Read pokoot 2 KORINTO 6 Bible Online

2 KORINTO 6 - pokoot bible

2 KORINTO 6

¹Kïle nyu otini kïchicha pich cho kïpöghisïyi nko Tororöt, kïsoghokwa nyoman lö makany kupot kwïle pöropcho Tororöt.

² Mwoghöy Tororöt lö, “Kyoterunyi ompö asis kimïchinote, angarakinyi asis nyo ki pö sörunöt!” Atera nyu! Pöroyïn nyo chömunote nyete! Asispa sörunöt nyete!

³Melö kïmökecha ketöne matankïl ara chi anka tïkwïl atömönyorï pöghisyencha kigheghchin.

⁴Nyinö kötö kighecha lenyoni, keporucha kegh lasiny lö kïchicha mötwori Tororöt ompö kïgh anka tïkwïl nyo kighecha ompö mïkukönöt nyo wow ompö osiswo kichopat nko kömpölelyö nko nyarïl.

⁵ Kakïmungecha aketorchecha chela, kakïchilecha ompö tawu pich, kakitungenecha ighisyewut kyoghochenö akepa kïpuryö rïwön anta omisyö.

⁶Kakiporucha kegh lö kïchicha mötworï Tororöt ompö tïlilyo mïkulögh nko kinkïtöt nko kamaghat nko tölosyö ompö Mïkulögh nyo Tïlil ompö chomnyencha nyo möminye lïsata,

⁷ompö amtaghtancha nyo pö man nko ompö owesyo Tororöt. Lïku man karicha cho kïporyegho akeripo kegh ompö ewu tagh nko nyo pö löt.

⁸Kïmitecha kïpsach kekonyïtech anta kïkonech arasï. Kïsalecha akechïpecha. Kïlatecha lïsï akwanyï kïngölonecha ngala man.

⁹Kïlatecha pich cho mörumucha akwanyï nkïtecha pich tïkwïl, kïlatecha pich cho kimeghö, wölo kïchicha söpchote lasiny kïle otini osïwïyekwa, kïlatecha pich cho kichopöy kong, wölo tomönye keparecha.

¹⁰Kïrkegh kelatenacha pich cho wongu wölo kïngöreksocha kïtenö osis. Kïlatecha mey cho tïryolöch, wölo kimökosecha pich cho chang, kïlatecha pich cho kïmitö kïtuw akwanyï kïtïngetecha kïgh anka tïkwïl.

¹¹Kakïngalanacha nko akwa kïlöpo, werköcho pipö Korinto akï möminye kïgh nyo kakïwïnchicha mïkulöwecho.

¹²Ato asïwekwa kïgh anka tïkwïl nyo le tömölöwon ompö kwenunkwa nko acha, kïmi kïyoni okuntönkwa melö okuntöncha.

¹³Ongölonwokwa ye le ato ongölonchinan monechu akany ya kïyotisyö mïkulöwekwa lasiny ompö acha le wölo kikidecha chicho.

¹⁴Monomnyotö nko pich cho meghönöcha Tororöt, ompöwölo memukonye. Muköy lö ne köromnyö kïnomnyotoy nko ghöyïn? Anta tïng ghamtagh ne löpoyïn nko tuwïn?

¹⁵Anta lïmchinot Kristo* nko Onyöt ompö or ne? Tïngeto ghömïchö ne chi nyo ghanate nko nyo melö ghanate?

¹⁶ Tïngeto tïlyantan ne Kö pö Tororöt* nko körkeyïntino putintön? Ompöwölo kïchicha Kö pö Tororöt nyo satate. Kïle wölo mwoytoy nyinte Tororöt lö, “Oghan möngenyu orito pikachu, atöponan nko chane. Olïkunan Tororötïngwa, kïlïkwï chane piköchan.”

¹⁷Nka nyoni mwoghöy ngat Echotyon lö, “Angetena kwenungwa, apesyö nko chane. Maswany kïgh nyo le sïmnyon, atatarokokwa.

¹⁸ Olïkunan Paponkwa alïkukwa werköchan mwoghöy Echotyon Kimuktoghin.”