Read pokoot YOSWÖ 10 Bible Online

YOSWÖ 10 - pokoot bible

YOSWÖ 10

¹Nyini kilïm Adonisedek pöytoghinto Yerusalem lö kinyar Yoswö kanasyanta Ai akïpar piko lömïs nko pöytoghintenyi akwigh le wölo kida Yeriko nko pöytoghintenyi. Akïlïm wölo kyamta mis pipö Kipyon nko Israel akïmang nko chane.

²Kïmïgh nyinte nko pikachi nyoman, ompöwölo ki wow kanasyanta Kipyon kïkarkegh nko kanasyan anka tïkwïl nyo mi pöytoghintö. Ki wow kïtïl Ai akiköromöch pikachi ompö poryot.

³Kïlenyona kïyonta Adonisedek pöytoghinto Yerusalem chi wölo mi Oam pöytoghinto Epron nko Piram pöytoghinto Yarmut nko Yapia pöytoghinto Lakis nko Depir pöytoghinto Eklon kïmwochï lö,

⁴“Apkana atangarakanïn kepara Kipyon, ompöwölo kyam chane mis nko Yoswö nko pipö Israel.”

⁵Kutuyö lïkoskökwa nyu pöytoghichi kï mut pö pipö Amori: pöytoghinto Yerusalem nko Epron nko Yarmut nko Lakis nko Eklon akïpusta chane kurich Kipyon akïporyeghö.

⁶Kïyonta pipö Kipyon chi wölo mi Yoswö ompö Kilkal kïlenchï, “Mepïstecha, nyonö lawel tesörwech aingarakech, ompöwölo kaghamïtï kegh pöytoghi pipö Amori löwïr chay möngöy koro komos tökïporyeghenecha.”

⁷Kïlenyona kïweghö Yoswö Kilkal nko pich löwïr cho pö lïk nko cho le nyökon.

⁸Kïlenchï ECHOTYON Yoswö, “Mewagh chane ompöwölo okonokwa rïntagh ompö chane, melö mi chi nyo le nyingwa nyo werïnyi tagh.”

⁹Kungwïna nyu Yoswö Kilkal kïyech nko pikachi akumir pipö Amori.

¹⁰Kikwangkwang ECHOTYON chane ompö tawu pipö Israel. Kïpar pipö Israel chane ompö pörsyö nyo wow ompö Kipyon akïyon kïpusta ara Pet Oron akïparata ntökwitïta Aseka nko Makeda.

¹¹Otini kiryagha tawu Israel, kirurtoy Pet Oron, kïropönï ECHOTYON koghi takarïs cho echön ompö yïm cho kiparata chane ntökwit Aseka. Kïmeghö chane cho chang ompö takarïs kïtïl cho kipar pipö Israel chok.

¹²Atolapay kïngölonchï Yoswö ECHOTYON asisini kitö ECHOTYON pipö Israel rïntagh ompö pipö Amori. Kïlö Yoswö ompö tawu Israel, “Nyi asis ghyongö ompö Kipyon, nyi arawa ighyong ompö mpöghoghyo Ayalon.”

¹³Kughyö asis nko arawa ntökïtenö kutökisyö ompö pungkökwa le ato kikekirchï kitapu Yasyar. Kughyongö asis kwenu yïm amöröytönye lawel nyo ngata asis akonga kwimön.

¹⁴Melö kimito asis nyo karkegh nko nyoni ompö osis cho kikuwer amökïrumïnye asis anka nyo kiterchï ECHOTYON ptangengmöt. ECHOTYON nyo iporyechï pipö Israel.

¹⁵Atolapay kïmïla Yoswö nko pipö Israel löwïr kutang möngengwa ompö Kilkal.

¹⁶Kïryagh pöytoghichay kï mut akïwïnchï kegh köpön nyo mi Makeda.

¹⁷Kemwochï Yoswö lö, “Kikenyorï pöytoghichay le mut wïnyo kegh köpön nyo mi Makeda.”

¹⁸Kïlö Yoswö, “Otörenchinö koghïn cho echön kuketo köpön atö pich atoni kïrip chane.

¹⁹Wölo mompur cho le akwa atoni, arïpa punkökwo anyagh tagh, mopïsyï ntökïlïtöy kanastinekwa, ompöwölo kikikonokwa ECHOTYON Tororötïnkwa rïntagh ompö chane.”

²⁰Kipar Yoswö nko pipö Israel chane ompö pörsyö nyo wow, wölo kïchïwïtyö cho le ngötunön akïlïtöy kanastin cho tekote.

²¹Kïmïlisyö nyu pïchay pich löwïr nyo karam möngot wölo mi Yoswö wölini le Makeda. Möminye chi nyo kïmwa kïgh nyo gha ompö chi anka tïkwïl nyo pö Israel.

²²Atolapay kïlö Yoswö, “Ayata kuka köpönonï amïtï pöytoghichoni kï mut wölo omitan.”

²³Kwigh lenyoni, kemïtï pöytoghichay kï mut wölo mi nyinte. Chane kï: pöytoghi Yerusalem nko Epron nko Yarmut nko Lakis nko Eklon.

²⁴Otini kikimïtyï Yoswö pöytoghichay, kïkur nyinte pich löwïr cho pö Israel akïlenchï wowïntino lïk cho kipa nko nyinte, “Apkana arikuna otönö kelyekwa kotwoni pöytoghichï.” Kïpka chane akwigh lenyoni.

²⁵Kïlenchï nyu Yoswö chane, “Maway anta opotpotön, achïchïm anyökonitu, ompöwölo ighchini lenyoni ECHOTYON pungkökwa löwïr cho oporyeghokwa.”

²⁶Atolapay kapar Yoswö chane akuwusö chane ket mut, kïyïsyeghö ketichay ntökwimön.

²⁷Nyini kirich kïröytö asis, kïmwatïta Yoswö ketyorunö ket aketö köpönonay köwïngo kegh atolapay ketörenchï koghïn cho echön köpönonay kukat nyo tökïmi nko ye.

²⁸Kïnam Yoswö Makeda asisoni akïpar pöytoghintenyi, kïpar chi anka tïkwïl nyo kimi ori, melö mi chi nyo kingötï. Kighchï nyinte pöytoghinto Makeda le wölo kida pöytoghinto Yeriko.

²⁹Kïweghö Yoswö Makeda nko pipö Israel löwïr akïporyö nko pipö Lipna.

³⁰Kitö ECHOTYON pipö Israel rïntagh ompö kanasyantanoni nko pöytoghintenyi kipar Yoswö chi anka tïkwïl nyo kimi ori, melö mi kïgh nyo kikitukyï ori. Kighchï pöytoghinto Lipna le wölo kida pöytoghinto Yeriko.

³¹Kïweghö Yoswö Lipna nko pipö Israel löwïr akïpa kurik Lakis akïporyeghö tïkwïl.

³²Kitö ECHOTYON pipö Israel rïntagh ompö Lakis asisto odeny akïpar chi anka tïkwïl nyo kimi ori le wölo kida Lipna.

³³Kïpusï nyu Oram pöytoghinto Keser kungarak Lakis, wölo kïpar Yoswö nyinte nko pikachi löwïr, möminye ompö akong nyo kingötï.

³⁴Kïweghö Yoswö nko pipö Israel löwïr Lakis kïpa Eklon kurik akïpar.

³⁵Kinam kanasyante asisini akïpar chi anka tïkwïl nyo kimi ori le wölo kida Lakis.

³⁶Kïpusta Yoswö nko pipö Israel löwïr ompö Eklon kïpa Epron akïporyeghö.

³⁷Kinam akïpar pöytoghintenyi nko kanastinechi cho lekïtöch nko chi anka tïkwïl nyo kimi ori, melö mi chi nyo kingötï le wölo kida Eklon.

³⁸Atolapay kïwö Yoswö nko Israel kutang Depir akïporyeghö.

³⁹Kïnam kanasyante nko pöytoghintenyi nko kanastinechi akïpar chi anka tïkwïl nyo kimi ori amelö mi nyo kingötï. Kighchï nyu Daudi Depir le wölo kida Epron nko Lipna nko pöytoghintenyi.

⁴⁰Kïlenyona kïrïnta Yoswö pipö koros löwïr cho mi wölo le kamas nko wölo le to nko nariytin nko pöytoghikwa löwïr, möminye nyo kingötï, wölo kïgh anka tïkwïl nyo satate lenyini kimwa ECHOTYON Tororöt pö Israel.

⁴¹Kïrïnta Yoswö chane kïngata Kades Parnea ntökwit Kasa nko koro Kosyen löwïr ntökurel Kipyon.

⁴²Kïnam Yoswö ompö osiswechoni pöytoghichoni löwïr nko koroswekwa, ompöwölo kiporyechï ECHOTYON Tororöt pö pipö Israel chane.

⁴³Atolapay kïmïla Yoswö nko pipö Israel löwïr kutang Kilkal möngengwa.