Read pokoot 2 KORINTO 2 Bible Online

2 KORINTO 2 - pokoot bible

2 KORINTO 2

¹Nka nyoni nyu melö kötorutowokwa ngat atömaghakwa owongunö.

²Ompöwölo ato aghakwa owongunö kï ngo nyu nyo soghsoghokwa? Lïku so pïchanye kisïkenanïn kiwongunöt?

³Nka nyoni kïyoni kighanïn akirwakwa palalyan melö kyomökan orutowokwa atömosïkenokwa akwa cho kötosïkonan ngörekyö. Ompöwölo otïngetan man lö ongöreksokwa löwïr ato ochan ngarakate tïkwïl.

⁴Melö kyomökan owongunekwa atanye kyakirwakwa palalyantenyan nyanya pö tagh kyakiran ompö nyarïl nko otyogh nko ngwonïn pö mïkulögh nko lok cho chang, wölo kyomökan oporwokwa lö kyochömokwa tya kïmolï.

⁵Ato mi chi nyo ketö chitö anka kiwongunöt, kïmelö ani nyo ketö, wölo kökonokwa löwïr amelö omökan ongwonitu tya ompö nyinte.

⁶Kakïmïchï sitononi könyorunö nyinte pich cho chang ompö kwenunkwa.

⁷Nyo köngötï ye nyu ompö akwa kï kaykay olöstoghchinökwa chichoni, akil nyinte tömönarek tya ntökïma mu.

⁸Kïlenyona nyu osoghsoghokwa lö okïniniechinö nyinte lö tochömekwa nyinte.

⁹Nka nyoni kïgh nyo kighanïn akir palalyantananye atömanyïn atyamakwa atonkïtwan ompö akwa lö omitekwa kipsach aripa ngalechoni löwïr.

¹⁰Ato olöstoghchikwa chi lelutyenyi, olöstoghchinan ante tïkwïl ato otïngetan kïgh nyoman nyo olöstoghchini, olöstoghchinan nyinte ompö tawu Kristo ompö akwa,

¹¹atömökïpïsï Onyöt pöroyïn kïlïsech, ompöwölo kinkïtöcha wölo lata tötutkachi.

¹²Kyamtan Lökoy cho Karamach cho pö Kristo otini kyatan Troa. Kyonyorchan atoni kukat nyo yatate ompö ighisyo Echotyon.

¹³Wölo kimotïngetanye payasat nyonikïny, ompöwölo melö kyotuyan nko werïnyo Tito. Nka nyoni kyoyomisön kegh nko piko atoni, awechan kegh atang Makedonia.

¹⁴Wölo keyokyinö Tororöt söro nyo ntöghoghwecha kïtenö osis kerïntena poryenyo ompö Kristo! Ighecha nyinte kyamtena man nyo pö Kristo nyo lata sikak kïghömï woptin löwïr.

¹⁵Ompöwölo kïlatecha sikak nyo ngutoy nyo karam nyo ropchini Kristo Tororöt körösyon nyo ngutoy nyo karam ompö pich cho kïsöru nko cho mi kupotyot.

¹⁶Lïku körösyontononi ngutogh pö meghat ompö pich cho kakupotyö, wölo lïku ngutogh nyo ipu söpon ompö pich cho kïsöru. Ekï ngo nyu köny nyo muköy kïghömechini ighisyö nyo lata nyoni?

¹⁷Melö kïlatecha pikö walaka cho chang cho ighöy mïnchïrïsnön ompö ngölyonto Tororöt, wölo kïle otini kïchicha pipö man cho kayontecha Tororöt, kengölonecha ompö man ompö tawunyi, le otini kïchicha mötwori Kristo.