Read pokoot YOSWÖ 11 Bible Online

YOSWÖ 11 - pokoot bible

YOSWÖ 11

¹Otini kilïm Yapin pöytoghinto Asor lö karïnta pipö Israel pungkökwa, kïyonta chi wölo mi Yopap pöytoghinto Madon nko Syimron nko Aksyap

²nko pöytoghï cho mi koro komos okumpö löt, ompö mpöghoghyo Yordan nyo mi okumpö tagh nyo pö nanampa Kalilaya nko wölo le toyo kutïngkot nko Dor wölo lekïtö nanam

³ntökwit okumpö kongasis nko okumpö ta nko pipö Kanan Amori nko Ititi nko Peris nko Yepusi cho möngöy koro komos nko pipö Ipiti cho mi Ermon to koro Mispa.

⁴Kïpka nko lïkoskökwa löwïr cho möngörï, cho teno ngayam cho mi nanam nko angoletin cho chang nko nkaritin.

⁵Kutuyö pöytoghichoni löwïr lïkoskökwa akïpa kïruyö löwïr lalwa Merom, tökïporyö nko pipö Israel.

⁶Kilenchï ECHOTYON Yoswö, “Meway chane, ompöwölo atotenö nyete asïyech kikepar chane lömïs, itörenyi nyu chepkintolay angoletinekwa aipel nkarinekwa.”

⁷Kïlenyona kumir Yoswö chane nko pikachi löwïr pö lïk ompö lalwa Merom akïporyeghö chane.

⁸Kutöninyi ECHOTYON pipö Israel rïntagh ompö chane kïpar akeyon ntökwit Sidon nko Misrepot Maim akwit mpöghoghyo Mispa wölo kiportoy kongasis, kikïparata chane löwïr möminye akong nyo kingötï.

⁹Kighchï Yoswö chane le wölo kimwochï ECHOTYON, kitör angoletine chepkintolay akïpel nkarinekwa.

¹⁰Kiwï nyu Yoswö atoni, kïnam Asor akïpar pöytoghintenyi. Kyawes kanasyanta Asor kïtïl kanastine walaka.

¹¹Kïpar pich löwïr cho kimi ori. Kikiwany lömïs. Möminye nyo kikïpïstö kïsatat akïpel kanasyante.

¹²Kïnam Yoswö kanastina pöytoghichoni nko pöytoghikwa akïpar. Kuwonyö chane lömïs le ato kimwa Musa mötworinto ECHOTYON.

¹³Wölo melö kipel pipö Israel kanastin cho kimi tïkumwok kïpoto Asor onkït nyo kipel Yoswö.

¹⁴Kïrang pipö Israel tïch akïcheng tïkwïn löwïr cho pö kanastinechoni kïlïkwï pöröwekwa, wölo kïpar chi anka tïkwïl, mïs amelö mi chi nyo kikïpïstö kï satat.

¹⁵Kimwochï Musa Yoswö lenyini kimwochï ECHOTYON mötworintenyi Musa, akwigh Yoswö lenyoni. Melö kipïstö nyinte kïgh anka tïkwïl ompö ngalechini löwïr kimwochï ECHOTYON Musa.

¹⁶Kïlenyona kïcheng Yoswö koroswechï löwïr, koro komos nko wölo le to, kore kïmïkul nyo pö Kosyen nko Nekep* nko Arapa.

¹⁷Kïngata kutïng pö Alak nyo lekïto Seir ntökwit Paal Kad ompö mpöghoghyo Lepanon nyo mi kutïng pö Ermon kel. Kïnam pöytoghï löwïr akïpar.

¹⁸Kiporyö Yoswö nyo kogh nko pöytoghichoni löwïr.

¹⁹Möminye kanasyanta nyo kyam mis nko pipö Israel kïpoto pipö Ipiti cho kimöngöy Kipyon, wölo Kïnam kanastine walaka löwïr.

²⁰Ompöwölo ECHOTYON nyini kigh mötöwekwa kwoghïghitu tökïporyö nko pipö Israel atökepar chane kuwonyö lömïs amönyorïcha kisyonchin, lenyini kimwochï ECHOTYON Musa.

²¹Kungwïn Yoswö atoni akuwany Anakim löwïr ompö komoswo koro Epron nko Depir nko Anap nko komos löwïr cho pö Yuda nko Israel. Kiwany Yoswö chane lömïs nko kanastinekwa.

²²Möminye chi pö Anakim nyonikïny nyo kingötyï koro Israel, kïpoto ompö kanasyanta Kasa nko Kat nko Asdod.

²³Kïlenyona kïcheng Yoswö kore löwïr le otini kimwochï ECHOTYON Musa, kutö Yoswö pipö Israel kore kïlïkwï nyingwa nyo chengöy kïrïp kegh nko ortïnekwa. Kumuny nyu kore ompö poryot.