Read pokoot KALATIA 3 Bible Online

KALATIA 3 - pokoot bible

KALATIA 3

¹Heywey sölwöyichï pö Kalatia! Ngo nyo kapanakwa akwa chanye kikitö Yeso Kristo* tawuto konyikwa asïwekwa lö, kikïwudochï kimurtöwon?

²Omwowante ngölyon akonga ya köny: ekyatachakwa Mïkulöwu Tororöt ompö ighisyewut pö kirurut taghanakwa nya anta ompö lïmata Lökoy cho Karamach?

³Kichö ochikwa so sölwöy lenyoni? Nyanye kyotorekwa Mïkulöwu Tororöt, omökekwa so ye nyu owonyteghone owesyengwo kegh?

⁴Kyowongunekwa so tïkwïn cho chang kwïle? Ato kwïle nyoman!

⁵Ekïkonokwa Tororöt Mïkulöwunyi akwigha töngönchintin kwenunkwa ompöwölo kaghakwa tïkwïn cho möchokwa kirurut oghe nya anta ompöwölo kyalïmakwa Lökoy cho Karamach, aghanakwa?

⁶ Anane Apraam köny, le wölo mwoghöy Kikirut lö, “Kighan nyinte Tororöt, kuyit Tororöt ompö kighanatenyi lö, chi nyo tenate.”

⁷ Nyo mïchinokwa ye nyu onkïtune lö, monïngo Apraam kegh pich cho tïng kighanat.

⁸ Kinya Kikirut kïngor lö ighöy Tororöt pipö punton kutenöy nko nyinte ompö kighanat. Nka nyoni kinya Kikirut kïmwochï Apraam Lökoy cho Karamach lö, “Soyönöy Tororöt punton löwïr ompö nyi.”

⁹Nka nyoni kisoyönöy pich cho tïng kighanat nko Apraam nyo kighan.

¹⁰ Wölo chïpote chane tïkwïl cho körtegho kegh ighisyewut pö kirurut. Ompöwölo mwoghöy Kikirut lö, “Kïchïpöy chi anka tïkwïl nyo mörïpönye akwigh tïkwïn löwïr cho kikikir kitapu Kirurut.”*

¹¹ Rumu ye nyu lö möminye chi nyo tenöy nko Tororöt ompöwölo kikikir lö, “Söpöy chi anka tïkwïl nyo kakegh kuten nko Tororöt ompö ara kighanat.”

¹² Wölo lowöch kirurut nko kighanat, ompöwölo mwoghöy Kikirut lö, “Söpöy chi nyo puntoy kïgh anka tïkwïl nyo mököy kirurut.”

¹³Wölo kityakenecha Kristo chïpo kirurut otini kikasan nyinte chïpononi ompö acha. Ompöwölo mwoghöy Kikirut lö, “Chïpote chi anka tïkwïl nyo kiwuso ket.”

¹⁴Kigh Kristo lenyoni atömanyïl ketö pipö punton kisoyönöto Tororöt nyo kiyomisyï nyinte Apraam ompö ara Kristo Yeso atömanyïl ketakacha Mïkulöwunoni kiyomisï Tororöt ompö ara kighanat.

¹⁵Omökan werköcho, opöghisyeghone körkeyïn nyo kïpöghisyegho kïnomnyö, ato chomnyechï pich odeny ngalekwa akukïniniö ompö kikirut, kïmelö mi chitö anka nyo muköy kïpenyöy anta tas kïgh kikirutchoni.

¹⁶Kimwochï nyu Tororöt kiyomisutkachi Apraam nko yiyenyi. Melö mwoghöy Kikirut “yiyutkachi,” le ato kösïgh cho chang, wölo lentöy “yiyenyi,” nyo poru chi akonga, nyoni kï Kristo.

¹⁷Kïyoni omökan omwoghöy kï nyï: kyam Tororöt muma* nko Apraam akukïniniechï lö, ripöy nyinte mumanoni. Memuköcha nyu kirurutchoni kipka könyis 430 ato le löt kïwöghököy mumanoni kïlïku kwïle akimelö kimuköy kïwöghököy kiyomisötononi.

¹⁸Ompöwölo ntökitwoytoy kegh ropöwonto Tororöt kirurut, kitömelö kitötökutwoytoy kegh ngat kiyomisötenyi. Wölo ki ompö kiyomisötenyi nyo kigh Tororöt kutö Apraam ropöwontononi.

¹⁹Ki ne nyu cheröto kirurut? Kikïtas atökuporï lö ne penyata tökïtenö kwitï yïyononi pö Apraam kikitö kiyomisötononi. Ki malayken cho kipï kirurut ngwïny kuwerï chi nyo kilïkwï kituyoghin.

²⁰Melö kïmököy nyu kituyoghin ompö ngölyon nyo swongöy kegh nko chi akonga, wölo akonga Tororöt.

²¹Poru so nyoni lö, poryegho kirurut kiyomisut pö Tororöt? Ewo! Ompöwölo, ntökikitö pich kirurut cho muköy kïkonu söpon, kötökimukecha nyu löwïr ketene ompö tawu Tororöt ompö kirurutyononi.

²²Wölo mölechachoni, ompöwölo kakïmwowï Kikirut lö, mi ngwïnya kïmïkul pöyunöto ngokï atömanyïl ketö pich cho ghönöy Yeso Kristo ropöwontononi kikiyomisï chane.

²³Wölo otini kitomönye kwitï kighanatanoni, kïratecha kirurut tökïtenö kengongwï kighanatanoni kitökungwïnöy.

²⁴Kïpaytecha nyu kirurut tökïtenö kwitï Kristo atömanyïl keyitwech man ompö tawu Tororöt ompö kighanat.

²⁵Kïkany ye otï kakwitï kighanata kïmelö tökïpöytonecha kirurut ngat.

²⁶Kalïkukwa löwïr monïngo Tororöt ompö kighanat otini kotuyekwa nko Kristo Yeso.

²⁷Ompöwölo kikipötisönchokwa löwïr Kristo alakakwa nyu nyinte.

²⁸Mökïminye nyu ngat sisïn kwenu chi pö Yaudi nko chi pö punton anta kwenu sekeyon nko nyo tyakate anta kwenu mïrön nko korka. Kalïkukwa löwïr kïgh akonga otini koghömekwa nko Kristo Yeso.

²⁹ Ato kalïkukwa yïyo Kristo, kïkalïkukwa nyu yïyo Apraam cho omïlöy tïkuchoni kiyomisï Tororöt.