Read pokoot KALATIA 2 Bible Online

KALATIA 2 - pokoot bible

KALATIA 2

¹ Kïkany kuwer könyiswö cho le taman nko angwa, amïlan Yerusalem ngat nko Parnapa, amïtwan Tito.

²Kyorutan lenyoni ompöwölo kyonyorwan kiporunöt nyo kingongwanïn Tororöt lö, mïchini owan. Kïkany otini kikïtuyechïcha ato le sirö nko kintöghoghï amwochan chane Lökoy cho Karamach cho kyomchinan pipö Punton. Kyaghan lenyoni ompöwölo kimomökanye ighisyenyan nyo kyaghan tagh nko nyo kitoghan kïwiröy wuw.

³Kïrkegh ki chi pö Krik Tito nyo kyorutonan tïkwïl, wölo melö kimi chi nyo kichikyï nyinte kïwö tum,

⁴kïrkegh kimito pikö walaka cho kigh kegh lö, kïchï kighonï akwanyï kichö ghotï chane. Kipka pïchoni kunkïtï kityakat nyo kikïtïngetecha ompö nyoryencha nko Kristo* Yeso kïmach chane kwighecha sekey,

⁵wölo melö kikitönöcha pöroyïn chane nyonikïny atökumï manpa Lökoy cho Karamach kïtöpö nko akwa kïnomnyö.

⁶ Wölo melö kïgh ompö ani pïchoni kïsïwïyi lö, kintöghoghï ato kö kintöghoghï chane nyoman anta ewo, ompöwölo melö rwokyini Tororöt ompö tïkwïn cho kïsïwïyi, amwoghan lö melö kitïng kintöghoghichoni kïgh nyo kitöswanïn.

⁷Wölo nyinö kitölïku nyoni, kïpköchï chane lö, kikïyonwanïn Tororöt omchï pipö punton Lökoy cho Karamach le wölo kiyonï nyinte Petro tïkwïl kungwïn kwomchï pipö Yaudi.

⁸Ompöwölo kikonanïn Tororöt kimukat owö omchï pipö Yaudi Lökoy cho Karamach le wölo kitö nyinte Petro tïkwïl kimukat kwomchï pipö punton Lökoyechoni Karamach.

⁹Kïkany kunkïtï Yakopo nko Petro nko Yoana, cho kökikesïwa lö, kïntöghoghï lö, kikonanïn Tororöt pöropchononi, kïnamecha ewun ani nko Parnapa atökuporï lö, kïmitecha ghömïcho. Kechomnyechicha löwïr lö, kïpetecha kepöghisyechini pipö punton kïpa chane kïpöghisyechï pipö Yaudi.

¹⁰Wölo kitepecha chane kïgh akonga lö, tömökïwutyeghecha mey. Kïgh nyo kyomitan onoghyegho oghöy.

¹¹Wölo otini kitï Petro Antiokia achilan nyinte ompö tawu pich, ompöwölo kilelate nyinte nyoman.

¹²Ompöwölo kitökwomisïyi Petro nko piko puntoni walaka otini kitomöcha kwitï pich cho kiyonï Yakopo. Wölo otini kitï pïchoni pö puntoni walaka kïtagh kwomisyö nko chane ompöwölo kiwagh pich cho kimököy lö töpa tum pipö punton tïkwïl.

¹³Kuwöghisyö nyu werköcha walaka cho pö Yaudi akïsöröpchï Petro ompö otöpnoni pö lïs. Melö kichïwïta Parnapa tïkwïl lïsatengwa.

¹⁴Otini kyasïwan nyu lö melö kitenate chane kïrïp kegh nko manpa Lökoy cho Karamach, omwochan Petro ompö tawu pïchoni löwïr lö, “Ato irïpenyi nyo le nyi nyo ichï chi pö Yaudi otöptineko pikö walaka amelö otöptino pipö Yaudi, imukenyi nyu lö, ne mukyine chikyine pipö punton kïrïpöy otöptino pipö Yaudi?”

¹⁵Kïchicha achane pipö Yaudi ompö yïyö amelö kïchicha piko puntoni walaka cho le mwokïyis.

¹⁶ Wölo kinkïtöcha nyoman lö melö tenöy chi nko Tororöt ompöwölo rïpöy nyinte kirurut, poto pat ato ghan Yeso Kristo. Akakeghanacha tïkwïl Kristo Yeso atökemuka ketena nko Tororöt ompö kighanat ompö Kristo amelö, ompöwölo kakighacha tïkwïn cho mököy kirurut. Ompöwölo möminye chi nyo tenöy nko Tororöt ato igh tïkwïn cho mököy kirurut.

¹⁷Kïkany nyu ato kimukyicha keten nko Tororöt ato kïtuyecha nko Kristo, kerumucha nyu achane lö, kïchicha mwokïyis, poru so nyu lö, söröpchini pich Kristo kwigh ngokï? Ewo!

¹⁸Wölo ato atechan ngat kïgh nyo kökanganyan, kuporu nyoni lö ochan ante lelin.

¹⁹Ompöwölo kyameghan ompö kirurut. Kirurutchoni cho kiparanïn atömanyïl osöpön ompö Tororöt.

²⁰Kikïwudochanïn kimurtöwon nko Kristo, wölo ochan ye satate amelö tökwani ngat, wölo Kristo nyo satate ompö orinyan akï söponete otïngetan ye ompö por, otïngetan ompö kighanat nyo ngwïno Wero Tororöt nyo kichamanïn akïkonï söpontanyi ompö ani.

²¹Mochömanye otöghöy pöropcho Tororöt, ompöwölo ntökitenöy chi nko Tororöt ompö kirurut, kï kima nyu Kristo kwïle!