikipatisan chane kïmïkul kïlïkwï rïpanpa Musa ompö poltononi nko nanamoni.

³ Kwam chane löwïr omisyononi pö mïkulögh,

⁴akïgha chane löwïr pöghechoni pö mïkulögh, ompöwölo kighegha ghatyanoni pö mïkulögh kirïpöy chane aki Kristo* nyinte ghatyanoni.

⁵ Wölo kïrkegh kïlenyoni, kïmelö kingarak Tororöt ompö pïchoni cho chang, ketoytoyö mïntïruchkökwa wölo le surkwen.

⁶ Kighisyö ngalechoni löwïr atökïlïkwï körkeyïn ompö acha, tökïrirwecha tömökïpïrchï tïkwïn cho ghach le pïchoni,

⁷ anta kïsagh körkeyïntin le wölo kisaghta walaka ompö chane. Le wölo mwoytoy Kikirut lö, “Kimpur pïchoni ngwïny akwomisyö akïgheghsyö atolapay kïnget akïnyal.”

⁸ Mïchini kekïrenöcha kegh cheporesnan tömökïkarkegh nko walaka ompö chane cho kimeghö asis akonga cho le 23,000.

⁹Amöketyam Echotyon le wölo kida walaka ompö chane, kuwany moroyut.

¹⁰Amökengwïrngwïronchö le wölo kilïkwï walaka ompö chane kunyar Malaykayanta Meghat.

¹¹Kipkonchï nyu pïchoni löwïr ngalechoni atökïlïkwï kiporunöt ompö pikö walaka akekir atökïrirwecha cho kakwitwecha osiswo söröm.

¹²Mïchini kïrip kegh chi tömepït nyo nonöy lö ochï chïchïmate.

¹³Möminye tyamata nyo itwokwa nyo sis nko nyo nyoru chi anka tïkwïl. Ghanate Tororöt amelö pïsini nyinte ketyömokwa kïtïl owesyenkwa, wölo konokwa tïkwïl owesyö kïmi nko tyamatanoni nyo omïkuköno nko or nyo ochïwïto atamuka oghyongtenö.

¹⁴Kïlenyona, chamankachu, olowitenö kegh saghata körkeyïntin.

¹⁵Ongölonwokwa pich cho ngöghomöch, anan akwane ngalechï omwoghan.

¹⁶ Mökïghömechinechanye so kisön pö Kristo ompö kikompe nyo kïpöghisyeghonecha ompö omisyo Echotyon akeyokyï Tororöt sörö otini kïgheghonecha kikompononi? Ato kïmïnchïrecha makatyan, melö so kïghömechinecha por pö Kristo?

¹⁷Kïlïkunecha por akonga ompöwölo akonga makatyantanoni, kïrkegh kakïchicha chang, ompöwölo kiporecha löwïr makatyantanoni le akonga.

¹⁸ Anane ya pipö Israel cho omöy amörostin, mötïngcha so chane ghömïchö nko ato kïpelo amörostin?

¹⁹Omökan omwoghöy ne nya? Kamwaghan so lö osöröpu körkeyïntin? Anta omisyö nyo kïropchini chane?

²⁰ Ewo! Kamwaghan lö kyak cho yengöy puntonï cho menkïtcha Tororöt kïropchini panyekwa oy, melö Tororöt amochömanye osïkekwa ghömïchö nko oy.

²¹Momukekwanye ogheghone kikompo Echotyon nko nyo pö oy amomukekwanye omisyeghone mesa Echotyon nko nyo pö oy.

²² Anta kïmökecha kwipenecha Echotyon sikong nya? Kichicha so owesöch kïtïl nyinte?

²³ Mwoghöy chane lö, “Kïchomwecha keghe kïgh anka tïkwïl.” Lata nyoni nyoman, wölo melö karamach tïkwïn tïkwïl, “Kïchomwecha keghe kïgh anka tïkwïl,” wölo melö ngörokecha tïkuchoni löwïr.

²⁴Merokonye kïyar chi tïkwïn cho töni nyinte onkït tösunöt, poto cho ngöroköy pikö walaka.

²⁵Ama kïgh anka tïkwïl nyo kyoltegho donyo pany amateptep kïgh akwompö sïkunötenkwa,

²⁶ompöwölo lentöy Kikirut, “Pö Echotyon ngwïnyï nko kïgh anka tïkwïl nyo mi orinyi.”

²⁷Nyo ato kurchokwa chi nyo melö ghanate omisyö, achömchikwa nyinte, am nyu omisyewut löwïr cho ketö nyinte tawunkwa, amateptep wölo lata omisyewutchoni ompö areto sïkunötengwo.

²⁸Wölo ato lenchokwa chi, “Kakïropchï omisyonete körkeyïntin,” mam nyu omisyononi akwompö chichoni kikwowokwa lenyoni nko choghïn nyo karam.

²⁹Kamwaghan nyoni amelö ompö choghïntönkwa, wölo ompö choghïn pö chichoni kömwowokwa. Tepöy ye nyu chitö anka lö, “Kwompö ne tökïmir otöptönyan nyo tyakate sïkunöteto chitö anka nya?

³⁰Ato atachan am omisyononi asoyön Tororöt, kwompö ne tökegheghchinanïn ompö omisyö nyo koyokyineghan Tororöt sörö?”

³¹Kïlenyona nyu ato koghöy kïgh anka tïkwïl, ato komisïyi anta kogheghsïyi agh choni löwïr ompö ororyo Tororöt.

³²Amolelchï pipö Yaudi anta pipö punton anta kanisa Tororöt.

³³Akara kegh nko ani, ompöwölo komukyan agh pich löwïr kïngörekyö ompö kïgh anka tïkwïl nyo oghan, amelö ompö tösunötenyan kegh, wölo tösunöto pikö walaka atökesörï chane.