Read pokoot KALATIA 4 Bible Online

KALATIA 4 - pokoot bible

KALATIA 4

¹Wölo omökan omwoghöy lö, otini tökïmïnïng mïlin, kïmelö sis nyinte nko sekeyon kïrkegh kö chechi tïkwïn löwïr.

²Mito pich cho ripöy akughyongchï tïkuchi ntökïtenö kwitïta otini kimwowï paponyi.

³Kïlenyoni tïkwïl, otini kitökechicha monïng kikïchicha sekeyo oy cho pöytoy wölnö le mïröt.

⁴Wölo otini kitï asisoni kikyomchï ngamata, kïyonï Tororöt Werïnyi kegh nyo kiyï korka kïrïp kegh nko kirurut pö pipö Yaudi,

⁵ atökutyak pich cho kipöytoy kirurut atömanyïl kemukacha kelïkwï werpö Tororöt.

⁶Kiyonï nyu Tororöt Mïkulöwuto Werïnyi kïlït mïkulöwecha, riröy Mïkulöwunoni lö, “Papo, Paponyu.”

⁷Melö techinyi nyu sekeyon ngat, wölo kelïkunyi wero Tororöt. Ato kelïkunyi wero Tororöt, kïkoninyi Tororöt tïkwïn lapay cho kikïrorchï nyinte monechi.

⁸Kimonkïtökwanye Tororöt atanya le tagh, opöghisyechikwa nyu tororötin cho kimelö tororötino man.

⁹Wölo otï le ye konkïtukwa Tororöt anta kïmwa köny lö, otï kakunkïtwokwa Tororöt, omukekwa lö ne ngat omïlonchone wölini mi mïkulischoni nyörkölölech le mey pö ngwïnyinï tamachakwa kwighakwa sekeykökwa ngat?

¹⁰Tomitenökwa oripe osis nko aro nko otöptino pöghetus nko könyis!

¹¹Kawaghan lö manan kiwir wuw ighisyonanya kyaghan ompö akwa.

¹²Osomokwa nyoman werköcho lö, otïpinö le wölo alatan, ompöwölo otöponan tïkwïl le akwa. Tomönye olelchanïkwa nyonikïny.

¹³Onkïtökwa lö ki kösotyenyan nyo kighanïn omwokwa Lökoy cho Karamach panto tagh.

¹⁴Wölo kïrkegh kyonyorunekwa tyamat nyo wow kösotyenyan mataghanïkwanye, wölo kyatachanïkwa le nyo kitö otochekwa malaykayanta Tororöt. Kyatachanïkwa le nyo kitö otochekwa Kristo* Yeso.

¹⁵Kyochikwa ngörechote kuchumï ne ye nyu? Ompöwölo osöwintönwokwa lö, tökile nyo kimuko, kitö oködötunekwa konyikwa, akonanïn.

¹⁶Kawaghakan so ye nyu alïkwï punyontenkwa otï omwowokwa ngala man?

¹⁷Mi pïchoni walaka kuporu lö sïngenokwa chane lasiny, wölo melö ompö machat nyo karam. Möchöy chane kupesyonanïn nko akwa atasïngenakwa nyu chane.

¹⁸Mïchini kesïch ye nyu machatanoni karam kïtenö osis ato karam keröte amelö otini omitan nko akwa pat.

¹⁹Monechu cho mïnkech, otïngetan ngwonïn ompö akwa nyo lata nyo pö kama monïng nyo karich kïlusyö tökïtenö kwitïta ato rumuno Kristo orinkwa!

²⁰Wechï kötö omökan omitö nko akwa ye nyo kötö osïkan kinonut nyo sis ompö akwa. Ompöwölo otïngetan kisusöt nyo wow ompö akwa.

²¹Akanye ya köny atepakwa chona omököy kïpöytonokwa kirurut lö: olïmekwa kïgh nyo mwoghöy kirurut nya?

²² Ompöwölo mwoghöy Kikirut lö, kitïng Apraam wor odeny, kisïkö anka korka nyo le sekeyon, kïsïkö nyo pö odeny korka nyo le taran.

²³Kikïyï weri nyo pö sekeyon le wölo kïyïytoy monïng löwïr, wölo keyï nyay pö taran kïrïp kegh nko kiyomisöto Tororöt.

²⁴Kïmwoghöy ngalechoni ompö körkeyïn. Karkegh koruchoni kwodeny nko mumen odeny. Karkegh kiyomisöte nyo tagh nko nyanya kikigha kutïng pö Sinay, nyo töpo ato mi Akar akeyïchini monechi sekeynön.

²⁵Ompöwölo karkegh Akar nko kutïng pö Sinay nyo mi koro Arapia akekongityot nyoni nko Yerusalem nyo pö ye nyo le sekeyon nko monechi.

²⁶Wölo tyakate kanasyanta Yerusalem nyo pö parak akï yoncha nyinte.

²⁷Ompöwölo mwoghöy Kikirut lö, “Ngaraka korka nyo ichï sonö, nyo kimeyïy monïngo. Tegha airir ompö ngörekyö, nyo kimenyorï ngwonïn pö lusyogh. Ompöwölo chang monïng korka nyo kakityak kïtïl korka nyo mi nko santenyi.”

²⁸Kalïkukwa nyu ye, werköcho monïngo Tororöt kïrïp kegh nko kiyomisötenyi le wölo kilata Isak.

²⁹ Wölo kichop kong osiswechoni monïngoni kikïyï ompö ara por montö nyinö kikïyï ompö owesyo Mïkulögh nyo Tïlil nka nyï ighisyot lenyoni osiswechete.

³⁰ Wölo mwoghöy ne Kikirut? Lentöy, “Yona kokononi le sekeyon nko werïnyi. Ompöwölo mömïlönye mompö sekeyon tïkwïn nko mompö taran.”

³¹Kïlenyona nyu tupchenichu, melö kïchicha monïngo sekeyon wölo kïchicha monïngo taran.