Read pokoot EPESO 2 Bible Online

EPESO 2 - pokoot bible

EPESO 2

¹ Kyochikwa ato le tagh pich cho kimeghö, ompö tighintön nko ngokï,

²cho kyaghakwa atakinya kyorïpekwa otöp pö ngwïnyinï nyo gha, aterchini pöytoghinto oy nyo mi wölnö le mïröt, mïkulögh nyo le sïmnyon, nyo pöyu pich cho töghöy Tororöt.

³Kikïlatecha tïkwïl choni, kikïrïpecha möchutko porwöyicho akegh kïgh anka tïkwïl nyo kimököy porwöyicho nko kinonutköcho. Kikïchicha monïngo nörekyo Tororöt le pikö walaka.

⁴Wölo tïng Tororöt kisyonöt nyo wow. Kichamecha nyinte ompö chomnyogh nyo wow nyoman

⁵nyo kïrkegh otini kitökechicha pich cho kimeghö ompö ngokicho, kwighecha nyinte kesöpchenö nko Kristo.* Kikïsörwokwa ompö pöropcho Tororöt,

⁶akwïghecha ketutunö nko nyinte akïkonecha kelïnyenö nko Kristo Yeso, atöketïpinö nko nyinte wölnö le yïm,

⁷tökuporï ompö könyis cho pkonöy wölo tenö sïkönöteto pöropchenyi nyo pö kisyönöt ompö acha kuwerï Kristo Yeso.

⁸Ompöwölo kikesörwokwa ompö pöropcho Tororöt ompö ara kighanat. Melö ompö ara ighisyewutkökwa, wölo ropöwonto Tororöt,

⁹melö ompö ighisyewut atömötöp chi anka tïkwïl tökïkwol kegh.

¹⁰Kïchicha ighanpa Tororöt kighecha nyinte ompö Kristo Yeso, atökegha ighisyewut cho karamach cho kisötwecha nyinte kegha könyisyok.

¹¹Kyochikwa ato le tagh, pipö punton cho kïkurenok, “Sompen,” kïkurö kegh pipö Yaudi, “Sorngony” (poru ngalechoni tïkwïn cho kighchini chane porwöyikwa). Anane wölo kyalatekwa ato le tagh.

¹²Onkïtï lö kyochikwa lowöch nko Kristo osiswechoni, kyomitekwa sanypa pipö Israel. Kyochikwa pïnot akimoghönekwanye kïgh ompö kiyomisut pö Tororöt. Kimotïngetekwanye kikönöt akimononekwanye lö mi Tororöt ngwïnyinï.

¹³Wölo ye, akwa cho kyochï lowöch nyoman ompö Kristo Yeso, kikenokunekwa arikuna ompö meghenyi.

¹⁴Ompöwölo nyinte nyo keghecha kenyorunö kalya, otini kigh pipö Yaudi nko pipö punton kïlïkwï kïgh akonga, akunyar ompö meghenyi punyontön nyo kipesyot chane le nayat.

¹⁵ Kiwang nyinte ompö meghenyi kirurut pö pipö Yaudi nko kinetutkökwa atömanyïl kwighuna puntonichoni kwodeny chi akonga cho tïng otöp nyo rel cho kakelinyö nko nyinte, akwompö aranoni kwipï kalya.

¹⁶ Atö kuwany megha Kristo punyontönengwa ompö kimurtöwon, akumï kunyoryö puntonichoni kwodeny kïlïkwï por akonga akuyokwï chane kïmïlisyö wölo mi Tororöt.

¹⁷ Kingwïn Kristo akwomwokwa Lökoy cho Karamach cho pö kalya, akwa chona ochï pipö punton cho kyochï lowöch ompöwölo mi Tororöt akwomchï pipö Yaudi cho kilekïtö Tororöt.

¹⁸Kimukecha ye nyu ompö ara Kristo kepete tawu Tororöt kuwerï Mïkulöwunoni le akonga, kïrkegh kechicha pipö Yaudi anta pipö punton.

¹⁹Kïlenyona mochikwanye ngat pipö punton pïnot nko to, kalïkukwa ye pipö möngot akonga nko pipö Tororöt, pich cho omitö Kö pö Tororöt.*

²⁰Kiketekyokwa paraku kitoröto kiyoktoghï nko werkoy akï nyinte Yeso Kristo nyo le kado luch.

²¹Nyinte nyo tighöy teksye kïmïkul akwigh kïyetï kïlïkwï Kö pö Tororöt nyo tïlil.

²²Kïmi ketekokwa tïkwïl alïkuna akonga nko nyinte aketekokwa nko pikö walaka alïkuna möngo Tororöt kuwerï Mïkulöwunyi.