Read pokoot 1 KORINTO 7 Bible Online

1 KORINTO 7 - pokoot bible

1 KORINTO 7

¹Kanya ye nyu angalanan ngalechanya kyakirakwa. Karam ato mökensyönye chi,

²wölo ompö työmut cho ighöy chi kïlïkwï cheporesyan, kuroko kwip chi anka tïkwïl korkenyi, akïsïch korka anka tïkwïl santenyi.

³Nya kutö mïrönö korkenyi machatenyi, kutö korka santenyi machatenyi.

⁴Mötïngnye korka paytagh ompö portanyi kegh poto santenyi, akïmötïngnye ngetat paytagh ompö portanyi kegh poto korkenyi.

⁵Matagha kegh mantangwo, kïpoto ato anyaghakwa ochomnyechï agh lenyoni ompö osis cho ngörï atonyorunö pöroyïn nyo osogho. Atolapay otuyö ngat atömopïsyï Onyöt kïtyamak ompö nyörkölelyengwo.

⁶Kïgh nyo komwowokwa ye kï kiruröt melö kisiköt.

⁷Kötomökan lö tötïpï pich tïkwïl le ani, wölo tïng chi anka tïkwïl ropöwontenyi nyo töni Tororöt, tïng chi anka ropöwon nyo sis, kïtïng chitö anka ropöwonte nyo sis.

⁸Omwochinan ye nyu pich cho tomöcha kïkensyö nko cho le mïsïktin lö mïchini kulet tagh chane kïtïpï le ani.

⁹Wölo ato memuköcha chane kïrïpöy kegh, kïkensyö akep, ompöwölo ngwangwa tya kegh lenyoni kïtïl kula chi ompö pïrchin.

¹⁰ Otïngetan ngölyon ompö pich cho kakensyö amelö nyinyan ngölyonte, wölo pö Echotyon, lö, tömötöp korka tökïpïstö santenyi.

¹¹Akwoto pïstö, kïtöpö mö kip ngat anta manyona, kïchomnyö nko santenyi. Amötöp tïkwïl mïrönö lö otyoköy korkenyi.

¹²Omwochinan ante pikö walaka (amelö Echotyon), lö, ato tïng mïrönö nyo kakughan Kristo* korka nyo tomönye kughan akïcham kokononi kïtöpö nko nyinte, kïmömïchininye kutyak.

¹³Ato mi korka nyo ghanate Kristo nyo tïng santenyi nyo melö ghanate, akïcham santenyi kïtöpö nko nyinte, kïmïchini kïtïpï tïkwïl.

¹⁴Ompöwölo toköy Tororöt chichoni otini ketuyö kegh nyinte nko korkenyi. Kïtoköy Tororöt kokononi melö ghanate otini kötuyö nyinte nko santenyi. Ntökömökïlenye nyoni, kötömelö lïku monekwa monïngo Tororöt, wölo kakïtach Tororöt ye monekwa.

¹⁵Wölo ato mach nyinte nyo melö ghanate kïpïstö nyinte nyo ghanate, kïpïstö pat. Tyoko nyu chichoni anta kokononi ghanate, ompöwölo kökurokwa Tororöt otïpinö ompö kalya.

¹⁶Imukenyi korka nyo ichï ghanate tenkïtï lö ne lö memukenyinye sörune santengu? Anta nyi nyo ichï mïrön nyo ichï ghanate, tenkïti lö ne lö memukenyinye sörune korkengu?

¹⁷Mïchini kïtöpö chi anka tïkwïl kïrïp kegh nko ropöw cho kiropchï Echotyon akïtöpö le wölo kilata nyinte otini kikur Tororöt. Omwochinan nyu kanisen löwïr lenyoni.

¹⁸Ato ghan chi nyo kikemut, kïmerokonye kwigh kegh le chi nyo le somchon. Ato kighan nyinte kï somchon, kïmerokonye nyu kïwö tum.

¹⁹Ompöwölo mökïghnye ato wö chi tum anta möwö, wölo kerïp Kirurut pö Tororöt.

²⁰Nya kïtöpö chi anka tïkwïl le wölini kilata otini kighan.

²¹Kikïkurinyi otini kichinyi sekeyon nya? Mesus kegh, wölo ato inyorï pöroyïn nyo kakityakïn, ipöghisyeghö kityakatengu.

²²Ompöwölo tyoko chi ompö Echotyon nyo kökur Echotyon kï sekeyon. Kïlenyoni tïkwïl, nyinte nyo kakïkur kutyakate kïlïku sekeyonto Kristo.

²³Kikyalakwa ompö olyot nyo wow. Malïkune nyu sekeyi pich.

²⁴Akanya nyu werköcho, kïtöpö chi anka tïkwïl nko Tororöt le wölo kilata nyinte otini kikïkur.

²⁵Motïngetanye ye nyu kichiköt nyo ngwïno wölo mi Echotyon ompö kor cho kïltït nko mïsïktin, wölo okonunan kinonutyenyu ante nyo kakusyonchï Echotyon alïkwï chi nyo kighönöy.

²⁶Ononan ye nyu ompö kömpölelyonï ketï, lö mïchini kïtöpö chi le wölo kölata nyinte.

²⁷Ekikensyenyi? Metyak nyu korkengu. Tomönye so kensyenönyi? Meyara nyu kensyogh.

²⁸Wölo ato ikensyenyi kïmelö keghanyi ngokï. Ato kip mïrar kïmelö kegh nyinte ngokï. Nyoru pïchoni kensïyi kömpölelut pö ngwïnyinï nka nyoni komökan lö tochïwïtyeghekwa kömpölelutchoni.

²⁹Anyï kïgh nyo omökan omwoghöy werköcho: köngötï osiswö cho ngörï, nyo mïchini kïtïpï pich cho kakïkensyö kïngeta ye le cho tomöcha kïkensyö,

³⁰kwigh kegh cho riryot le cho mötïngcha nyarïl, kwigh kegh cho turonchot le cho melö turonchot, kwigh kegh chane cho olöy tïkwïn le ato melö chikwa tïkuchoni kal chane.

³¹Mïchini kwigh kegh cho sïngo tïpö ngwïnyinï le pich cho mösïngocha tïkuchoni tya. Ompöwölo mi ngwïnyinete kïsïwïyi ye kuweröy.

³²Omökan otyokekwa kegh ompö sïngut, sïngo chi nyo tomönye kïkensyö ighisyo Echotyon atökïsïwa wölo idoy nyinte Echotyon kïngarak.

³³Kïsïngo chi nyo kikensyö ngala ngwïny atökwigh korkenyi kïngarak,

³⁴kïpesyö nyu chane kïlïkwï odeny. Kïkany korka nyo tomönye kep anta nyo le chepkïltït, kïsïngo ighisyo Echotyon, ompöwölo mököy nyinte kutöni Echotyon portanyi nko mïkulöwunyi. Wölo sïngo korka nyo kikep tïpö ngwïnyinï atökwigh santenyi kïngarak.

³⁵Komwowokwa ngalechoni ompöwölo omökan ongörokokwa, molenchï kegh omökan omirokwa. Wölo kömökan pat osïkekwa tötut cho mïchini atamuka opöghisyechinö Echotyon ompö mïkulögh nko machat akonga.

³⁶Ato sïwa chi lö melö koghchï nyo karam mïrar nyo kökakulotokïn ato mepnye nyinte. Ato pöl nyinte pïrchinoghtinechi, kwigh le wölo kömöktoy akany kwip kegh chane melö ighöy ngoki, ato kensyö.

³⁷Wölo ato mut chi ompö mïkulöwunyi lö mokensïyi, akumuköy kïpöytoy pïrchinoghtinechi akïmut kïgh nyo ighöy, kwighöy nyu nyo karam tya ato mepnye mïrarunoni kökikulotokïn.

³⁸Kïlenyona, ighöy chi nyo karam nyo kep mïrarunoni kökakulotokïn, wölo ighöy nyo karam tya chi nyo katagh kïkensyö.

³⁹Ratate korka nyo kakep otini kïnye tökïsöpöy santenyi, wölo ato kama santenyi, kutyaka nyu nyinte akumuköy chi anka tïkwïl kwipöy nyinte nyo kacham, wölo ompö ara pipö Kristo kïpoto.

⁴⁰Wölo osïwïyan ante lö ngarakate nyinte tya ato töpö lenyini kömi. Kinonutyenyan nyoni, anonan lö otïngetan tïkwïl Mïkulöwu Tororöt.