Read pokoot 1 TESALONIKE 4 Bible Online

1 TESALONIKE 4 - pokoot bible

1 TESALONIKE 4

¹Sörömuto choni nyu, tupchenicho, kyanetekwa kegh acha otöp nyo ngörökyini Tororöt. Akï nyoman komitekwa omöngisïyi lenyoni. Kïsomecha ye nyu akwa nyoman akesoghokwa ompö kaynata Echotyon Yeso lö, atasa tagh lenyoni.

²Ompöwölo onkïtökwa kinetutchanya kyalïmakwa kemwowunecha ompö Echotyon Yeso.

³Möchokwa Tororöt olïkuna pich cho tïlilöch, nyoni kï: kelowitö kegh cheporesnan.

⁴Mïchinokwa cho ochï mïrön onkïtunö wölo töptoy chi anka tïkwïl nko korkenyi ompö or nyo tïlil akï pö könyït,

⁵amelö ompö pïrchinogh pö por nyo gha le wölo lata puntoni walaka cho menkïtcha Tororöt.

⁶Mömïchininye nyu kïlelchï chi anka tïkwïl tupchenyi anta lïs nyinte ompö ngölyontononi. Kikïnyaghacha kemwowokwa tagh lenyoni akenyïlecha ngat kerirwokwa lö chopöy kong Echotyon pich cho ighöy ngalechoni.

⁷Melö kikurchecha Tororöt otöp nyo pö cheporesnan, wölo kikurchecha tïlilyö.

⁸Kïlenyona nyu, chi anka tïkwïl nyo sösöy kinetutchoni, kïmelö katagh chi, wölo katagh Tororöt nyo konokwa Mïkulöwunyi nyo Tïlil.

⁹Möminye machata kekirwakwa wölo ochömtoyekwa tupchenikwo cho kakughan. Kakunetakwa Tororöt nyinte wölo mïchinokwa achama kegh akwane kïlïkwï.

¹⁰Omitekwa oghöy ighisyononi pö chomnyogh ompö tupchenicho löwïr cho mi Makedonia kïmïkul. Nka nyoni kïsoghecha akwa tupchenicho lö, agha atas lenyoni kïtïl.

¹¹Amak lasiny otöp nyo mötïngnye kisusöt, mïchini chi anka tïkwïl kïsïnga tïkuchi kegh akwigh ighisyenyi ompö ewunechi le atanye kikïnyaghacha kemwowokwa tagh.

¹²Atamuka ompö aranoni osïkenö konyït pich cho tomöcha kughan Echotyon atömörörchok kïgh nyo omököy.

¹³Kïmökecha tupchenicho, onkïtunö ngala man cho pö pich cho kimeghö, mömïchininye owuronchenökwa ompö chane, le pich cho mötïngcha kikönöt.

¹⁴Ompöwölo kïtïngetecha kighanat lö kima Yeso akututï ketïngetecha kighanat ngat lö ighöy Tororöt pich löwïr cho kimeghö kututï ompö Yeso.

¹⁵ Kïgh nyo kïpetecha kemwokwa ye kï kinetutyo Echotyon nyo kimwa lö, melö kïnyoghecha cho tökechï sötote pich cho kikïmeghö asisoni mïlo Echotyon.

¹⁶Ompöwölo rökuno Echotyon nyinte yïm taghöy Tororöt kïmwowu ngölonöy malaykayan nyo wow akïlïm pich chöghöto konti Tororöt. Nyoghöy nyu kututu pich cho kimeghö ompö Kristo.*

¹⁷Atolapay ketuyecha cho kïchï sötote atoni nko chane ompö poltoy atöketarocha Echotyon ompö mïröt atöketïpinö nyu kokay nko Echotyon.

¹⁸Asaghsaghena nyu kegh akwane ngalechï.