Read pokoot 1 TESALONIKE 5 Bible Online

1 TESALONIKE 5 - pokoot bible

1 TESALONIKE 5

¹Tupchenicho möminye machata, akirwakwa wölo lïku ngala könyis nko osis.

² Ompöwölo onkïtökwa akwane lö itu asispa Echotyon le chorin nyo ngwïnöy oghö.

³Ato mi pich kïlentöy, “Mi pöghisyö nko kalya,” miröy nyu chane wïrata le ato itini kichïr korka nyo lusïyi amemuköcha pïchoni tökïchïwïtyöt!

⁴Wölo momitekwanye tuwïn cho le akwa, tupchenicho nyo mömïchininye kumirokwa asisini le chorin.

⁵Ochikwa lapay pipö löpoyïn achï pipö pöghet. Melö kichicha pipö oghö anta cho pö tuwïn.

⁶Kïlenyona, mökeruyö le pikö walaka, mïchinecha kechïkonchenö akeripsyö.

⁷Pich cho rusot kïrusot oghö, akïtömesyot tömösï oghö.

⁸Wölo kichicha pipö pöghet akïmïchinecha keripö kegh. Mïchinecha kelacha kighanat nko chomnyogh le longa nyo körtonecha takat nko kikönötencha nyo pö sörunöt le kopiyo karïn.

⁹Ompöwölo melö kikïlecha Tororöt atökewongunenö nörekyenyi, wölo kikïlecha atöketaka sörunöt ompö ara Echotyontenyo Yeso Kristo,*

¹⁰nyo kimeghenecha atökesöpchenö nko nyinte, ato kötökesöpchone anta kökikemeghö.

¹¹Kïlenyona nyu asaghsagha kegh angarak kegh akwane lenyoni omitekwa oghöy ye.

¹²Kïsoghokwa lasiny, tupchenicho lö, okonyïtö pich cho mi kïpöghisyewokwa cho ntöghoghchinekwa akunetokwa otöp nyo mïchini pipö Kristo kïrïp.

¹³Okonyïtö chane tya acham chane ompö ighisyengwa nyoni mi chane kwighöy atïpï chï le akwa ompö kalya.

¹⁴Akesoghokwa ngat tupchenicho lö, aneta pich cho le soson, akil cho nyökoröch, angarak cho nyörkölöl, amïkukön nko pich löwïr.

¹⁵Asïwa kegh tömeker chi ompö akwa kukerchï chitö anka ghöyityö ompö ghöyityö, wölo akanya kïlïkwï machatengwo nyo oghchini kegh nyo karam kïtenö osis aghchï pich lapay nyo karam.

¹⁶Ongörekyenö kïtenö osis,

¹⁷asagh Tororöt kïtenö osis,

¹⁸ayokyï nyinte sörö ompö kïgh anka tïkwïl. Ompöwölo machata Tororöt nyoni ompö akwa, otini kotuyekwa nko Kristo Yeso.

¹⁹Mopökek Mïkulögh nyo Tïlil,

²⁰masas werkoynön.

²¹Atyama tïkwïn lapay, akaman lasiny cho karamach

²²akïrö kegh kïgh anka tïkwïl nyo gha.

²³Nya kutïlilokwa Tororöt lasiny nyo konecha kalya ompö or anka tïkwïl akïrip mïkulöwekwa nko söponwekwa nko porwoyikwa atalïkuna pich cho melö tïng lelut ato mïla Echotyontenyo Yeso Kristo.

²⁴Ighöy nyinte nyo kikurokwa ngölyontononi ompöwölo ghanate nyinte.

²⁵Osoghwecha, tupchenicho.

²⁶Atakwesa chaman löwïr ompö kikonköyöt nyo tïlil.

²⁷Omwowokwa ngat ompö kaynata Echotyon lö osomönchinö chaman löwïr palalyantanï.

²⁸Nya kïtöpö pöropcho Echotyontenyo Yeso Kristo nko akwa.