Read pokoot 2 KORINTO 5 Bible Online

2 KORINTO 5 - pokoot bible

2 KORINTO 5

¹Ompöwölo kinkïtöcha lö ato kïngany koncha nyï kïmöngöy otï le ye nyoni kï portöncha nyo pö ngwïnyinï, kïtökïkonecha Tororöt mönge anka nyo mi yïm nyo pö kokay nyo melö kïteko ewun.

²Kïmitecha ye kengerötyot nyoman ompö otöpnete, aketïngetö machat nyo wow nyoman lö tökilokwech möngenyo nyo ngwïno yïm.

³Ato kilokwecha otöpnoni, kïmelö kighyongonecha tawu Tororöt kechï chïrutöch.

⁴Kingerötyocha otete tökemitenö otöpnete pö por ompö pïröto pich amelö ompöwölo kïmökecha kechengenech portönyo nyï meghöy, wölo kïmökecha kelokwecha por nyo melö wïröy atökïnyïkwïda söpon kïyoni meghöy.

⁵Tororöt nyinte nyo kipï waghakatanoni akï nyinte nyo konecha Mïkulöwunyi kïlïku kikïniniogh pö tïkwïn cho tökïpkonöy cho kakïrorwecha nyinte.

⁶Kïmitecha nyu kekilöy kegh kïnomnyö. Kinkïtöcha lö otini tökemitenöcha orito porete, kïtökechicha lowöch nko Echotyon.

⁷Ompöwölo kïpestotocha ompö kighanat amelö ompö kirosïtagh.

⁸Kïchicha nyökon akepïrchinecha lö tökïwuwö möngonete akepa ketïpï nko Echotyon.

⁹Wölo kïgh nyo wow kïsïr, kï keghacha tïkwïn cho mököy nyinte ato kö ompö ngwïnyinete anta kö woptö anka.

¹⁰ Ompöwölo kighyongocha löwïr tawu ngacharu Kristo* nyo pö kirwok nyo mötïny atökurwokwecha nyinte. Kirwokyini chi anka tïkwïl kïrïp kegh nko ighisyewutkachi cho kigh ato ki karamach anta ki ghach.

¹¹Kinkïtöcha nyu wölo kïtechtoy Echotyon anka nyoni kikilecha kegh akekïnkïnöy pich, nkïtecha Tororöt lasiny, akönan lö onkïtanïkwa tïkwïl ompö mïkuliskökwo.

¹²Molenchï kegh kakimukyicha ngat keporï kegh ompö tawunkwa, wölo kïmökecha keporwokwa kïgh nyo keghecha kekwolenö kegh akwa, atömanyïl amuch owöghökyï pich cho kwolo kegh otöptöngwa nyo pö sany tya kïtïl wölo lata ompö mïkulöwekwa.

¹³Töptoy kïlatecha pich cho kep oy, wölo kïlatecha choni ompö Tororöt, kwoto tenote kinonutköcha, kutenote lenyoni ompö tösunötenkwa.

¹⁴Ompöwölo pöywecha chomnyo Kristo otï le ye kakenkïtucha lö kimegha chi akong pich löwïr, poru nyu nyoni lö kakupar pich tïkwïl meghenyi.

¹⁵Kimegha nyinte pich löwïr atökumï pich cho söpsot kïtagh kukön söpontöngwa kegh, wölo tökutwayta kegh Yeso nyo kima akututï ompö chane.

¹⁶Melö tökepimecha ye nyu chi anka tïkwïl ompö ara par, kïrkegh kimi ato kikipimacha Kristo ompö ara por, wölo melö tökeghecha ye nyu ngat lenyoni.

¹⁷Kïlenyona nyu ato tuyö kegh chi anka tïkwïl nko Kristo kïkalïkwï nyinte ighan nyo rel, kikuwer ngala köny, ketï otöp nyo rel.

¹⁸Ighöy Tororöt choni löwïr, nyo kelinyecha kelïkuna kongotichi ompö Kristo, akïkonecha achey nyo kilinyot tïkwïl pikö walaka nko nyinte.

¹⁹Poru nyoni lö kilinyö kegh Tororöt nko pich ompö Kristo amelö kitökuyityï Tororöt chane ngokikwa. Kökonecha kemwatïtena ngölyontononi kilinyot pich nko nyinte.

²⁰Kïchicha nyu kighyongtoghi Kristo ompö ngwïnyinï cho pöghisyegho Tororöt kïsoghsoghokwa kuwerwecha. Kïmitecha kesoghokwa nyoman ompö Kristo lö olinyenö nko Tororöt.

²¹Melö kitïng Kristo ngokï, wölo kigh Tororöt nyinte kupar ngokicha atömanyïn kelïkwï pich cho tenote ompö Tororöt otini kakïtuyö nko nyinte.