Read pokoot 1 TESALONIKE 2 Bible Online

1 TESALONIKE 2 - pokoot bible

1 TESALONIKE 2

¹Ompöwölo onkïtökwa tïkwïl, tupchenichu lö, melö kiwir wuw rutoghtöncha nyo kikïrutoghchicha akwa.

² Ankïtökwa wölanye kikichoptecha kong akemwaghecha ompö Pilipi. Wölo kikonecha tororötïnyo nyakanat nyo kyomwokwa Lökoy cho Karamach cho pkono wölo mi nyinte, kïrkegh kimi poryot nyo wow.

³Atanye kikïmitecha kemwowokwa Lökoyechoni Karamach, kïmelö kikïpöghisyeghecha putintön anta sïmnyontön amelö kikimukyicha kelïs chi nyonikïny.

⁴Wölo kïngalanacha kokay kïrïp kegh nko machata Tororöt, ompöwölo kichamecha nyinte akughönwecha Lökoy cho Karamach. Molenchï kegh kïmitecha keghöy tïkwïn cho mököy pich, wölo cho mököy Tororöt keghecha, nyinte nyo nkït mïkulöwecha.

⁵Onkïtökwa lö melö kikïpkanacha korenkwa kepï ngal cho kikïlïsecha pich anta kyamta Lökoy cho Karamach atökesïkenö kinyiwut wölo omitekwa, söwintencha Tororöt.

⁶Molö kikïyöronecha kwolöt pich anta akwa anta, pikö walaka, wölo kïle otini kichicha kiyoktoghi Kristo,* kitömïchinecha kesïkenö tïkwïn wölo omitekwa.

⁷Wölo kikïchicha tölose ompö kwenunkwa le yo nyo pöghöy monechi.

⁸Kïlenyona, ki wow chomnyencha ompö akwa nka nyoni kikïmitecha kïpsach kepara nko akwa, amelö Lökoy cho Karamach pö Tororöt opïn, wölo tökekonokwa söponwecha tïkwïl. Nka nyoni wölo kikïchamtecha akwa lasiny!

⁹Ononekwa tupchenichu, wölanye kikinoghyecha kïlïkwï, kikïpöghisyecha pöghet nko nangat atömökïkonokwa nïkisïn ompö omisyewut otini kikïmitecha kyomwokwa Lökoy cho Karamach cho pkono wölo mi Tororöt.

¹⁰Ochikwa söwï nko Tororöt tïkwïl nyo pö wölo kikïtöptecha ompö kwenunkwa chona ochï ghönote, ki tïlil otöptöncha akitenate nyo kimötïngnye kigheghchin.

¹¹Onkïtökwa lö kikighchicha chi anka tïkwïl ompö kwenunkwa le wölo köteghchini papo monechi kegh.

¹²Kikikilokwa akesaghsaghakwa, totïpinö otöp nyo chömöy Tororöt nyo kikurokwa apara Pöyunötenyi nko öroryenyi.

¹³Mi kïgh ngat nyo ighecha keyokyinö Tororöt sörö kïnomnyö. Atanye kikïpkanacha kyomwokwa ngölyonto Tororöt atakakwa, aghan, amelö le ngölyonto ptangengmöt, wölo le ngölyonto Tororöt akï ngölyonto Tororöt nyoman. Ompöwölo mi Tororöt kïpöghisïyi nko akwa chona oghönöy.

¹⁴ Tupchenicho, könyorwokwa ngalechoni ghach kinyorï kaniseni Tororöt cho mi Yudea cho kinyorï piko wöloni cho kikilïkwï pipö Kristo Yeso. Kichopokwa kong pikökwo le wölo kichopta chane kong pipö Yaudi,

¹⁵ kipar chane Echotyon Yeso nko werkoy, akuchopecha kong tïkwïl. Narekate Tororöt ompö chane nyoman, pung pö pich chane löwïr!

¹⁶Kimukyï chane kïtaghenecha kyomchinö pipö punton ngal cho ipchini chane sörunöto Tororöt. Kewanya chane aranoni ompö ngokikwa löwïr cho kighöy chane kïnomnyö. Wölo kechumchï ye nörekyo Tororöt chane.

¹⁷Kïkany acha, tupchenicho, kikïpesyecha nko akwa ompö osis cho ngorï ompö por melö ompö mïkulögh, wechï kyamecha emö kenyoryenö nko akwa ngat!

¹⁸Nka nyoni kikïmökecha kerutoghwokwa. Kyomökan ante Paulö orutoghchinokwa kïnomnyö, wölo kikartecha Onyötö.

¹⁹Ompöwölo, kötölïku ngo kikönötencha nko ngörekyencha nko kwolötencha, makwanye cho olïku kwolötencha nyo pö rïntagh ompö tawu Echotyon Yeso otini kamïla nyinte?

²⁰Owöy, ochikwa owesyencha nko ngörekyencha!