Read pokoot YOSWÖ 16 Bible Online

YOSWÖ 16 - pokoot bible

YOSWÖ 16

¹Kingata rotyo koro pipö Yosep Yordan atolekïtö Yeriko ompö kori pöghon cho mi okumpö kongasis akuwer surkwen kïpusta Yeriko kuwer koro kamas kïlït Petel.

²Kïweghö Petel ntökwit Lus, kuwer rotyo Atarot ntökwit koro pipö Arkit.

³Atolapay kïröytö okumpö ta ntökwit koro pipö Yaplet akwit rotyo Pet Oron wölo porö, atolapay kïlït Keser akïtor nanampa Kwen.

⁴Kïnyorï ara Manase nko Epraim cho kipö ara Yosep koroswekwa.

⁵Kile nyï rotyo ara Epraim kïrïp kegh nko korikwa. Kingata rotyo koroswekwa Atarot Adar okumpö kongasis, kïwö ntökwit Pet Oron wölo toka,

⁶akïweghö atoni rotyot kïlït nanampa Kwen. Atolapay kuwer Mikmetat okumpö löt akuwit okumpö kongasis kutang Taanat Syilo akïrop okumpö kongasis kutang Yanoa.

⁷Atolapay kïröytö ompö Yanoa ntökwit Atarot nko Naara, kïnam Yeriko akiwö kuwonyechï Yordan.

⁸Kïweghö rotyot Tapua kutang okumpö ta ntökwit champilwa Kana akïlït nanampa Kwen. Nka choni koroswo pipö ara Epraim kïrïp kegh nko korikwa,

⁹kimi nko kanastin löwïr cho echön nko cho kikïngot kïpöyit pipö ara Epraim ompö koroswo pipö ara Manase.

¹⁰Mayoncha pipö Kanan cho kimöngöy Keser, kïlenyona kïmang chane kwenu pipö Epraim nko ye, wölo kïlïkwï sekey.