Read pokoot 2 KORINTO 7 Bible Online

2 KORINTO 7 - pokoot bible

2 KORINTO 7

¹Kïlenyona nyu, werköcho, otï kakekonecha kiyomisutchï löwïr, ketïlilö nyu kegh akewirta kïgh anka tïkwïl nyo muköy kusïmnyonöy por nko mïkulögh atökelïkuna pich cho tïlilöch lasiny ompö techata Tororöt.

²Kïsoghecha akwa lö okonecha pöroyïn ompö mïkulöwekwa! Tomönye kelelchinöcha chi anka tïkwïl akïtomönye keghchinöcha chi anka tïkwïl kïgh nyo gha anta kïlïs.

³Melö kamwaghan ngalechoni lö torwokyï chi, ompöwölo kïle ataye kyanyaghan amwagh lö, kïchicha kongotikwa amitekwa mïkulöwecha nyo ato kïmeghö, kemeghö tïkwïl anta kïsöpchö kesöpchö tïkwïl.

⁴Otïngetan kighanat nyo wow otete ongölonan nko akwa akwolonokwa kegh akwa nyoman! Kinyïghitanïn saghsaghata nyo wow tya, akwompö nyörilwokökwa otïngetan ngörekyö nyo mamïnïng.

⁵Kïrkegh otini kikitïtecha Makedonia kïmelö kikïsïköcha kimïny. Kimi kömpölelut woptin löwïr: kikïsyalacha nko pipö sany, kïmi kiwaghata mïkulöwecha ori.

⁶Wölo kikonecha Tororöt kingaraka nyo soghsoghöy pich cho nyörkölöl ompö kingwïnata Tito.

⁷Amelö ompö kingwïnata Tito onkït, wölo ompö kikilöt tïkwïl nyo kyokilökwa nyinte. Kömwowecha nyinte wölo amatakwa emö ani kïlïkwï nko wölini otïngetekwa otyogh nko wölo omitekwa kïpsach osöröpkanïn kïlïkwï, ochan ye nyu ngarakate tya.

⁸Ompöwölo kïrkegh kighakwa palalyantanoni kyakiran owongunö, wölo melö ogheghchinan kegh lö opï okiröy, kïrkegh kitogheghchinan kegh ntökyasïwan lö kighakwa owongunö ompö osis cho te.

⁹Ochan ye nyu ngarakate amelö ompöwölo kyowongukwa wölo ompöwölo kighakwa kiwongunötononi onyorunö kötogh. Kyowongukwa kïrïp kegh nko tötutyo Tororöt, melö mi nyu kïgh nya kakighwakwa.

¹⁰Ompöwölo ipu kiwongunötö nyo pöghisyegho Tororöt waghakata mïkulögh, waghakat nyo ipu sörunöt akï möminye otyogh ompö nyoni! Wölo ipu kiwongunöto ptangengmöt meghat.

¹¹Arose köny, kïgh nyo kigh Tororöt ompö kiwongunötenkwa kïrïp kegh nko tötutyenyi. Rose lö keghakwa ye okilö kegh tya ompö orinkwa, akwighakwa osïkö machat nyo tya nyo poru lö ochikwa kïltït! Kyonörekyekwa awöghisyö. Omitekwa onoghyot, amitö kïpsach asïwena lö kegha man. Kokïniniekwa nyu ompö or anka tïkwïl lö motïngetekwanye lelut ompö ngölyontononi.

¹²Kïlenyona nyu, kïrkegh kyakirwakwa palalyantanoni, kïmelö ompö chichoni kilel anta nyo kikïmïr kwïle. Kyakiran atökïrumteghö tawu Tororöt kïlöpo lö omitekwa okilöy kegh ompö acha.

¹³Kïyoni nyo kikonecha saghsaghat. Amelö ompö saghsaghatanoni onkït, wölo kighecha Tito tïkwïl kengörekyenö tya ompö ngörekyö nyo kyaghakwa nyinte kïturön.

¹⁴Kyokwolokwa nyoman ompö tawunyi amelö mi chi nyo kilïsanïn ompö kwolötononi. Kïmitecha kemwowokwa ngala man kïtenö osis nka nyoni poru lö man kwolötononi kikïmwochicha Tito.

¹⁵Nka nyoni mi kïtöso chomnyenyi ompö akwa otini nonöy wölini kyatachtekwa löwïr nyinte ompö kiwaghat nko potanat.

¹⁶Ochan ngarakate nyoman, ompöwölo otïngetan kighanat ompö akwa ompö ngölyon anka tïkwïl.