Read pokoot EPESO 3 Bible Online

EPESO 3 - pokoot bible

EPESO 3

¹Nka nyï ochan ani Paulö, ratana Kristo* Yeso ompö parakunkwa, pipö punton.

²Oghönan lö onkïtökwa nyoman lö, kikonanïn Tororöt ighisyonï agh ompö pöropchenyi ompö tösunötenkwa.

³Kighanïn Tororöt onkïtï tötutyenyi nyo wïngate. Kakiran ngalechete ompö töngoghyö,

⁴ nyo ato osomönökwa ngalechete, omukekwa onkïtune wölo kipköchtanïn wïngutyononi pö Kristo kïlïkwï.

⁵Kitomönye kupurchï Tororöt pich könyisok kunkïtï wïngutyononi, wölo köngongchï ye Tororöt kiyoktoghï cho tïlilöch nko werkoykachi.

⁶Nka nyoni kinyorï pipö punton tïkwïl karerantangwa nyo pö kisoyönöto Tororöt le pipö Yaudi kuwerï amtaghta Lökoy cho Karamach, ngichayay chane cho pö porini le akonga. Akï ghömtoy chane kiyomisötonini le akonga kigh Tororöt kuwerï Kristo Yeso.

⁷Kikighanïn alïkwï mötworinto Lökoyechete Karamach ompö ropöwon nyo kikonanïn nyinte ompö pöropchenyi kïpöghisyeghö orinyan ompö kimukatenyi.

⁸Kikïkonanïn kïrkegh ochan mïnïng nyoman kïtïl pipö Tororöt löwïr, wölo Tororöt nyo kikonanïn pöropchö omchï pipö punton Lökoy cho Karamach cho pö sïkönöto Kristo nyo möminye söröm,

⁹atoporchï pich löwïr kunkïtï wölo lata tötutyö nyo pö wïngat nyo kiwïny Tororöt nyo kigh tïkwïn löwïr kingeta könyisyok,

¹⁰atömanyïl kegh pöytoghi malayken nko wowïntin cho yïmwöy, otï le ye kuwerï kanisa, kunkïtï ngöghomnyo Tororöt nyo rumu ompö ortïn cho chang.

¹¹Kigh Tororöt lenyoni kïrïp kegh nko machatenyi nyo pö könyisyok kokay nyo kitat nyinte ompö ara Kristo Yeso Echotyontenyo.

¹²Otini kikilinyecha kegh nko Kristo kemantech kegh nyinte, akesïköcha nyakanat kelïtö wölo mi Tororöt, ompöwölo kighönecha nyinte.

¹³Osomokwa ye nyu lö, makany kïmeghyok mutïnö ompö kiwongunöt nyo otïngetan ompö akwa, ompöwölo pö nyoni ororyenkwa.

¹⁴Okïtïngan nyu osoghöy Papo,

¹⁵nyo ighöy pich löwïr cho mi yïm nko cho mï ngwïny kïsöpchö,

¹⁶kïkonok le wölo lata sïkönöteto ororyenyi, kïkonokwa owesyö nyo kilok ompö ara Mïkulöwunyi talïkuna pich cho chïchïmote ompö oringwo,

¹⁷atökïmang Kristo mïkulöwekwa ori ompö ara kighanat. Osoghan owudenökwa ighin akepintitakwa ompö chomnyogh nyo ghyongote.

¹⁸Osïkekwa nyu owesyö nko pipö Tororöt lapay, ankïtï wölo kiwetïtö kïlïkwï chomnyo Kristo, ompö töpesïn nko koghïn nko wölo kiwetïtö yïm akïwö ngwïny.

¹⁹Ankïtï chomnyo Kristo nyo molu chïreryö anka tïkwïl, akenyïghitak kipuntowut pö Tororöt löwïr kuwachta.

²⁰Nya kïsala nyinte nyo muköy kwighöy tïkwïn cho pö töngönchin kïtïl cho kïsomecha anta cho kinonecha ompö kimukata owesyö nyo pöghisïyi ompö orincha.

²¹Nya kïsïch Tororöt ororyö ompö kanisa nko ompö Kristo Yeso osis löwïr, kokay nko kokay! Amen.*